1Chicahuac nijtzajtzilis TOTECO huan nijtlajtlanis ma nechtlasojtla.
2Iixpa ya nijpohuilía nochi catli nechtequipacholmaca.
3Quema eltoc quen nimisahuía ipan tlaohuijcayotl, huan ayacmo nijmati tlaque nijchihuas, nijnojnotza. San ya quimati tlaque ojtli monequi nijtoquilis para nimomanahuis tlen nopa tlaquetztli, catli quitlalijtoque nocualancaitacahua. Quena, campa hueli quitlatijtoque tlaquetztli ipan noojhui.
4Nijtlachili campa hueli huan niquitac. Amo aqui monejnehuilía tlen na. Amo aqui quinequi nechpalehuis. Amo aqui nechmocuitlahuía, niyon amo aqui quichihuilía cuenta nonemilis.
5Huajca na nimitztzajtzili, TOTECO, huan nimitzilhui: “TOTECO, san ipan ta nimotemachía para techmocuitlahuis. San ta hueli techmanahuis para amo tleno nopantis.
6Xijtlacaquili catli nimitztlajtlanía, pampa tlahuel nechtlaijiyohuiltíaj masehualme. Techmanahui ininmaco catli nechtepotztocatinemij, pampa inijuanti achi más quipiyaj chicahualistli que na.
7Techquixti ipan ni tlatzactli campa niitztoc para nihuelis nimitztlascamatis. Huan huajca nopa masehualme catli itztoque xitlahuaque, nechyahualose huan paquise pampa tijpiyas hueyi moyolo nohuaya para nochipa.”
