1Yinni Gusunɔ, ɑ sɑ̃ɑwɑ gemgii bɑɑdommɑ, nɑ ǹ kpɛ̃ n nun siribu soku. Adɑmɑ kɑ mɛ, nɑ kĩ n nun gɑ̃ɑnu bikiɑ wunɛn gem mɛ sɔɔ. Ye nɑ bikiɑmɔ wee. Mbɑn sɔ̃nɑ durumgiin wɑ̃ɑru tɑ rɑ n kuurɑmɔ. Mbɑn sɔ̃nɑ ɑ rɑ de be bɑ ǹ nun nɑɑnɛ sɑ̃ɑ bɑ n wɑ̃ɑ bɔri yɛndu sɔɔ.
2Wunɑ ɑ bu duurɑ nge dɑ̃ru, mɑ bɑ nuuru kuɑ, bɑ kpɛ̃ɑ bɑ binu mɑrumɔ. Mɛyɑ wunɛn gɑri rɑ n wɑ̃ɑ ben nɔɔwɔ. Adɑmɑ yi ǹ wɑ̃ɑ ben gɔ̃ruɔ.
3Yinni Gusunɔ, ɑ mɑn yɛ̃. A mɑn wɑɑmɔ mɑ ɑ nɛn gɔ̃ru wɛ̃ɛrɑ, ɑ wɑ mɑ gɑ wɑ̃ɑ kɑ wunɛ. A tɔn kɔ̃so be wunɔ nge yɑ̃ɑ ni bɑ rɑ mwɛ bu sɑke. A bu sɔɔru koowo ɑ yi tɔ̃ɔ te bɑ koo tɔmbu gon sɔ̃.
4Sere sɑɑ yerɑ̀ kɑɑ n derɑ bɛsɛn tem mu n wɑ̃ɑ nuku sɑnkirɑnu sɔɔ. Wee yɑkɑsu kpuro gberɑmɔ, mɑ gbeeku yɛɛ kɑ gunɔsu gbimɔ bɛsɛn tem mɛn tɔn kɔ̃sobun sɔ̃. Domi bɑ gerumɔ bɑ mɔ̀, ɑ ǹ ben sɑnu sɑnusu wɑɑmɔ.
5Yinni Gusunɔ u nɛɛ, Yeremi, ɑ̀ n kɑ nɑɑsugibu dukɑ mɔ̀, mɑ ɑ bu kpɑnɑ, ɑ wɑsirɑ, ɑmɔnɑ kɑɑ kɑ kpĩ ɑ kɑ dumigibu dukɑ dɑ. À n bɔri yɛndu mɔ sɑnɑm mɛ tem mu ɑlɑfiɑ mɔ tɔnɑ, ɑmɔnɑ kɑɑ ko Yuudɛnin dɑɑru tɑ̀ n nim yibɑ tɑ yɑrimɔ.
6Domi wunɛn mɛro bisibu kɑ wunɛn yɛnugibu bɑ nun nɑɑnɛ sɑrirun kom kuɑmmɛ. Wee bɑ nun nɔɔgiru suemɔ biruɔ. A ku bu nɑɑnɛ ko, bɑɑ bɑ̀ n nun gɑri dori sɔ̃ɔmɔ.
7Yinni Gusunɔ u nɛɛ, nɑ nɛn sɑ̃ɑ yeru deri. Nɑ nɛn tɔmbu biru kisi, be, be bɑ sɑ̃ɑ nɛn ɑrumɑni. Wee be, be nɑ kĩ mi, nɑ bu yibɛrɛbɑ nɔmu sɔndiɑ.
8Domi bɑ mɑn seesi nge gbee sunɔ ge gɑ kukirimɔ dɑ̃ɑ sɔ̃ɔwɔ. Yen sɔ̃nɑ nɑ ǹ mɑɑ bu kĩ nge yellu.
9Bɑ kuɑ nge gunɔ ge gunɔsu gɑsu su kɑsu su di. Kon gbeeku yɛɛ kpuro soku yi nɑ yi di.
10Yibɛrɛ dɑbiru bɑ nɑ nɛn tɔmbun temɔ bɑ mu sɑnkɑ, nge mɛ yɑɑ sɑbenu nu rɑ gberun dĩɑnu sɑnku. Tem mɛ, mu rɑɑ wɑ̃, ɑdɑmɑ bɑ ǹ gɑ̃ɑnu deri mi.
11Bɑ tem mɛ gɔsiɑ nge tem sɑɑrɑm. Wee mu sɑ̃ɑre nge tɔnu wi u gɔɔ sumɔ u nuki sɑnkire. Tem mɛ kpuro mu kɑm kuɑ. Goo sɑri wi u mɛn weeweenu kuɑ.
12Kɑ guunun wii kpiirɔ kpuro yibɛrɛbɑ bɑ yɔɔwɑwɑ. Nɑ derɑ tɑbu bu tem mɛ kpuro wukiri. Goo sɑri wi u wɑ̃ɑ bɔri yɛndu sɔɔ.
13Wee bɑ dĩɑnu duurɑ, mɑ sɑ̃ki kpiɑ. Bɑ tii wɑhɑlɑ kuɑ kɑm. Sekurɑ bɑ gɑ̃ nɛ, Yinni Gusunɔn mɔrun sɔ̃.
14Yinni Gusunɔ u nɛɛ, bwese ni nu kɑ Isirelibɑ sikerenɛ, nu sɑ̃ɑwɑ tɔn kɔ̃sobu. Nu tem mɛ mwɑ mɛ nɛ, Yinni Gusunɔ nɑ Isirelibɑ wɛ̃ mu n sɑ̃ɑ ben tubi. Wee ye nɑ gerumɔ bwese nin sɔ̃. Nɑ nɛɛ, kon nu wukɑ sɑɑ nin tem di, kpɑ n Yudɑbɑ wunɑ nin suunu sɔɔn di.
15Adɑmɑ sɑnɑm mɛ nɑ nu wukɑ nɑ kpɑ, kon mɑɑ nin wɔnwɔndu ko kpɑ n de nin bɑɑtere tu wurɑ ten temɔ mɛ tɑ tubi di.
16Geemɑ bɑ rɑɑ nɛn tɔmbu sɔ̃ɔsi bu bɔ̃re kɑ bũu wi bɑ mɔ̀ Bɑɑlin yĩsiru, ɑdɑmɑ bɑ̀ n gɔ̃ru gɔsiɑ, bɑ mɔ̀ nge mɛ n weenɛ nɛn tɔmbu bu ko, kpɑ bɑ n bɔ̃rumɔ bɑ n mɔ̀, kɑ nɛ, Yinni Gusunɔn wɑ̃ɑru. Sɑɑ yerɑ kon de bu sinɑ kɑ nuku dobu nɛn tɔmbun suunu sɔɔ.
17Adɑmɑ bwese te tɑ yinɑ tu mɑn mɛm nɔɔwɑ, kon tu wukɑwɑ kpɑ n tu kpeerɑsiɑ. Nɛ, Yinni Gusunɔwɑ nɑ yeni geruɑ.
