1Wɔ̃ɔ yɛndɑ tiɑ Sedesiɑsi u mɔ sɑnɑm mɛ u bɑndu di Yudɑɔ. Mɑ u kuɑ wɔ̃ɔ wɔkurɑ tiɑ bɑndu sɔɔ Yerusɑlɛmuɔ. Win mɛron yĩsirɑ Hɑmutɑli, Yeremi, Libinɑgiin bii.
2Sedesiɑsi wi, kɔ̃sɑ u kuɑ Yinni Gusunɔn nɔni sɔɔ. U kuɑ mɑm mɑm nge mɛ Yoyɑkimu u rɑɑ kuɑ.
3Yinni Gusunɔ u kɑ Yerusɑlɛmugibu kɑ Yudɑbɑ mɔru kuɑ, mɑ u bu girɑ win wuswɑɑn di. Mɑ Sedesiɑsi u Nɛbukɑnɛsɑɑ Bɑbilonin sinɑ boko seesi.
4Sedesiɑsin bɑndun wɔ̃ɔ nɔɔbɑ nnɛsen suru wɔkurusen sɔ̃ɔ wɔkuruse, yerɑ Nɛbukɑnɛsɑɑ u nɑ kɑ win tɑbu kowobu kpuro bu kɑ Yerusɑlɛmu wɔri. Mɑ bɑ ben sɑnsɑni girɑ gbɑ̃rɑrun gɑ̃ɑrɔ. Miyɑ bɑ kuku yenu gbɑ gbɑ bɑ kɑ gbɑ̃rɑ te sikerenɑ.
5Mɑ bɑ Yerusɑlɛmu ye tɑrusi sere n kɑ kuɑ Sedesiɑsin bɑndun wɔ̃ɔ wɔkurɑ tiɑse.
6Wɔ̃ɔ gen suru nnɛsen sɔ̃ɔ nɔɔbɑ nnɛse sɔɔ, yerɑ gɔ̃ɔrɑ wuu ge nɛnuɑ. Domi dĩɑnu mɑɑ sɑri tem mɛ sɔɔ ni tɔmbɑ koo di.
7Yerɑ bɑ gbɑ̃rɑru yɑbɑ, mɑ Yerusɑlɛmun tɑbu kowobu kpuro bɑ duki yɑkikirɑ wɔ̃kuru. Bɑ yɑrɑ sɑɑ kɔnnɔn di ge gɑ wɑ̃ɑ gbɑ̃rɑru yirun bɑɑ sɔɔ sinɑ bokon dɑ̃ɑ gbɑɑrun bɔkuɔ. N deemɑ sɑɑ ye sɔɔ, Bɑbilonigibɑ wuu ge sikerenɛ. Be bɑ duki yɑkikirɑ mi, bɑ kpɑwɑ kɑ swɑɑ ye yɑ dɔɔ Yuudɛnin wɔwɑ giɑ.
8Mɑ Bɑbilonin tɑbu kowobu bɑ sinɑ boko Sedesiɑsi nɑɑ girɑ, bɑ nùn mwɑ Yerikon wɔwɑɔ. Yerɑ win tɑbu kowobu kpuro bɑ yɑrinɑ bɑ nùn deri.
9Bɑbilonigii be, bɑ sinɑ boko Sedesiɑsi mwɑ bɑ kɑ dɑ ben sinɑ bokon mi Ribilɑɔ, Hɑmɑtin temɔ. Mɑ u nùn siri.
10U derɑ bɑ Sedesiɑsin bibu kɑ Yudɑn wirugibu kpuro sɑkirɑ wi, Sedesiɑsin tiin nɔni biru Ribilɑ mi.
11Mɑ u Sedesiɑsin tiin nɔni wɔwɑ u nùn bɔkuɑ kɑ sii gɑndun yɔni. Yen biru, u nùn suɑ u kɑ dɑ Bɑbiloniɔ u nùn doke pirisɔm sɔɔ sere u kɑ gu.
12Yenibɑn biru, Nɛbukɑnɛsɑɑn bɑndun wɔ̃ɔ yɛndu tiɑ sɑrise sɔɔ, yen suru nɔɔbusen sɔ̃ɔ wɔkuruse, yerɑ Nɛbusɑrɑdɑ wi u sɑ̃ɑ sinɑ bokon kɔ̃sobun guro guro u nɑ Yerusɑlɛmuɔ.
13Mɑ u Yinni Gusunɔn sɑ̃ɑ yeru dɔ̃ɔ mɛni, kɑ sinɑ kpɑɑru, kɑ yɛnu si su tie Yerusɑlɛmu mi kpuro, kɑɑ sere gere dɑmgibun yɛnusu?
14Mɑ Nɛbusɑrɑdɑ wi, kɑ win tɑbu kowobu bɑ Yerusɑlɛmun gbɑ̃rɑru kɔsukɑ bɑ sururɑ.
15Mɑ bɑ bwɛ̃ɛbwɛ̃ɛbu gɑbu yoru mwɛɛrɑ kɑ be bɑ tie wuu ge sɔɔ kɑ be bɑ tii wɛ̃ kɑ sere nɔmɑn sɔm kowobu.
16Adɑmɑ Nɛbusɑrɑdɑ u bwɛ̃ɛbwɛ̃ɛ ben gɑbu deri bu kɑ resɛm gbɑɑnu kɑ gbeɑ wuku.
17Yen biru, Bɑbilonigii be, bɑ sɑ̃ɑ yee ten torom gɑ̃ritii suɑ kɑ kɑɑtonu kɑ wobɑ kɑ nɔri kɑ gbɛ̃ɑ yè sɔɔ bɑ rɑ yɑ̃ku yɛm doke kɑ sere sɑ̃ɑ yee ten dendi yɑ̃ɑ ni bɑ kuɑ kɑ sii gɑndu. Mɑ bɑ sɑ̃ɑ yee ten gberebɑ sururɑ yi bɑ kuɑ kɑ sii gɑndu, mɑ bɑ boo sii gɑnduguu ge kɔsukɑ kɑ gen yɔ̃rɑtii. Yen biru, bɑ sii gɑn ni kpuro gurɑ bɑ kɑ dɑ Bɑbiloniɔ.
19Mɑ kɔ̃sobun guro guro wi, u mɑɑ gbɛ̃ɛ yorukunu suɑ kɑ dɔ̃ɔ gurɑtii kɑ nɔri kɑ torom gɑ̃ritii kɑ gbɛ̃ɑ yè sɔɔ bɑ rɑ yɑ̃ku yɛm doke, kɑ dɑbunu. Ye kpurowɑ bɑ gurɑ ye bɑ gesi kuɑ mi kɑ wurɑ kɑ sii geesu.
20Gbere yiru ye, kɑ boo sii gɑnduguu ge, kɑ sere kɛtɛn weenɑsii wɔkurɑ yiru ye yɑ boo ge sɔɔwɑ, ye sinɑ boko Sɑlomɔɔ u kuɑ kɑ sii gɑndu Yinni Gusunɔn sɑ̃ɑ yee ten sɔ̃, goo kun yen bunum geeru yɛ̃.
21Gbere yiru ye, yɑ gunum nɛwɑ. Yen bɑɑyeren gunum mu sɑ̃ɑwɑ gɔm soonu yɛndu yiru sɑri. Mɑ yen bɔɔrum mu sɑ̃ɑ gɔm soonu wɔkurɑ yiru. Yen bɑɑyere yɑ wem mɔwɑ. Mɑ sii si bɑ kɑ ye kuɑn sinum mu sɑ̃ɑ nɔm tɑrɑrun sɑkɑ.
22Bɑ yen bɑɑyere furɔ dokeɑ ge bɑ kuɑ kɑ sii gɑndu. Furɔ gen bɑɑgeren dɛ̃ɛbu sɑ̃ɑwɑ gɔm soonu nɔɔbu, mɑ bɑ gen bɑɑgere sii yɔni kɑ dɑ̃ɑ mɑrum weenɑsii gore bɑ kɑ sikerenɑ. Bɑ ye kpuro kuɑwɑ kɑ sii gɑndu.
23Dɑ̃ɑ mɑrum weenɑsii wunɔbuwɑ (100) bɑ gen bɑɑgere goreɑ bɑ kɑ sikerenɑ. Adɑmɑ wunɔbu nnɛ sɑriwɑ bɑ koo kpĩ bu wɑ sɑɑ tem di.
24Nɛbusɑrɑdɑ sinɑ bokon kɔ̃sobun guro guro wi, u Serɑyɑ yɑ̃ku kowo tɔnwero mwɑ kɑ Sofoni wi u sɑ̃ɑ yɑ̃ku kowo Serɑyɑn yiruse kɑ sɑ̃ɑ yerun kɔnnɔn kɔ̃sobu itɑ,
25kɑ sinɑ kpɑɑrun tɑbu kowobun wirugii goo, kɑ tɔmbu nɔɔbɑ yiru gɑbu be bɑ rɑ kɑ sinɑ boko wesiɑnɛ kɑ tɑbu kowobun wirugiin tire yoro wi u rɑ tɑbu kowobun yĩsɑ yore tireru sɔɔ kɑ sere mɑɑ tɔmbu wɑtɑ be bɑ sɑ̃ɑ wuugibu.
26Be kpurowɑ u mwɛɛrɑ, mɑ u bu kpɑrɑ u kɑ dɑ Bɑbilonin sinɑ bokon mi Ribilɑɔ.
27Mɑ sinɑ boko u bu so so. Mɑ u derɑ bɑ bu go Ribilɑ mi, Hɑmɑtin temɔ. Nge mɛyɑ bɑ kɑ Yudɑbɑ yoru mwɛɛrɑ bɑ kɑ doonɑ n tomɑ ben tem di.
28Yudɑ be Nɛbukɑnɛsɑɑ u yoru mwɛɛrɑ u kɑ dɑ win temɔ win bɑndun wɔ̃ɔ nɔɔbɑ yiruse sɔɔ, ben geerɑ sɑ̃ɑwɑ tɔmbu nɔrɔbun subɑ itɑ kɑ yɛndɑ itɑ (3.023).
29Be u mɑɑ yoru mwɛɛrɑ Yerusɑlɛmuɔ win bɑndun wɔ̃ɔ yɛndu yiru sɑrise sɔɔ, ben geerɑ sɑ̃ɑwɑ tɔmbu nɛnɛ kɑ tɛnɑ kɑ yiru (832).
30Win bɑndun wɔ̃ɔ yɛndɑ itɑse sɔɔ, yerɑ Nɛbusɑrɑdɑ wi, u tɔmbu nɑtɑ kɑ wunɑɑ weeru kɑ nɔɔbu (745) mwɛɛrɑ Yerusɑlɛmuɔ u kɑ dɑ. Yudɑ be bɑ mwɛɛrɑ mi kpuro, ben geerɑ kuɑwɑ tɔmbu nɔrɔbun subɑ nnɛ kɑ nɑtɑ (4.600).
31Efili Mɛrodɑki Bɑbilonin sinɑ boko, win bɑndun wɔ̃ɔ gbiikuu sɔɔ, yerɑ u Yoyɑkini Yudɑbɑn sinɑ boko wɔlle suɑ mɑ u nùn yɑrɑ pirisɔm di win yoru dibun wɔ̃ɔ weeru itɑ sɑrise sɔɔ, yen suru wɔkurɑ yirusen sɔ̃ɔ yɛndɑ nɔɔbuse sɔɔ.
32U kɑ nùn gɑri kuɑ kɑ kĩru mɑ u win bɑndu wɔlle suɑ n kere sinɑm be bɑ yoru mwɛɛrɑ bɑ kɑ wɑ̃ɑ Bɑbiloni mi, kɑ wi sɑnnu.
33Mɑ u win pirisɔm yɑ̃nu kɔsɑ, u derɑ u rɑ di kɑ wi, sinɑ boko sɑnnu sere kɑ win wɑ̃ɑrun nɔrɔ.
34Bɑbilonin sinɑ boko wiyɑ u rɑ nùn nɔɔri bɑɑdommɑ kpɑ u nùn wɛ̃ yèn bukɑtɑ u mɔ kpuro sere u dɑ u kɑ gu.
