1¡Timitztlascamatij, Toteco Dios, pampa tiitztoc tonechca! Pampa masehualme tepohuilíaj nochi huejhueyi tetzatl catli tijchijtoc.
2Huan Toteco Dios quiijtohua: “Quena, quema ya nimocualtlalijtos, na niquixquetzas se tonal. ¡Huan niquintlatzacuiltis quen quinamiqui nochi nopa tlaixpanoca masehualme!
3Masque ni tlaltipactli mojmolinis huan nochi masehualme huihuipicase, itlaquetzalhua amo huetzise pampa na niquinquetztoc cuali ipan ininlugar.”
4Niquinilhui masehualme catli mohueyimatij ma amo mohuihuinequica. Huan niquinilhui tlaixpanoca masehualme ma amo mohueyimatica.
5Niquinilhuijtoc catli quipiyaj chicahualistli ma amo tetlamiijilhuica. Huan quema ancamanaltij, amo ximoyacaquetzaca para anmohueyimatise.
6Pampa san Toteco hueli tehueyitlalía. Amo aqui catli huala tlen campa hualquisa tonati, o ica campa oncalaqui, o campa huactoc tlali huelis quihueyitlalis se masehuali. ¡Amo!
7San Toteco Dios itztoc Juez. San yaya nopa tetlajtolsencajquetl catli hueli tehueyitlalía huan temaca chicahualistli. Huan sequin masehualme quinhueyitlalía huan sequin quinechcapantlalía.
8Toteco quipixtoc imaco se caxitl catli temitoc ica huino catli nelía cococ. Huan ya nopa eltoc nopa tlatzacuiltili catli quintitlanilis tlaixpanoca masehualme ipan ni tlaltipactli. Huan monequis quiijise hasta quitlamise ica nochi itetejtzo.
9Pero na para nochipa nitepohuilis nochi catli quichijtoc Toteco Dios, yaya catli iTeco Jacob.
10Yaya quiijtohua: “Na nijtlamiltis ininchicahualis nopa fiero masehualme, pero catli itztoque xitlahuaque noja niquinmacas más chicahualistli.”
