1Me yan l’agruw e rran me taw David nge salthaw rok nga Ziklag. Ma pi Amalekite e karbad ra maelgad nga ley ni yimuch yu Judah ma kar chamgad nga Ziklag. Kar urfiyed fare binaw nga but’
2ma kar feked urngin e ppin; ma dar li’ed be’ nge yim’, machane kar feked gubin e girdi’ ke un ngorad karanod.
3Nap’an ni taw David nge pi salthaw rok, mar pir’eged ni kan urfiy fare binaw nga but’ ma kan fek pi le’engirad, pi fakrad ni pumo’on nge ppin kan yan.
4Me tabab David nge pi salthaw rok ko meyor nge taw ko ngiyal’ nike thay parowrad ko meyor.
5Mus ko fa gali ppin rok David ni aram Ahinoam nge Abigail ma kan fekrow.
6Kari magawon David e ngiyal’nem, ni bochan e gubin e pi salthaw rok ma kari buch laniyan’rad ngak pifakrad ni kanfek, ere kar weliyed ni ngar malang niged David; machane SOMOL ni Got rok e pi e athamgil nga laniyan’.
7Me ga’ar David ngak Abiathar ni prist ni be’ ni pumo’on ni fak Ahimelek, “Mu fek fare efod i yib ngog,” me fek Abiathar i yib ngak.
8Me fith David SOMOL, “Rayag ni nggu lek daken e pi’in karbad ngaray ko mael? Mog, rayag ni gu kolrad?” Me fulweg SOMOL ni ga’ar, “Mu lek dakenrad; ya ga ra kolrad ngam ayweg e pi’in kan fekrad.”
9Ma aram me yan David nge fa n’el mir’ay i salthaw rok, ma nap’an nra tawgad ko l’ul ni Besor, me par bochi yad u rom.
10Miki ul ul David ko milekag rok ni yad aningeg mir’ay i salthaw rok; fa l’agruw mir’ay e salthaw rok e kay gi gel e magaer rorad ni ngku ra tha’bed fachipa’ i lul’, ma aram miyad par u ba’nem e lul’.
11Me pir’eg fapi salthaw ni yad David bochi pagel nu Egypt u wuru’ e binaw miyad fek i yib ngak David. Miyad pi’ boch e ggan nge ran ngak,
12boch e fig nib fengfeng, nge l’agruw punug i grape ni kan gelk’ad ke mlik’. Me abich nge mu’ me sul gelngin; ya de kay fa unum ban’en nike polo’ e dalip e rran riy.
13Me fith David fachi pagel ni ga’ar, “Mini’ e en ni masta rom, ma ga be’ nu uw?” Me fulweg ni ga’ar, “Gag be’ nu Egypt, ni tapigpig rok be’ ko Amalek. Dalip e rran nike digeyeg e masta rog u roy ni bochan e gu m’ar.
14Kug maelgad ko fa gin ni tafen e pi Kerethite u ley ni yimuch yu Judah nge fa gin tafen fare ke girdi’ rok Kaleb, ma kug urfiyed nga but’ fare binaw nu Ziklag.”
15Me fith David ngak ni ga’ar, “Mog, rayag ni ngam pow’iyeg i yan ko pi girdi’en e cham nem?” Me fulweg ni ga’ar, “Gu ra rin’ ni fa’an ga ra micheg ngog u fithingan Got ndab mu li’eg nggum’ ara mu pi’eg ngak e masta rog.”
16Me pow’iy David i yan ngorad. Fapi tacham e yug ra bagyad ma gin bay riy ko re gin’em, ni yad be abich, ma yibe unum, ma yibe madnom ni bochan urngin e tin kar koled u Filistia ngu Judah u fithik’ e mael.
17Me yan i reb e rran riy ni be pufewoch me cham David ngorad nge yan i blayal. Aningeg mir’ay e pi Amalekite e ra milgad u daken e kamel, kemus e pi’in nra thaygad ngranod.
18Me fek David gubin e girdi’ nge urngin ban’en ni leag e pi Amalekite, nib mu’un fa gali ppin rok ngay;
19gubin ni fek dariy ban’en nni fek nde yag ni sulweg. Miki fulweg David urngin e pi pumo’on nge ppin ni pifak fapi salthaw rok, nge urngin ban’en ni leag e pi Amalekite.
20Miki fulweg urngin e yu ran’ i saf nge garbaw; me yan fapi salthaw rok ni yad be gafaliy fapi gamanman ni gubin ni bay nga m’on; me ga’ar e girdi’, “Pin’ey e bmilfan ngak David!”
21Ma aram me sul David ngak fa l’agruw mir’ay i salthaw rok nra pired ko fare pa’ i lul ni Besor ni bochan e dakuriy gelngirad ni ngkur uned ngak. Marbad i yib ni ngar mada’gad David nge pi salthaw nra uned ngak, me yan David i yan ngorad nge yan i nang salperad.
22Machane boch e pi salthaw nra uned ngak David e ri yad ba kireb, me lungurad, “Dar uned ngodad, ere dab da pi’ed boch ngorad e pin’en ni kad feked ko mael. Rayag ni ngar feked pi le’engirad nge pifakrad mranod ngar chuwgad.”
23Machane me fulweg David ni ga’ar, “Pi walageg, dabiyag ni ngam rin’ed ni errogon ko tin ke pi’ SOMOL ngodad! Ke taydad nde buch ban’en rodad me ir e ke gagiyegnag kad gelgad ngak fapi cha’ ni ud maelgad ngorad.
24Dariy be’ nrayag ni nge fel’ u wan’ e tin kamogned! Gubin e girdi’ ma yira pi’ e f’oth rorad ni ta’reb rogon: en ni par u wuryal nge matanagiy e chugom e ta’reb rogon e f’oth rok ko en ni yan ko mael.”
25Me tay David e ren’ey nib motochiyel, ma aram me par ni ban’en nma rin’ yu Israel.
26Ma nap’an ni sul David nga Ziklag, me pi’ boch fa pin’em ni kan fek ko mael ngak e pi fager rok, nge pi tayugang’ nu Judah, ni ba’aray e thin nib cheg ngay, “Ba’aray ba tow’ath ni fanmed nike yib ko pin’en ni kug feked rok e pi to’ogor rok SOMOL.”
27Me pi’ fapi tow’ath nge yan ngak e pi girdi’ nu Bethel, nge girdi’ nu Ramah u ley ni yimuch yu Judah, nge ngak e girdi’ nu lan fa yuchi binaw nu Jattir,
28ngu Aroer, ngu Sifmoth, ngu Eshtemoa,
29ngu Rakal; nge ngak fare ke girdi’ rok Jerahmeel, nge ngak e pi Kenite,
30nge ngak e pi girdi’ u lan e pi yuchi binaw nu Hormah, ngu Borashan, ngu Athak,
31ngu Hebron. I pi’ e pin’ey nga urngin yang ni ur ranod e salthaw rok riy.
