1Nelía cuali para timitzhueyichihuase, TOTECO, ta nopa Dios Catli Más tiHueyi. Cuali ma timitzpaquilismacaca ica huicatl.
2Ica ijnaloc ma titepohuilica motlaicnelilis pampa hueyi moyolo, huan ica tlapoyahui ma tipaquica miyac pampa nelía titemachtli.
3Ma tihuicaca huan ma titlatzotzonaca ica nopa tlatzotzonali catli itoca arpa, guitarra huan lira.
4NoTeco Dios, ta nelía techchihuilijtoc miyac tlamantli catli cuali, huan techchijtoc ma nipaqui. Yeca nihuica ica miyac paquilistli.
5¡TOTECO, ta tijchihua huejhueyi tiochicahual nextili! ¡Huan motlalnamiquilis amo aqui hueli quimachilía!
6Nopa masehualme catli huihuitique amo quimatij niyon amo quimachilíaj.
7Masehualme catli fiero ininnemilis motlananaj huan mohueyichihuaj ica tlamantli catli amo cuali, pero amo quimatij para teipa quintzontlamiltise huan ayacmo quema motlananase.
8Pero ta tiTOTECO, mitzhueyitlalijtose para nochipa pampa ta tiDios Catli Más Hueyi.
9Xiquita nica itztoque mocualancaitacahua pero nojquiya nica tiquintzontlamis. Quena, TOTECO, nochi masehualme catli quichihuaj catli amo cuali, ta tiquinsemanas.
10Pero techmacas na chicahualistli quen se toro catli nemi cuatitla. Huan sempa techaltis ica moaceite catli temaca yancuic chicahualistli.
11Niquitas quenicatza tiquintzontlamis nocualancaitacahua. Huan nijcaquis quenicatza quintzontlamise nopa tlaixpanoca tlacame catli motlanantoque ica na.
12Pero catli itztoque xitlahuaque iixpa Toteco quipiyase chicahualistli. Inijuanti yejyectzitzi quen ixochiyo apachi cuahuitl. Mohueyichihuase quen nopa tiocuame catli onca ipan tlali Líbano.
13Masehualme catli cuajcualme quipiyase chicahualistli quen cuame catli quintoctoque ipan ichaj TOTECO, huan Toteco Dios yaya quinmocuitlahuis.
14Huan quema nopa cuajcualme huehuejtiyase, noja quipiyase fuerza. Itztose quen cuame catli temacase inintlajca, huan nochipa xoxohuixtose.
15Huan ya nopa quinextis para TOTECO catli nechmocuitlahuía quichihua catli melahuac. Nochipa yaya xitlahuac tetlajtolsencahua.
