Yeremi 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Bɛɛ Isirelibɑ, i swɑɑ dɑkio i nɔ ye Yinni Gusunɔ u bɛɛ sɔ̃ɔmɔ. U nɛɛ,

²i ku bwese tukunun yirɑ swĩi. I ku wururɑ wɔllun yĩre nin sɔ̃, ni bwese tukunu nù n wɑ, nu rɑ nɑnde.

³Domi bwese nin sɑ̃ɑru tɑ sɑ̃ɑwɑ kɑm dirum. Nu rɑ sewɑ nu dɑ dɑ̃ɑ sɔ̃ɔwɔ nu dɑ̃ɑ burɑ. Kpɑ dɑ̃ɑ dɑ̃ko u kɑ ye bwɑ̃ɑroku ko.

⁴Kpɑ bu gu burɑru kuɑ, bu gu sii geesu kɑ wurɑ pote. Kpɑ bu girɑ bu kulumbɑ kpɑre kɑ mɑtɑlɑkɑ, gu ku kɑ wɔrumɑn sɔ̃.

⁵Bwɑ̃ɑrokunu nu rɑ n sɑ̃ɑwɑ nge nɑre ye bɑ rɑ ko gberɔ. Nu ǹ gɑri mɔ̀, bɑ rɑ n nu sɔɔwɑwɑ, domi nu ǹ kpɛ̃ nu kɑ tii sĩ. Yen sɔ̃, i ku nin bɛrum ko. Nu ǹ kpɛ̃ nu bɛɛ kɔ̃sɑ ǹ kun mɛ geɑ kuɑ.

⁶Mɑ Yeremi u Gusunɔ siɑrɑ u nɛɛ, Yinni Gusunɔ, ɑ kpɑ̃. Goo sɑri wi u kɑ nun weenɛ. Mɑ ɑ yĩsiru yɑrɑ wunɛn dɑm sɑɑbu.

⁷Wunɑ ɑ sɑ̃ɑ bwesenu kpuron sinɑ boko. Wɑrɑ u ǹ koo nun nɑsiɑ. Wunɑ ɑ yiiko kpuro mɔ. Bwesenu kpuron bwisigibu sɔɔ, goo sɑri wi u kɑ nun weenɛ.

⁸Be kpuro bɑ ǹ bwisi mɔ. Ben yɛ̃ru tɑ sɑ̃ɑwɑ kɑm. Domi dɑ̃rɑ bɑ rɑ dɑ̃ku bɑ n sɑ̃ɑmɔ.

⁹Kpɑ bu tu sii geesu pote, si bɑ kɑ nɑ Tɑɑsisin di, ǹ kun mɛ wurɑ ye yɑ wee Ufɑsin di, kpɑ bu tu yɑbe gɑɑdurɑgiru kɑ wunɔmgiru sebusiɑ. Yebɑ kpuro yɑ sɑ̃ɑwɑ tɔnun nɔmɑn sɔmburu.

¹⁰Adɑmɑ wunɛ Yinni Gusunɔ, ɑ sɑ̃ɑwɑ Yinni, wunɑ n weenɛ bu sɑ̃. A wɑ̃ɑwɑ. Kɑɑ n mɑɑ bɑndu diiwɑ sere kɑ bɑɑdommɑɔ. Wunɛn mɔru yɑ̀ n seewɑ, tem mu rɑ yĩiriwɑ, kpɑ bwesenu kpuro nu kpɑnɑ nu yɔ̃rɑ wunɛn wuswɑɑɔ.

¹¹Bɛɛ bwese tukunu, i swɑɑ dɑkio i nɔ, bɛɛn bũu ni, nu ǹ wɔllu kɑ tem tɑkɑ kue. Nin tii nu koo kɑm kowɑ mɑm mɑm.

¹²Yinni Gusunɔwɑ u tem tɑkɑ kuɑ kɑ win dɑm, kɑ win yɛ̃ru, mɑ u wɔllu tɛriɑ kɑ win bwisi.

¹³Wiyɑ u rɑ de bukɔ gu se wɔllɔ, kpɑ u woo seeyɑmɑ sɑɑ gen wɑ̃ɑ yerun di, kpɑ guru winu nu nim kpɑɑsinɑ, kpɑ guru mɑɑkinu nu koorɑ, kpɑ gurɑ yu nɛ.

¹⁴Tɔnu ù n ye kpuro mɛɛrɑ, u rɑ biti soorewɑ. Sekuru tɑ rɑ mɑɑ sekobu mwɛwɑ bɑ̀ n ben bwɑ̃ɑroku ni wɑ. Domi nu ǹ kpɛ̃ nu ko mɛ, nu ǹ wɛ̃siɑru mɔ.

¹⁵Bɑ nu kuɑwɑ bu kɑ tɔmbu nɔni wɔ̃ke. Nu ǹ sɑ̃ɑ gɑ̃ɑnu. Nu koo kɑm ko sɔ̃ɔ teeru, dɔmɑ te Yinni Gusunɔ u koo nu siri.

¹⁶Gusunɔ, Isirelibɑn Yinni u ǹ sɑ̃ɑ nge ni. Domi wiyɑ u kpuro tɑkɑ kuɑ. Wiyɑ u sɑ̃ɑ win tɔmbun ɑrumɑni. Win yĩsirɑ Gusunɔ, wɔllu kɑ tem Yinni.

¹⁷Yeremi u nɛɛ, bɛɛ Yerusɑlɛmugibu, wee, yibɛrɛ bɑ bɛɛ tɑrusi. I seewo i bɛɛn yɑ̃nu kpɑɑsinɑ.

¹⁸Domi Yinni Gusunɔ u nɛɛ, u koo de yibɛrɛ be, bu bɛɛ wɔri, kpɑ bu bɛɛ gurɑ bu kɑ bɛɛ dɑ mi n tomɑ.

¹⁹Yerusɑlɛmugibu bɑ wuri wɔri bɑ mɔ̀, sɑ kɑm kuɑ. Wee, bɛsɛn bosu kpɛ̃ɑ, bɛsɛn nɔni swɑ̃ɑrɑ bɑndɑ. Sɑ rɑɑ nɛɛ, kɔ̃sɑ yɑ̀ n sun deemɑ, sɑ ko kpĩ su ye mɑ.

²⁰Adɑmɑ bɛsɛn diɑ yɑ wɔrukɑ. Yen wɛ̃ɛ kpuro kɑsikirɑ. Mɑ bɑ bɛsɛn bibu gurɑ kpuro. Goo sɑri wi u koo mɑɑ bɛsɛn wuu seeyɑ.

²¹Yerɑ Yeremi u nɛɛ, bɛɛn kpɑrobu bɑ kuɑ gɑri bɑkɑsu. Bɑ ǹ Yinni Gusunɔ kɑsu. Yen sɔ̃nɑ bɑ ǹ kuure, mɑ bɛɛ kpuro i yɑrinɑ.

²²Wee dɑmu gɑgu gɑ nɔɔrɑmɔ. Tɔn dɑbirɑ wee sɑɑ sɔ̃ɔ yɛ̃sɑn nɔm geu giɑn di, bu kɑ Yudɑbɑn wusu kpeerɑsiɑ, kpɑ su ko gbeeku bɔ̃nun wɑ̃ɑ yeru.

²³Yinni Gusunɔ, nɑ yɛ̃ mɑ tɔnu kun kpɛ̃ u win tii kpɑrɑ nge mɛ n weenɛ. Goo sɑri wi u koo kpĩ u win tii swɑɑ geɑ sure.

²⁴Yinni Gusunɔ, ɑ mɑn sɛɛyɑsio sɑkɑ sɔɔ, n kun kɑ mɔru, kpɑ ɑ ku rɑ mɑn kɑm koosiɑ.

²⁵A wunɛn mɔru sureo bwese ni nu ǹ nun mɛm nɔɔwɑmmɛn mi, ni, ni nu ǹ nun sɑ̃ɑmɔ. Domi nu wunɛn tɔmbu Yɑkɔbun bweseru kpeerɑsiɑmɔ, nu ben tem bɑnsu koosiɑmɔ.