Text copied!
CopyCompare
Bible Ni Thothup - Exodus

Exodus 32

Help us?
Click on verse(s) to share them!
1Fa’ani guy e girdi’ nike par Moses u daken fare burey nike n’uw nap’an ma dawori yib nga but’, miyad mu’ulung nga to’oben Aron me lungurad ngak, “Da’an da nanged e n’en nike buch rok Moses, ni ir e gafaliydad nga wuru’ yu Egypt; ere mu ngongliy reb e got ngomad nge mang ir e gafaliymad.”
2Me ga’ar Aron ngorad, “Mu feked e talbuch ni gol ni be talbuch pi le’engmed, nge pifakmed ni pumo’on nge ppin ngay i yib ngog.”
3Aram me luf gubin e girdi’ e talbuch ni gol rorad ngan fek i yib ngak Aron.
4Me fek Aron fapi talbuch nge ranrannag ko nifiy, me pu’og ngalan ban’en, nge ngongliy ya’an ba fak e garbaw riy ni pumo’on. Me ga’ar e girdi’ nu Israel, “Yu Israel, irera’ e got rodad, ni ir e gafaliydad nga wuru’ yu Egypt.”
5Ma aram me toy Aron ba altar u m’on ko fare fak e garbaw ni pumo’on nib gol me ga’ar, “Gabul e ngad ngongliyed ba madnom ngad liyorgad ngak SOMOL.”
6Me reb e rran riy nri kab kadbul miyad pi’ e maligach ni mo’oruf, miyad fek i yib e maligach nma gapaseg thilin Got nge girdi’; miyad par nga but’ ngu’ur abichgad ma yad be garbad, miyad cheal ngu’ur rin’ed e tin galong ma yad be chingnag.
7Me ga’ar SOMOL ngak Moses, “Mu gur nigem ngam sul nga p’ening, ya piyu Israel, ni girdi’ rom, ni gur e mu gafaliyrad nga wuru’ yu Egypt e kar denengad kar pi’ed keru’rad ngog.
8Kar paged e n’en ni kugog ni ngar folgad riy, ya kar ranran niged e gol kar ngongliyed ya’an ba pifak e garbaw ni pumo’on riy yad be tayfan miyad be pi’ e maligach ngak. Yad be yog ni ireram e got rorad, ni gafaliyrad nga wuru’ yu Egypt.
9Moses, ku gguy feni gelan’ e pi girdi’ ney.
10Chiney, e dab mu guy rogon ni ngam taleggeg. Ya ku gu damumuw ngorad, ni arme nggu thang owcharad. Ma aram e bay gu gagiyeg nagem nge pi’in owchem ngar manged girdi’en reb e nam ni ba ga’.”
11Machane me wenig Moses ngak SOMOL ni Got rok ni ga’ar, “SOMOL, mang ni ngari gel e damumuw rom ngak e girdi’ rom, ni gur e mu lagrad u tan pa’ yu Egypt nga pa’am nib gel nge gelngim nib gel?
12Mang ni ngam pag piyu Egypt nge yag ni lungurad, ‘I waliy e girdi’ rok nga wuru’ yu Egypt ya ke leamnag ni nge li’rad u fithik’ e burey nge math owcharad ni yad gubin’? Mu pag e damumuw rom nib gel ngam thiliyeg lanin’um, ngam pag ndab mfek e binir e riya’ i yib ngak e girdi’ rom.
13Mu leamnag fapi tapigpig rom i Abraham, Isak, nge Jakob. Mu leamnag fare michmich ni mu tay ngorad ni bay mu pi’ ngorad e pi’in owcharad ni bod feni yo’or e t’uf u lanelang, ma bay mu pi’ ngak e pi’in owcherad e re nam ney ni ga’ngin ni ngar tafned ni dariy n’umngin nap’an.”
14Ma aram me thiliyeg SOMOL laniyan’, ma daki fek fare riya’ i yib ngak e girdi’ rok ni fa’ani yog ni nge rin’.
15Ma aram me sul Moses u daken fare burey nga but’, nike fek fa gali yang i malang ni l’agruw raba’ ni kan yoloy fapi motochiyel ngay.
16Ri Got e ngongliy e gali yang i malang nem me ker fapi motochiyel nga daken.
17Me rung’ag Joshua laman e girdi’ ni yibe tolul, me ga’ar ngak Moses, “Kug rung’ag lingan e cham ko gin ni be par piyu Israel riy.”
18Me ga’ar Moses, “Gathi aram rogon lingan e garus ni ka ni gel fa lingan e yor ni kan me’waer; ya laman e tang.”

19Ma fa’ani chugur Moses ko gin yibe par riy nrayag ni nge guy fare pifak e garbaw ni pumo’on, nge girdi’ ni be churu’, mri damumuw. Ma ku rom u enggin fare burey me yin’ fa gal yang i malang ni bay u pa’ nga but’ nge pil.
20Me fek fare liyos ni kar ngongliyed ni bod ya’an ba fak e garbaw, nge urfiy, me pirdi’iy nge par nike yochyang, me athkuy ko ran. Me tay ir ngak e girdi’ nu Israel ngar unumed.
21Me ga’ar ngak Aron, “Mang e ke rin’ e pi girdi’ ney ngom kam waliyrad kar ngongliyed e biney e denen nrib kireb?”
22Me ga’ar Aron, “Dab mu puwan’ ngog; ga manang rogon e pi cha’ney ni fa’an yad ra turguy u lanin’rad ni ngar ngongliyed e kireb.
23I lungurad ngog, ‘Mu ngongliy reb e got ngomad nge mang ir e i gafaliydad i yan, ya da gu nanged e n’en nike buch rok Moses, ni ir e gafaliydad nga wuru’ yu Egypt.’
24Mu gog ngorad ni ngar feked i yib e nunuw rorad ni gol, ma pi’in ni immoy e nunuw rorad ni gol e ra lufed ngar pi’ed ngog. Mu gon’ nga fithik’ e nifiy me yib e re liyos ney riy.”
25Me guy Moses ni Aron e ke pag fapi girdi’ kar thum’gad ngaru’ kar makak’ar niged yad u p’eowchen e pi to’ogor rorad.
26Ma aram me sak’iy Moses nga langan e garog ko gin be par piyu Israel riy me tolul ni ga’ar, “Mini’ e bay u ba’ rok SOMOL? En ni bay u ba’ rok e nge yib ngog!” Me mukun gubin e pi Levite nga charen,
27me ga’ar ngorad, “Fare SOMOL ni Got rok piyu Israel e be yog ngomed ni gimed gubin ni ngam m’aged e saydon romed nga lukngumed ngam marod ko biney e garog u lan e gin’ey ni be par piyu Israel riy ko binem e garog ngam thanged owchen pi walagmed, pi tafager romed, nge pi’in gimed buguliyoror.”
28Me fol fapi Levite riy ngar li’ed gon’apan 3000 e pumo’on e rofen nem.
29Me ga’ar Moses ngak pi e Levite, “Daba’ e kam machalbog niged gimed ni ngam manged prist ngam pigpiggad rok SOMOL, ko mathang pogofan ni kam ted ngak pifakmed nge pi walagmed, machane SOMOL e ke pi’ e fal’eg wa’ath rok ngomed.”
30Me reb e rran riy me ga’ar Moses ngak piyu Israel, “Kam ngongliyed reb e denen nrib gel e kireb riy. Machane bay gu wan e chiney nga daken e burey ngak SOMOL; ya sana gu ra wenig ngak me n’agfan u wan’ e denen ni kam ngongliyed.”
31Me sul Moses ngak SOMOL, me ga’ar ngak, “Ke ngongliy piyu Israel reb e denen nrib gel e kireb riy! Kar ngongliyed ba got ko gol ku’ur tedfan.
32Wenig ngom, mu runguyrad ngam n’agfan u wun’um e denen rorad. Ma ra danga’, me ere gu be wenig ngom ni ngam thang fithingag u lan fare babyor ni kam yoloy fithingan e girdi’ rom ngay.”
33Me ga’ar SOMOL ngak Moses, “Pi’in kar denengad ni ba togopluw ngog e bay gu thang fithingarad u lan e babyor rog.
34Mman e chiney, ngam gafaliy yu Israel ko gin ni kugog murung’agen ngom. Dab mu pag talin ni engel rog e bay i pow’iyem, machane bay bingiyal’ ni bayi taw ngay ni nggu gechignag e pi girdi’ ney ni bochan e denen ni kar ngongliyed.”
35Me pi’ SOMOL bmit e liliy nge yib ngak piyu Israel ni bochan e ra gel niged e thin ngak Aron nge ngongliy fare liyos ni bod ya’an ba pifak e garbaw nib gol.