1¡Tlahuel hueyi TOTECO! Quena, quinamiqui para tijpaquilismacase Toteco Dios catli itztoc ipan ialtepe huan ipan itepe catli tlatzejtzeloltic.
2Nelía yejyectzi nopa tepetl Sion huan ijcatoc tlahuejcapa ipan nopa altepetl. Nopona mosehuía Jerusalén, ialtepe Toteco Dios, nopa hueyi tlanahuatijquetl.
3Toteco Dios iseltzi itztoc ipan nopa huejcapantic cali campa monequi moquetzas catli tlachixtoc para quimanahuis altepetl Jerusalén. Tenextilijtoc para yaya catli quimanahuía huan quimocuitlahuía.
4Tlanahuatiani tlen campa hueli itztoque ipan ni tlaltipactli mosentilijque para san sejco quihuilanase nopa altepetl.
5Pero quema quiitaj ajqueya quimocuitlahuía nopa altepetl huan para nelía hueyi ichicahualis, momajmatíaj. Huan nimantzi cholojtehuaj huan mocuepaj campa hualajtoque.
6Quena, quinitzquía se majmajtli huan nelía tlaijiyohuíaj, quen se sihuatl quema conepiya,
7o quen se ajacatl chicahuac catli quinsosolohua nopa huejhueyi barcos catli hualahuij tlali Tarsis.
8Ipa tijcactoque quenicatza TOTECO quimocuitlahuía ialtepe, huan ama tiquitztoque. Quena, nopona itztoc TOTECO Catli Quinyacana Itequihuajcahua Ma Tlahuilanatij. Quitlalijtoc para ialtepe Jerusalén ma huejcahuas para nochipa.
9Toteco Dios, quema tiitztoque ipan motiopa, tiquelnamiquij huan timonejnehuilíaj quenicatza techicnelía.
10Toteco, campa hueli masehualme mitzpaquilismacaj, pampa quicactoque quenicatza mohueyitilis. Quicactoque hasta campa ontlami tlaltipactli. Huan quimatij para ica mohueyi chicahualis titetlajtolsencahua xitlahuac.
11Huajca ma paquica nopa masehualme ipan tepetl Sion. Ma huitonica ica paquilistli nochi catli ehuaj ipan altepeme tlen tlali Judá pampa cuali huan xitlahuac titetlajtolsencahua.
12Nochi amojuanti catli animasehualhua Toteco Dios, xiyaca xijyahualotij nopa altepetl Jerusalén, huan xijpohuaca quesqui tepancali huejhueyi quipiya campa soldados tlamocuitlahuíaj.
13Xijtlachilitij nopa hueyi ichaj nopa tlanahuatijquetl, huan ximomacaca cuenta quenicatza tlatzajtzactoque huan quiyectlalijtoque, para quej nopa huelis anquinpohuilijtiyase amoteipan ixhuihua.
14Pampa ni Toteco Dios, yaya elis toDios para nochipa, huan amo quema tlamis ichicahualis. Yaya techyacanas mojmostla hasta más nepa quema ya timictose.
