1¡TOTECO, xijtlacaquili catli nimotlatlajtía ica ta! Technanquili pampa ta titemachtli huan san catli cuali tijchihua.
2Amo ximochihua quen se juez huan techtlajtolsencahua, pampa moixpa ta amo aqui se masehuali catli itztoc xitlahuac.
3Nocualancaitacahua nechtepotztocatoque huan nechitzquijque. Nechtlahuisojque huan nechchihualtíaj ma niitzto ipan tzintlayohuilotl quen catli ya mictoque.
4Nelía senquistoc nimoyoltequipachohua, hasta ayacmo nijmati tlaque nijchihuas.
5Niquelnamiqui quenicatza eltoya ipan nopa tonali catli panoc. Nimonejnehuilía tlen nochi huejhueyi tlamantli catli tijchijqui.
6Yeca nimomatlanana moixpa huan nimitztemohua. Ipan noyolo tlahuel nimitznequi quen se tlali catli huactoc quinequi atl.
7TOTECO, nimantzi technanquili pampa tlahuel nitlaijiyohuía ipan noyolo. Amo ximoicancuepa tlen na para amo nimiquis.
8Ica ijnaloc, technextili motlaicnelijcayo, pampa ipan ta nimotemachijtoc para techmocuitlahuis. Technextili nopa ojtli catli monequi nijtoquilis, pampa san ta nimitzilhuía catli eltoc ipan noyolo.
9TOTECO, techmanahui tlen nocualancaitacahua, pampa ipan ta nimotemachía para amo tleno nopantis.
10Techmachti ma nijchihua catli ta tijnequi pampa ta tinoTeco Dios. MoTonaltzi ma nechyacana campa cuali nopa ojtli.
11TOTECO, techmaquixti para ma monextis mohueyitilis. Techquixti tlen ni tlaijiyohuilistli pampa ta tijchihua catli xitlahuac.
12Pampa ta techicnelía, xiquinhuejhuelo nochi nocualancaitacahua. Xiquintzontlamilti nochi catli quinequij nechchihuilise catli amo cuali, pampa nimotequipanojca.
