1Be dogoria goi si keke bulumakao babe keke sipi tanisa keke tie Izireli turaṉamu sapu muliuṉu, si mamu galagala nia, mamu turaṉa pule la nia koasa tie ari nana.
2Ba be sa tie pu ari nana si lopu koa tata, ba be lopu gilania goi sa tie pu ari nana, si mamu vagia goi, mamu turaṉa la nia pa mua vetu. Pana mae hata ia sa tie pu ari nana si asa, si mamu vala nia goi koasa si asa.
3Mamu tavete kekeṉoṉo gunia tugo asa, be dogoria goi si keke doṉ'ki, keke poko gele, babe keke toṉa pule tanisa keke tie Izireli sapu muliuṉu.
4Be dogoria goi si keke doṉ'ki babe keke bulumakao tanisa keke tie Izireli si hoqa turaṉa pinaleke mamata pa siraṉa, si mamu toka nia pude va turu pulea.
5Sari na barikaleqe si lopu kaqu va sagei sari na poko tadi tie, meke sari na tie ba lopu kaqu va sagei sari na poko tadi barikaleqe. Se Zihova sa mia Tamasa si lopu qetuni sari na tie pu tavete gua asa.
6Be ta evaṉa sapu dogoria goi si keke vori kurukuru tapuru pa batuna keke huda babe pa pepeso, meke korapa opoi sa tinadia sari na vovoto babe sari na tuna, si mamu lopu vagia sa tinadia be guana vagi goi sari na tuna.
7Kote boka vagi goi sari na tuna kurukuru, ba kaqu va tapuru taloa ia goi sa tinadia, meke kaqu koa va seunae na mamutu sa mua tinoa.
8Pana kuria goi sa mua vetu vaqura, si kaqu va balau pude mamu tavete nia barabara goi pa hukihukirina sa vari likohaena sa batu vetu, meke lopu kaqu ta zutu nia goi, be hoqa vasina si keke tie meke mate.
9Lopu kaqu lete variheni ni goi koasa mua inuma vaeni sari kaiqa linetelete pule; be gua asa, si lopu kaqu tava malumu pude vagi goi vuadi sari na vaeni meke kaiqa linetelete pule.
10Lopu pusi varigara nia si keke bulumakao meke keke doṉ'ki pude geli va malohoria sa pepeso.
11Lopu va sagea sa poko sapu ta piti turaṉae vulu meke na lineni.
12Kaqu pitini vina sari gamu sari ka made hukihukiridi ri na mia poko.
13Be keke tie si haba ia sa si keke vineki, meke mumudi si lopu hiva nia pule sa si asa.
14Ke zutu kokoha nia sa si asa; zutu nia sa, na ele enene hoborona meke koa turaṉa tie, sipu lopu ele haba ia sa gua.
15Be ta evaṉa sapu gua asa, si kaqu paleke la vina sosode sari na tiatamana sa vineki koari na koimata tanisa vasileana sana, pude va sosodea sapu viana sa tudia vineki totoso varihaba si asa, meke kaqu va dogoro nia koarini sa poko ivara teqe pa boṉina sa rane varihaba.
16Meke kaqu zama la koa rini sa tamana sa vineki, ‘Ele ponia rau koasa tie hie sa tuqu vineki pude haba ia, meke lopu hiva nia sa kamahire si asa.
17Namu kokohana sa zinutu sapu zutu nia sa koasa. Zama si asa sapu enene hoborona sa vineki, sipu lopu ele haba ia sa gua. Ba hie sa mami vina sosode sapu lopu enene hoborona sa tumami vineki hie; mi dogoria koasa poko ivara teqe keoro sa vina sosode tana tamaloana hie!’
18Meke sipu dogoria rini si kaqu tuqe vagia ri na koimatana sa vasileana sana sa loana sa barikaleqe meke komitia.
19Meke kaqu va tabara nia keke gogoto poata siliva sa sa vinaripitui, meke ponia sa poata koasa tamana sa vineki, sina ele va ene hoboria sa tie hie, sa kinurekurena sa vineki Izireli. Meke lopu kaqu luara pania sa sa barikaleqe pa vinariluari pa doduruna sa dia tinoa.
20Ba be sa tinazutuna si hinokara, meke loke vina sosode, sapu lopu enene hoborona sa vineki,
21si kaqu mae turaṉa vura nia rini si asa pa sadana sa vetu tanisa tamana, meke kaqu gona va mate nia patu ri na tie pa nana vasileana si asa. Ura va kurekurei sa sari doduru turaṉana sipu enene hoboro paki nana, totoso korapa koa pa vetu tanisa tamana si asa, meke lopu ele varihaba si asa. Pa siraṉa gua asa si kote boka tava murimuri palae sa kinaleana hie.
22Be keke tie si eko turaṉia sa barikaleqe tanisa votiki tie meke ta poho si arini, si kaqu tava mate beto sari karua. Pa siraṉa gua asa si kaqu tava murimuri palae sa kinaleana asa.
23Be keke tie koasa vasileana si eko turaṉia si keke vineki sapu ele ta veko pinirovetuna koa keke tie meke ta poho,
24si kaqu turaṉa lani gamu pa sadana sa vasileana nomana, meke gona va mate betoni patu si arini. Tava mate sa vineki sina lopu gagaemana hata tinokae si asa. Koanana mo pa korapa vasileana nomana si asa meke kote boka ta avoso nana mo. Sa tie si kaqu tava mate tugo sina eko turaṉia sa sa vineki sapu ele ta veko pinirovetu vekona. Pa siraṉa gua asa, si kaqu tava murimuri palae sa kinaleana pa kinoa tie.
25Be vura la pa sadana sa popoa si keke tie, meke tuqe ososo nia sa si keke vineki, sapu ele ta veko pinirovetuna koa keke tie; ego, sa tie mo si kaqu tava mate,
26ba lopu sa vineki, sina lopu tavetia sa si keke sinea sapu padana pude kaqu tava mate si asa. Sa tinazutu asa, si tata kekeṉoṉo gua tugo, pana sekea keke tie sa turaṉana, meke va matea sa si asa,
27ura sa tie si tuqe ososo nia si keke vineki sapu ele ta pinirovetu vekona pude eko turaṉia pa sadana sa vasileana, meke gagaemana hata tinokae tugo sa vineki, ba namu loke tie toka nia.
28Ego, be keke tie si ta poho sapu tuqe ososo nia si keke vineki, sapu lopu ta pinirovetu vekona,
29kaqu here nia lima ṉavulu puta poata siliva sa sa tamana sa vineki koasa hinoluna; meke kaqu ta evaṉae nana barikaleqe si asa, sina ososo nia sa pude va qetu pule nia. Meke lopu kaqu luara pania sa pa doduru dia tinoa.
30Loke tie si kaqu eko turaṉia babe haba ia sa barikaleqe tanisa tamana soti, ura kote va kurekurea sa sa tamana.
