Sowel 3

1

2

3

¹Iwe, ewe Samol mi Lapalap a üra, “Lon ena fansoun, lupwen ngang üpwe aliwinisefäli chon Juta me chon Jerusalem,

²üpwe achufengeni chon ekewe mwü meinisin o emweniretiu lon ewe lemol ia epwe fis kapwüng ie. Ikenan üpwe apwüngüür pokiten ar föför mi ngau ngeni nei aramasen Israel. Pun ra atoropasafeiliir lein ekewe mwü o aineti fanüei lefiler.

³Ra pwal asisil won nei aramas iö epwe nöüniir amanau. Iwe, ra amömöla eman ät pwe epwe wor mön ar lisowu, ra pwal amömöla eman nengin pwe epwe wor mön ünümer wain.

⁴Ämi chon Tirus me chon Siton, pwäl ämi chon Filistia meinisin, met oua ekiekin föri ngeniei? Ifa usun, oua mochen liwini ngeniei mine üa föri ngenikemi? Are oua ekiekin föri ei, üpwe fokun müttir liwini ngenikemi liwinin ämi föför.

⁵Pun oua angei ai silifer me kolt o uweela wöüi mi chomong lon ämi kewe imwenfel.

⁶Oua amömöla ekewe chon Juta me chon Jerusalem ngeni ekewe chon Kris, pwe repwe toau seni fanüer.

⁷Iei üpwe aliwinireto seni ekewe leni ia oua amömörela ie, nge üpwe liwini ngenikemi usun mine oua föri ngeniir.

⁸Iwe, üpwe amömöla nöümi kewe mwän me fefin ngeni chon Juta, nge chon Juta repwe amömörela ngeni chon Sepa mi nom lon fanü toau. Ngang ewe Samol mi Lapalap üa kapas.

⁹Oupwe arongafeili ei pworaus lein chon ekewe mwü: Oupwe amolakemiitä ngeni maun, oupwe köri ekewe sounfiu mi pöchökül. Sounfiu meinisin repwe feito o chufengen.

¹⁰Oupwe awili ämi pisekin tu pwül ngeni ketilas, nge ämi woot oupwe awili ngeni siles. Pwal ekewe mi apwangapwang repwe apasa, ‘Ngang eman sounfiu.’

¹¹Oupwe müttir feito, ämi chon ekewe mwün ünükün Israel, oupwe chufengen lon ewe lemol.” Ai Samol mi Lapalap, kopwe tinato noum sounfiu pwe repwe maun ngeniir.

¹²“Chon ekewe mwün fanüfan repwe achufengeniir o feila lon ewe lemol ia epwe fis kapwüng ie. Pun ikenan Ngang ewe Samol mi Lapalap üpwe mot won lenien apwüng, pwe üpwe apwüngü chon ekewe mwü mi nom ünükün Israel.

¹³A fokun watte än chon ekewe mwü föföringau. Iei mine oupwe pöküretiu usun irän wiich lon fansoun räs. Oupwe puriretiu usun eman a puri föün wain, tori ewe lenien pupu a urela o niwu.”

¹⁴Chomong, chomong mwicheichen aramas ra chufengen lon ewe lemol ia epwe fis kapwüng ie. Iwe, a pwä me ikenan pwe ränin ewe Samol mi Lapalap a arapoto.

¹⁵Iwe, akkar me maram repwe rochola, nge ekewe fü resap chüen tin.

¹⁶Iwe, ewe Samol mi Lapalap a leüömong le kökkö seni Sion, mwelian a towu seni Jerusalem, iwe, läng me fanüfan ra chechech ren. Nge ewe Samol mi Lapalap epwe eu lenien op fän iten nöün aramas, pwal eu imwen maun mi pöchökül fän iten chon Israel.

¹⁷“Mürin, ämi chon Israel, oupwe silei pwe Ngang ewe Samol mi Lapalap ämi we Kot. Üa imweimw lon Sion won chuki mi pin. Iwe, Jerusalem epwe eu leni mi pin, nge chon ekis resap chüen maun ngeni o liapeni.

¹⁸Lon ena fansoun ekewe chuk repwe kula ren tanipin wain, nge chomong kow repwe nom won ekewe chukutekison. Iwe, ekewe öüwön Juta repwe ur ren koluk, nge eu puächen koluk epwe puwu seni imwen ewe Samol mi Lapalap, pwe epwe achöchönü ewe lemolun Akasia.

¹⁹Iwe, Isip epwe tala, nge Etom epwe wiliti eu fanüapö pokiten ar föförün mwänewüs ngeni chon Juta, pun ra niela aramas esap wor ar tipis me lon ewe fanü.

²⁰Iwe, üpwe ngeniir chappen ar niela nei aramas, nge üsap amusala ar tipis. Nge Juta me Jerusalem repwe so feilfeilachök seni eu täppin aramas tori eu täppin. Nge Ngang ewe Samol mi Lapalap üpwe imweimw lon Sion.”