1TOTECO, ta techyoltlachilijtoc huan tijmati nochi tlen na.
2Ta cuali tijmati sintla nimosehuía o nimoquetza. Huan quema niitztoc huejca, ta tijmati tlaque nijpixtoc ipan notlalnamiquilis.
3Ta technextilía nopa ojtli catli monequi nijtoquilis, huan techilhuía canque nicalaquis huan canque nimosiyajquetzas. Sesen tlatoctzi ta tijmati canque niitztoc.
4Ta TOTECO, tijmati tlaque niquijtos hasta quema ayamo nicamanalti.
5Ta techyahualojtoc pampa tiya ica noixpa huan ica noica, huan tijtlalía momax ipan na para techtiochihuas.
6Nochi ni tlamantli catli ta tijmati nelía yejyectzi, huan ohui para nijneltocas.
7Amo cana hueli nimotlatis tlen moTonaltzi. Amo cana huelis nimotlatis huan amo tiitztos nopona.
8Sintla nitlejcos hasta ilhuicac para nimotlatis, ta nopona tiitztoc. Huan sintla niyasquía ipan nopa hueyi ostotl campa itztoque mijcatzitzi, ta nepa tiitztoc.
9Sintla nijpiyasquía noeltlapal huan nipatlanisquía, huan niquixcotonasquía nopa hueyi atl,
10hasta nepa techyacanasquía ica mohueyi chicahualis.
11Sintla nijchihuasquía campica para nimotlatis ipan tzintlayohuilotl, nopa tzintlayohuilotl mocuepasquía tlahuili yahualtic tlen na, pampa ta tiitztos nopona.
12Pampa niyon nopa tzintlayohuilotl amo hueli techtlatis moixpa, Toteco. Pampa para ta nopa yohuali tlahuía quen elisquía tonaya. Nopa tzintlayohuilotl huan tlahuili ta tiquita san se.
13Ta tijsencajqui sesen tlamantli catli onca iijtic notlacayo. Huan tijmotzquilti sesen tlamantli catli nijpiya, quema niitztoya iijtico nonana.
14Nimitztlascamati pampa techsencajqui ma nieli se tlamantli catli nelía cuajcualtzi. Quena, nopa tequitl catli tijchijqui quema techsencajqui onpano yejyectzi. San nijsentlachilía para nimoilhuis nochi catli tijchijtoc ipan notlacayo.
15Ta tijtlachiliyaya quema na nipejqui nimoscaltía nopona nel nimotlatijtoya tlen nochi sequinoc ipan iijtico nonana. Quema amo aqui más quitlachiliyaya, ta techchijchijqui ica mohueyi yajatil, quen se catli cuali quimati tlaxinepalohua.
16Ta techitac quema ayamo nitlacatiyaya. Huan quema ayamo nitlaijiyotilanayaya, tiquixquetzqui quesqui tonali niitztosquía. Huan sesen tonal catli niitztosquía huan tlaque nopantis, ta tiquijcuilo ipan molibro.
17Toteco Dios, nelía yejyectzi quema nimomaca cuenta para ta tijsenhuiquilía timonejnehuilía tlen na.
18Hasta amo hueli nijpohua quesqui huelta timonejnehuilía tlen na ipan se tonali. Huan ica ijnaloc quema niisa, ta noja timonejnehuilijtoc tlen na.
19Toteco Dios, nelía elisquía cuali sintla tiquintzontlamiltisquía nochi masehualme catli amo mitztlepanitaj. Xijchihua ma nechtlalcahuica nopa temictiani,
20pampa inijuanti mitztlaijilhuíaj, huan san quiahuilmatij motoca.
21TOTECO, ¿atlac amo quinamiqui para niquincualancaitas inijuanti catli mitzcualancaitaj? ¿Atlac amo quinamiqui nicualanis ica mocualancaitacahua?
22Quena, tlahuel niquincualancaita, pampa niquinita quen nojquiya elisquíaj nocualancaitacahua na.
23NoTeco Dios, xijtlachili noyolo huan xiquita nochi catli eltoc nopona. Huan xijyejyeco notlalnamiquilis para tiquitas sintla xitlahuac catli nimoilhuía.
24Technextili sintla onca ipan notlanejnehuilis se tlalnamiquilistli catli amo mitzpactía, huan techyacantiya ipan nopa ojtli catli tehuica campa onca nemilistli para nochipa.
