1¡TOTECO, amo techhueyitlali tojuanti! ¡Ximohueyitlali ta! Xijchihua para nochi ma mitzpaquilismacaca pampa ta tlahuel titetlasojtla huan tijchihua catli nelía melahuac.
2Amo xiquincahuili para nopa masehualme ipan sequinoc tlalme ma quiijtoca: “¿Canque itztoc ininDios?”
3Ta toTeco Dios, tiitztoc nepa ilhuicac, huan nochi catli tijnequi tijchihuas, ta tijchihua.
4Pero nopa masehualme quinitaj quen inintecohua nopa teteyome catli quinchijchijtoque ica oro huan plata.
5Quipiyaj inincamac, pero amo camanaltij. Quipiyaj iniixteyolhua, pero amo tlachiyaj.
6Quipiyaj ininnacas, pero amo tlacaquij. Quipiyaj ininyacatzol, pero amo tlaijiyotilanaj.
7Quipiyaj ininmax, pero amo hueli quiitzquíaj niyon se tlamantli. Quipiyaj ininmetz, pero amo nejnemij. Amo huelij camanaltij.
8Huan nochi masehualme catli quinchijchijtoque nopa totiotzitzi nelía huihuitique quen nopa teteyome, huan nojquiya san se huihuitique catli quinhueyichihuaj.
9¡Anisraelitame, ximotemachica ipan TOTECO, pampa san yaya anmechpalehuía huan anmechmanahuía tlen nochi tlamantli catli amo cuali!
10Antotajtzitzi catli aniixhuihua Aarón huan aniaxcahua TOTECO, ximotemachica ipan ya, pampa san yaya anmechpalehuía huan anmechmanahuía tlen nochi tlamantli catli amo cuali.
11Nochi amojuanti catli anquiimacasij huan anquitlepanitaj TOTECO ximotemachica ipan ya, pampa san yaya anmechpalehuía huan anmechmanahuía tlen nochi tlamantli catli amo cuali.
12TOTECO tlatoctzitzi techelnamiqui huan yeca temachtli techtiochihuas. Techtiochihuas tiiisraelita masehualhua. Quintiochihuas nopa totajtzitzi catli iixhuihua Aarón.
13Quena, Toteco quintiochihuas nochi catli quiimacasij huan quitlepanitaj. Quintiochihuas catli huejhueyi huan catli tziquitetzitzi.
14Tlahuel miyac TOTECO ma anmechtiochihuas amojuanti huan amoconehua.
15Quena, TOTECO catli quichijqui ilhuicactli huan tlaltipactli, yaya catli anmechtiochihuas.
16Nochi ilhuicactli iaxca TOTECO, pero ni tlaltipactli quinmacatoc masehualme.
17Catli mictoque amo huicaj huan quihueyimatij TOTECO. Inijuanti ayacmo hueli moliníaj.
18Pero tojuanti, quena, tojuanti tijhueyimatise TOTECO ama huan para nochipa. ¡Xijhueyimatica TOTECO! ¡Paquilistli!
