1Iwe, a wor eman fefinen Apsalom nöün Tafit we mwän itan Tamar, a fokun liöch. A fis pwe Amnon, pwal eman nöün Tafit mwän, a sani neminei.
2Amnon a fokun riaföü, pwe a samau pokiten Tamar fefinan we. Pun Tamar eman föpwül esamwo tori mwän, iei popun Amnon a ekieki pwe esap fokun tufich an epwe ingeni.
3Nge a wor eman chienen Amnon itan Jonatap nöün Simea mwän, nge Simea pwin Tafit. Iwe, Jonatap eman mi fokun tipachemsolä.
4Jonatap a üreni Amnon, “En nöün king, pwota ka fokun aiengau iteiten rän? Kose mochen üreniei met popun.” Amnon a üreni, “Üa sani Tamar fefinen Apsalom pwii we.”
5Iwe, Jonatap a üreni, “Kopwe konola won om peet o tipin asamauwuk. Nge lupwen semom we epwe feito pwe epwe äämwok, kopwe üreni, ‘Kopwe mwüt ngeni fefinei Tamar pwe epwe feito o ngeniei enei mongö. Epwe amolätä enei me fän mesei pwe üpwe küna, mürin epwe püsin ngeniei pwe üpwe mongö.’”
6Iei mine Amnon a konola o tipin asamauwu. Nge lupwen ewe king a feito pwe epwe äämwa, Amnon a üreni, “Kose mochen mwüt ngeni fefinei Tamar epwe feito pwe epwe föri ruachö nokop me fän mesei, mürin epwe püsin ngeniei pwe üpwe mongö.”
7Mürin, Tafit a titi Tamar me lon imwan o üreni, “Kopwe feila lon imwen Amnon mongeom we o amola ngeni anan mongö.”
8Iei mine Tamar a feila lon imwen Amnon mongean we ewe ia a konola ie. Iwe, a angei pilawa o aüwa, a pwal föri nokop me fän mesan o furaineer.
9Mürin a angei ewe furaipan o alopwätiu masouan pwe Amnon epwe mongö, nge Amnon esap mochen mongö. Iwe, a apasa, “Ämi meinisin oupwe towu seniei.” Iei mine ra towu seni.
10Mürin, Amnon a üreni Tamar, “Kopwe uwato enei lon ewe rumwen annut o püsin ngeniei pwe üpwe mongö.” Iwe, Tamar a angei förian kewe nokop o uweerelong ren Amnon mongean we lon ewe rumwen annut.
11Nge lupwen a ngeni ekewe mongö pwe epwe mongö, Amnon a turufi neminewe o üreni, “Etto, üpwe kon reöm.”
12Nge Tamar a pälüeni, “Apwi, mongeei, kosap arianiei, pun ei sokun föför esap öch an epwe fis lon Israel. Kosap föri ngeniei ei sokun föför mi anioput.
13Iwe, ia ngang üpwe feila ie fän ai säw? Nge en kopwe eman aramas mi anioput me lon Israel. Iei mine üa tüngor ngonuk, kopwe kapas ngeni ewe king, pun üa lükü pwe epwe mwüt ngonuk pwe sipwe pwüpwülü.”
14Nge Amnon esap mochen aüselinga alon Tamar. Iwe, pokiten a pöchökül seni neminewe, a achomanauei o kon ren.
15Mürin, Amnon a fokun oputangaua Tamar, pwe an oput i a lap seni an sani me mwan. Iwe, Amnon a üreni neminewe, “Kopwe ütä o süla.”
16Nge Tamar a üreni, “Apwi, mongeei, pun om tinieila a kon lap ngauan seni ewe föför ka föri ngeniei.” Nge Amnon esap mochen aüselinga neminewe.
17A köri ewe alüal mi wisen tütümwünü o üreni, “Kopwe asüela ei fefin seni fän mesei o lokunala ewe asam.”
18Mürin, nöün Amnon we chon angang a asüela neminewe o lokunala ewe asam. Iwe, Tamar a üföüf echö üf mi lingöch, pun ei sokun üf nöün king föpwül esamwo toriir mwän ra üföüf me lom.
19Iwe, Tamar a tukotuketä falangen ekkei won möküran o kamwei üfan mi lingöch, a pwal pwölüela mesan ren pöün o feila nge kechü fän leüömong.
20Lupwen Apsalom mongean we a küna Tamar, a aisini, “Ifa usun, Amnon mongeom we a föri och föför mi ngau ngonuk? Kosap üreni eman och, fefinei, kosap ekieki usun lon lelukom, pun i mongeom.” Iwe, Tamar a nonom lon imwen Apsalom mongean we lon an letipeta me akaleman.
21Iwe, lupwen ewe king Tafit a rong ekei pworaus meinisin, a fokun song.
22Nge Apsalom esap apasa och fos mi öch ika mi ngau ngeni Amnon, pun a oput Amnon pokiten a achomanauei Tamar fefinan we.
23Mürin ruu ier nöün Apsalom kewe chon fichi ülöülen sip ra fichi ülöülen nöün sip lon Paal-hasor küküngeni Efraim. Iwe, Apsalom a körato nöün ewe king kewe mwän meinisin.
24Apsalom a pwal feito ren ewe king o üra, “Lon ei otun ra fichi ülöülen nei sip. Üa tüngor ngonuk pwe en ai king me noum kewe nöüwis oupwe feito o eti ai ei kametip.”
25Nge ewe king a üreni Apsalom, “Apwi, nei, äm aisap feila meinisin, pwe aisap aweiresuk.” Iwe, Apsalom a pesei Tafit, nge esap feila, pwe a chök afeiöchü.
26Mürin, Apsalom a üra, “Are kose mochen feila, üa tüngor ngonuk kopwe mwüt ngeni Amnon pwii we pwe epwe etikem.” Nge ewe king a aisini, “Pwota epwe etuk?”
27Nge Apsalom a chök pesei Tafit tori a mwüt ngeni pwe Amnon me pwiin kewe meinisin repwe eti.
28Mürin, Apsalom a allük ngeni nöün kewe chon angang, “Oupwe mamasa. Lupwen Amnon epwe pwapwa ren an ün wain, üpwe ürenikemi pwe oupwe awata o niela. Ousap niuokus. Pun ifa usun, sap ngang üa allük ngenikemi? Oupwe tipepwora o tipen mwän.”
29Iei mine nöün Apsalom kewe chon angang ra niela Amnon, usun Apsalom a allük ngeniir. Mürin, nöün ewe king kewe mwän meinisin ra ütä, ra tötä won en me nöün aas o süla.
30Nge lupwen ra chüen nom won al, ewe pworaus a tori Tafit, “Apsalom a niela noum kewe mwän meinisin, sap eman me leir a chüen manau.”
31Mürin, ewe king a ütä, a kamwei üfan o konola lepwül. Iwe, nöün chon angang meinisin mi nom ünükün ra pwal kamwei üfer.
32Nge Jonatap nöün Simea we mwän, nge Simea pwin Tafit a üra, “Ai samol, kosap ekieki pwe ra niela noum kewe mwän meinisin, nge Amnon chök a mäla. Pun seni ewe fansoun Amnon a achomanauei fefinan Tamar, won mesen Apsalom a fen pwärätä an ekiekin niela pwin we.
33Iei mine, ai samol me ai king, kosap ekieki ei pworaus lon lelukom pwe noum kewe mwän meinisin ra mäla, pwe i Amnon chök a mäla.”
34Lon chök ei otun Apsalom a süla. Iwe, ewe alüal mi mamas a netä o küna pwe chomong aramas ra feito seni ewe alen Horonaim lepekin ewe chuk. Iwe, ewe chon mamas a feila o asile ngeni ewe king ei pworaus.
35Mürin, Jonatap a üreni ewe king, “Nengeni, noum kewe mwän ra feito. Usun mine ngang noum chon angang üa apasa, iei usun a fis.”
36Iwe, lon ewe chök otun Jonatap a wes le kapas, nöün ewe king kewe mwän ra feito, ra puchörütä o kechü, nge ewe king pwal nöün kewe nöüwis meinisin ra fokun kechüangau.
37Nge Apsalom a sü o feila ren Talmai nöün Amihut we mwän ewe kingen Kesur. Iwe, Tafit a kechüeiti Amnon nöün we mwän iteiten rän.
38Apsalom a nom Kesur lon ükükün ülüngat ier.
39Nge lupwen ewe king Tafit a chipela mürin än Amnon mäla, a fokun positi Apsalom.
