1Mose, ni imbotmbot sala abal Sinai uteene ma molo. Tabe zin Israel timbot ma som, to timaŋga mi tila ki Aron, mi tiso pini. Tiso: “Aiss! To ta ikam ti ma tezem lele kizin Aikuptu mi tamar lele tiŋgi na, koroŋ sa ko ikami ma ilane kek. Kozo urpe lende merere pakan be tikam peeze piti.”
2Aron ileŋ to iso pizin. Iso: “Ambai. Kena kala ma koyogeege aigau milmilŋan ki kusiyom bizin mi lutuyom bizin ta tiurur la talŋan na, mi kakam ma kamar.”
3Tana wal ta boozomen tikinke aigau kizin pa talŋan ma isu lup, mi tiyogeege ma tilup la ki Aron.
4Tona ni iurpe ma iwe kembei ta makau ruŋguunu i. Zin Israel tire, to tiso: “Aa, buri! Iŋgi merere kiti tau ikam ti ma tezem Aikuptu mi tamar tiŋgi na.”
5Aron ire mbulu kizin tana to, iurpe patoronŋana muriini ta ila makau kereene uunu, mi isoyaara sua pizin ma isombe: “Gaaga na, aigule potomŋana be tapakur Yooba.”
6Timbot ma mankwoono, mbeŋbeŋŋana, to zin iwal biibi timaŋga mi tikam patoronŋana pakan. Mbili pakan, tineene ma imap kat. Mi pakan na, tilas ma tikan, bekena ziŋan Yooba tiparlup zin ma tiwe tamen. Tikanan ma tiwinin, to tisu na tikam naroogo mi tikam mbulu bozboozo.
7Tikamam, mi Yooba isu na iso pa Mose. Iso: “Ouo. Loŋa men mi sula ta buri! Pa wal ku, ta kam zin ma tizem Aikuptu mi timar na, tisaana kek. Karau men mi tipizil ndemen pa zaala ta aŋur pizin na. Iŋga tiurpe len makau ruŋguunu milmilŋana ta, mi tileklek kumbun pini mi tikamam patoronŋana pini. Mi tizzo ka sua ta kembei: ‘Aa, buri! Iŋgi merere kiti Israel ta ikam ti ma tezem Aikuptu na.’
9Wal tana, nio aŋkilaala zin kek. Zin zorzooroŋan kat.
10Tana iŋgi keteŋ malmal kat pizin, mi aŋsombe aŋkas zin ma timap. Mi nu kozo peteke yo pepe. Pa aŋsombe aŋkam nu niomŋan popoŋana ku men ma kepet ma kewe wal boozo kat mi wal zanŋan. Tana niom ta ko kekel zin ma kewe leŋ kat.”
11Tamen Mose itoombo be ipaluumu Yooba Anutu kini leleene. Isombe: “O Yooba, niwi swe mburom biibi, mi kam zin wal ku ma tizem Aikuptu. Tana ketem malmal pizin mi pasaana zin pepe.
12Kokena zin Aikuptu kan tininkao pu ma tiso: ‘Merere kizin Israel, ni itut kan. Tanata ikam zin ma tizem ti, mi tila lele abalabalŋana, bekena ikas zin su taŋga mi ipambiriizi zin ma timap kat pa toono.’ Tana kam ta kembena pepe. Koto ketem malmalŋana ku, mi tooro ŋgar ku. Pasaana wal ku pepe.
13“Pa motom iŋgal sua mbolŋana kat ta mbuk la kizin mbesooŋo ku Abaraam, Isak, mi Yakop na. Muŋgu nu so pizin ta kembei: Nu ko kam popoŋana kizin ma timasak ma tiwe munŋaana ka tieene kembei ta pitik saamba kana. Mi ko kam toono Kanaan ma imap iwe len, be timbotmbot pa ma alok.”
14Mose isuŋ mbolŋana ta kembei, tabe Yooba itooro ŋgar kini, mi ipasaana zin Israel som.
15To Mose ikam pat babaŋan ru ta Anutu ipun tutu kini ise na, mi itoori ma imiili mini be isula. Pat ru tina, bude imbot se keren mi ndemen. Mi Anutu itunu ta iurpe zin mi ipun tutu kini ise. Tutu tana be ipombol zin Israel ma matan iŋgal sua ta ziŋan Anutu timbuk na.
17Mose isula ki Yosua, to ikami mi ziru tisula. Tigarau lele ta iwal biibi timbotmbot pa na, to Yosua ileŋ la pa orooro biibi. Tabe iso pa Mose ma iso: “A iŋga ko malmal sa ta ipet a.”
18Tamen Mose iso: “E-e. Orooro tiŋga kembei zin malmal kan menmeen zin, som titaŋ na som. Iŋga timbombo len sorok.”
19Mose ipet kizin na, ire zin tirakrak su makau kereene uunu. Tabe keteene ibeleu kat, mi ipundu pat babaŋan ru tana isu toono ma timapalpaala.
20To ikam makau tana, mi igiibi sala you ma ikan, mi ikam ma ikotmumu, mana itiyaara sula yok mi iso pizin Israel be tiwin. Pa keteene malmal kat tau.
21Tona iso pa Aron. Iso: “Lak, zin wal ti tikam parei pu, ta leŋ la kalŋan mi we mataana pizin ma kakam sanaana biibi ti?”
22Aron iso: “Wai biibi, ketem malmal pio pepe. Nu itum ute: Wal ti, loŋa men mi keten izze pa sanaana be tikam.
23Zin tiso pio ta kembei. Tiso: ‘To ta ikam ti ma tezem Aikuptu mi tamar lele tiŋgi na, niam amkankaana pini. Koroŋ sa ko ikami ma ilane kek. Kozo urpe lende merere pakan be tikam peeze piti.’
24Zin tiso sua ta kembei, tana aŋso pizin ma aŋso: ‘Kena kala kakam aigau tiom milmilŋan ma kamar.’ Tana zin tila tiyo aigau kizin, mi tikam ma timar, tona aŋswiri sala you, mi molo som na, itoori ma iwe makau tiŋgi ma ipet.”
25Mose ire kembei Aron, ni ikam kat peeze pizin Israel som, tanata tikamam mbulu soroksorok bozboozo irao zitun lelen. Mi imoto: Kokena kan koi bizin timar ma tire zin, to tirepiili zin mi tikam ŋeu pizin.
26Tana imender la zaala kwoono, mi iboobo ma iso: “Keleŋ! Niom ta sombe ki Yooba na, kamar tio!” To zin wal ki Lebi timap ma tila kini.
27Mi Mose iso pizin. Iso: “Yooba ta Anutu kiti Israel na, iso ta kembei: ‘Kakam buza tiom, mi kapa pa lele, mi kaŋgal wal boozomen ta tilek kumbun pa koroŋ tana na, ma timetmeete lup. Mi sombe toŋmatiziŋ tiom sa, som toroyom sa, som zin wal ta timbot tigarau yom, na leleyom isaana pizin mi kopotom zin pepe. Kukuruumu zin men tau.”
28To zin wal ki Lebi tila ma tikam kembei ta Mose iso na. Aigule tana na, tikuruumu zin tomooto kembei munŋaana tel (3,000) pa buza ma timetmeete lup.
29Tana Mose iso pizin ma iso: “Niom wal ki Lebi, iŋgi koozi Yooba iur yom be kakam uraata kini. Pa niom keleŋ la kalŋaana, mi kopotom lutuyom bizin mi zin toŋmatiziŋ tiom som. Tana ta koozi mi ila na, kampeŋana kini ko imbotmbot se tiom.”
30Timbot ma aigule toro to, Mose iso pizin iwal biibi. Iso: “Keleŋ! Sanaana ta niom kakam na, ina biibi kat. Tamen iŋgi be aŋsala ki Yooba mini, be aŋsuŋ pini ten. Ko irao imuŋai yom mi ireege sanaana tiom, som som?”
31To isala ki Yooba mini, mi iso pini. Iso: “O Yooba, iwal biibi taŋga tikam sanaana ta biibi kat. Pa tiurpe len merere pakaamŋana.
32Tamen iŋgi aŋsuŋu be muŋai zin mi reege sanaana kizin. Mi so som, na aŋgo yo. Zoŋ ta imbot se ro ku ta beede na, mus ma ilane.”
33Yooba ipekel kwoono ma iso ta kembei. Iso: “Ina som. Tomtom ta sombe izooro yo ma ikam sanaana, na ni ta ko aŋmus zaana pa ro tio ma ilane.
34Tana miili ma sula kizin mini be kam zin mi niomŋan kala pa lele ta muŋgu aŋso yom pa na. Aŋela tio sa ko imuuŋgu piom be ikam peeze piom. Tamen kaimer, sombe ka nol ipet, tona aŋur kadoono pa sanaana kizin tana.”
35Tana kaimer Yooba iur mete sananŋana pizin ma ipokot mbulu kizin tau timaŋmaŋ Aron ma iurpe merere pakaamŋana pizin na.
