1Miiyi mii ka ’the gom aha/ mo ma, ayy Arumgimis, haali/ ’kwani yap̱ki aha/ ki sho’k mo. Yula tente/ mo ’kwani kun ta ’kup̱ ki aha/ uni siri’cki aha/ ap̱o/ ki sho’k mo.
2Uni gun ta ’kup̱ ki aha/ mo tani uni yap̱ki aha/ ki sho’k mo yula tente/ mo, haali/ ’kwani tana ris kun askina p̱o/ aha/ ki ’ba/ gun dhuna uni ki ca mo.
3Ki aha/ ḵo/kina is mo tani aha/ karkina moŋgam gwo is pem e /e mo be.
4Eya Arumgimis mo, a’di jin maŋka/ gwom piti mo, eya Arumgimis mo tani aha/ gama gwo is ki dar gi moŋḵo/ is mo. Buŋgwar is midi miiya tinta ki aha/ mo?
5Yula tente/ mo tani uni simmki mii e mo mmotaḵ aha/ jama/ gom tom pem jin raḵki aha/ mo. Aris gwom buni ’baar mo kun kulumkina uni ibwa ap̱o/ aha/ mo tani uni ta thus ki thus mo.
6Uni ’tuntulki is buni imonṯal ’de/ mo, dhali uni wup̱kina ’cesh mo. Uni c̱orki ŋaṯgin pem mo. Me’d jin c̱orkina uni mondiki/em pem mo,
7wakan raḵi uni to ibway mo gom tonthus buni mo kun miikina uni mo, ka nyor pini mo tani Arumgimisa, ṯaki ’kwani gwan ka ’cesh mo, ayy.
8/E deŋki yam pem jin wuŋkulkika/ e mo. Ṯe’di jabu’th em pem eya gasaas pini mo. ’Kona uni ki ’ko eya warkam pini mowa?
9Dhali yan’ko’d mo tani uni kun ta ’kup̱ ki aha/ mo tani minu ṯu’k ka nyaŋ’ko’d mo ka tee jin miga/ yuḵa yuḵ mo. Dhali aha/ misha ka jiŋ gana/ ka Arumgimis ta a’di gom aha/ mo be.
10Eya Arumgimis mo, a’di jin maŋka/ gwom piti mo, e Tap̱a, a’di jin maŋka/ gwom piti mo,
11Eya Arumgimis mo tani aha/ gama gwo is ki dar gi moŋḵo/ is mo. Ton tinta a’di imina ’kwani mii gom aha/ mo?
12Gwom pem kun oka/ is e /e mo tani aha/ mina thim uni mo, ayy Arumgimis. Aha/ mina c̱i mo jin ’boruwa ’bor bwa i is ki to jin c̱inu mmo’ciṯẖ ’kus gom /e mo.
13Haali/ /e ’cuḵkina ḵashiram pem mo ’peni mowu mo, nye, sho’k pem ’tasha /e ’twa/ ’peni mombiṯ mo, ki aha/ mina ya ibwambor ma Arumgimis mo, e moŋkush gi mondiki/e mo.
