1मिनु लेम्मा आ नित्थ नाक्ती सिकलाग जाक्दीम्मा बाक्त। मेना अमालेकीपुकीमी नेगेब रोइक्ने थुम्शा, सिकलागम लडाइ तोशा मी सुइश्शो बाक्मा बाक्त। १सामुएल २७:६
2मेकोपुकीम मीश मुर, आइक्च नु ठेयब मुर नेल्ल आन कली मसाइक्थु सेसीन लाइश्शो बाक्मा बाक्त। मेकोपुकीमी मेको आन कली ङोंइङोंइती गाक्पाइश्शा लाइक्ना लाइक्न बाक्मा बाक्त।
3दाऊद नु आ मुरपुकी मेकेर जाक्दीम्मानु, सहर कली मीम क्रोइश्शो नु मेको आन मीश नु तमी तौ नेल्ल आन कली योल्शो तुइक्तमे बाक्त।
4मिनु दाऊद नु मेको नु बाक्शो मुरपुकी ङाक्ने मचाप्थ्री ङाक्मा बाक्त।
5दाऊद आ मीश निम्फा येज्रेल ङा अहीनोआम नु कारमेल ङा बेक्शो नाबाल आ मीश अबीगेल निम्फा ग्याइश्शा लाइक्चा पुंइसीसा बाक्त। १सामुएल २५:४२-४३
6दाऊद कली हिंचा ङा दुम्शो बाक्त। मारदे हना मुरपुकीम मेको आन तमी तौ नेल्ल योल्ने थुम्तीके, दाऊद कली फुल्लु आप्शा साइक्नीकी देंशो बाक्मा बाक्त। तन्न दाऊदमी परमप्रभु यावे, आ परमप्रभु कली सक्ति पुना बाक्त।
7मिनु दाऊदमी अहीमेलेक आ तौ चढ़ेब अबीयाथार कली “निसाफ पतीक ऊरीम नु थुम्मीम बाक्शो एफोद चाक्को” दे मदा बाक्त। मिनु चाक्गा बाक्त। १सामुएल २३:९
8मिनु दाऊदमी परमप्रभु यावे कली “मार, गो मेको रोइक्ब आन कली खेदा पङा? गो मेको आन कली थिन्ने चाप्नुङा?” देंमाक्त। मिनु “मेको आन कली खेदा पावो। थमा पा, गे मेको आन कली थिश्शा, नेल्ल आन कली प्रोंइने चाप्नेवे” देंशो नेना बाक्त।
9मिनु दाऊद नु मेको आ ६ सहे मुर गाक्मा बाक्त। मिनु बेसोर ङा खोल्सा सम्म जाक्दीम्मा बाक्त। मेकेर दशा गाक्ने मचाप्बपुकी बाक्मा बाक्त।
10मिनु मेको आन दाते ङा सहे निक्शी मुर थाम्पा दशा, बेसोर खोल्सा शोक्ने मचाप्शो बाक्मा बाक्त। मिनु मेकोपुकी मेकेर बाक्मा बाक्त। दाऊद चहिं ४ सहे मुर लाइश्शा खेदा पचा कली लमाक्त।
11मोपा गाक्ना गाक्न लमानु, मेकोपुकीमी इजीप्त ङा मुर का थित्मे बाक्त। मिनु मेको कली दाऊद आ बाक्तीक चाक्गमे बाक्त। मिनु मेको कली जचा तूचा गेमे बाक्त। मिनु मेकोमी जवा तूङा बाक्त।
12मेको कली डल्ला का फोव़शी गेडा नु डल्ला निक्शी सोक्शो अङगुर यो गेमे बाक्त। मिनु मेको नेक्गा नोले मेको आ सोक्त पिमाक्त। मारदे हना मेकोम नाक्त सां नु नाक्दो सां सम्म मारेइ मजशो बाक्माक्त।
13मिनु दाऊदम मेको कली “गे ते रे जाक्शो नवे। सु आ मुर नवे?” दे हिल्लो पवा बाक्त। मिनु मेकोमी “गो इजीप्त ङा ठिटा का नङ। अमालेकी का आ वाइल नङ। तन्न गो नाक्त सां ङोंइती रे रोइ पतीके आं होव़पम आं कली प्रोंइशा गाक्त।
14गो यहूदा रागी ङा केरेथी आन नेगेब ङा मारेइ मारेइ नु कालेब आ नेगेब तेइ तेइ रोइक्ताक्क। मिनु सिकलाग सहरम मी सुइक्ताक्क” देंमाक्त। २सामुएल ८:१८; यहोसु १४:१३
15मिनु दाऊदमी “गे आंइ कली लां कोंइशा मेको आन बाक्तीके चाक्दीन्ने चाप्नेवे?” देंमाक्त। मिनु मेकोमी “गे परमप्रभु आ ङोंइती ‘आं कली मसाइक्नीकी नु आं होव़प आ गुइम जिम्मा मगेनीकी’ दे कसम जने। मिनु गो लां कोंइशा मेको आन बाक्तीक चाक्दीत्नुङ” देंमाक्त।
16मिनु मेकोम लां कोंइना कोंइन मेको आन कली उइ चाक्दीदा बाक्त। मेकेर अमालेकी एर ओंथ ब्रशा जशा तूशा सिल पा, आन रोइश्शो मार मार पुक्शा ग्येरशा बाक्शो बाक्मा बाक्त। मारदे हना मेकोपुकीम पलिस्ती नु यहूदा रे शुश मार मार रोइश्शो बाक्मा बाक्त।
17मिनु दाऊदम मेको आन कली सुनी रे आ दीसा नाक्दो सम्म नेल्ल साइक्मी बाक्त। ४ सहे ठिटा मुर ला दलओंठ ङोइश्शा प्रोक्मा बाक्त।
18दाऊदमी अमालेकी आन रोइश्शो नेल्ल लेंशा थिदा बाक्त। मेको आ मीश निम्फा आस कली यो थिदा बाक्त।
19मेको आन के मारेइ यो मजाम्माक्त। आन खिं ङा आइक्ची ठेयब, तमी तौ रोइश्शा लाइश्शो नेल्ल थोव़क थित्मे बाक्त। मोपा दाऊदमी मारेइ मारेइ प्रोना बाक्त।
20दाऊद नु आ मुरपुकीम मेकोपुकीम ङोंइती रोइश्शो क्यारश भेडा, बी ब्यफ नेल्ल आन कली लदमे बाक्त। मिनु “एको नेल्ल दाऊद के बाक्ब” देंमा बाक्त।
21नोले दाऊदम बेसोर ङा खोल्साम नाइश्शा बाक्शो सहे निक्शी मुर आन बाक्तीक जाक्माक्त। मेकोपुकी दाऊद कली नु मेको आ मुर आन कली ग्रुम्थ जाक्मा बाक्त। मिनु दाऊदम मेको नेल्ल आन कली “मार दुम्मे? दोपा बाक्नी” दे हिल्लो पवा बाक्त।
22तन्न दाऊद नु लाइब का निक्शी शोर गाक्शो मुरपुकीम मेको आ लोव़ ख्रोइश्शा दाऊद कली “एको मुरपुकी गो नु मलम। गोपुकीम लशा रोइश्शा चाक्शो मार मार गो मेको आन कली योक्शा मगेनीकी। मेकोपुकीम आन मीश नु आन आलपुकी ला लदमेक्ल” देंमा बाक्त।
23मिनु दाऊदमी मेको आन कली “परमप्रभु यावेम इं कली प्रोंइतु। एको नेल्ल गेप्तु। इं जोरी सत्रु आन कली इं गुइमी गेप्तु।
24सुम इन देंशो लोव़ बिप्बा? खाल पाइब नु लडाइम लाइब नेल्लेम उइक्थ उइक्थ ताइनीम” देंमाक्त। गन्ती ३१:२४
25मिनु दाऊदमी इस्राएलम मेको फुल्लुम मुशा ब्रेक्शो खोदेंशो पा नु निसाफ पतीक लोव़ पवा बाक्त। मेको मेना रे मुल सम्म लीशो बाक्ब।
26मिनु दाऊद सिकलागम जाक्शा, रोइश्शो मार मार रे यहूदा ङा आ वारच खाल्पा आन कली “परमप्रभु यावे आ जोरी सत्रु रे रोइश्शो मार मार एको इन कली कोसेली बाक्ब” देंशा, सोइक्ता बाक्त।
27मेकोमी सु सु आन कली कोसेली सोइक्ता बाक्त देंशा हना, बेथेल सहर, नेगेब ङा रामोथ सहर, यत्तीर, सहर
28आरोएर सहर, सिफ्मोथ सहर, एश्तेमोआ सहर,
29राकाल सहर, येराहमेल आ मुर आन सहरम बाक्ब आन कली, केनी आन सहरम बाक्ब आन कली, १सामुएल २७:१०
30होरमा सहर, बोर-अशान सहर, अथाक सहर
31हेब्रोन सहरम बाक्ब नेल्ल आन कली नु दाऊद नु आ मुर गाक्शो सहर गाउं नेल्ल आन कली कोसेली सोइक्तीमी बाक्त। ङोंइती मेकेर दाऊद नु आ मुरपुकीम मार मार पामे बाक्त।
