1TOTECO, na nimitznotza. Ximoisihuilti techpalehuiqui. Techtlacaquili quema nimotlatlajtía ica ta.
2Xijseli nonetlatlajtilis quen elisquía copali catli quitlatíaj moixpa, huan quema nimomatlanana para nimitzhueyimati, xiquita quen se tlacajcahualistli catli nimitzmactilía ica tiotlac.
3TOTECO, techmocuitlahui para ma amo nicamanalti quej hueli. Techpalehui para nimocamatzacuas.
4Amo techcahuili nijnequis tlamantli catli amo cuali. Amo techcahuili ma niquinpalehuis tlaixpanoca masehualme ica catli quichihuaj. Ma amo niquixtoca nijcuas nopa cuali tlamantli catli quipiyaj.
5Quema monequi se nechtlalnamictis, xijchihua para catli monejnemiltíaj xitlahuac moixpa ma nechtlatzacuiltica. Ya nopa niquitasquía quen se tlamantli cuali catli nechchihuilíaj. Sintla masehualme catli cuajcualme nechtlacahualtise, elis quen se pajtli para na. Amo techcahuili para nijhuejcamajcahuas inon. Pero na tlatoctzitzi nimotlatlajtía para ma quiselica tlatzacuiltili tlaixpanoca masehualme.
6Quema nijchihuas para mocuamimilose inintlayacanca ipan tepeixco, quicaquise nocamanal huan quipantise para nelcuali.
7Nopa fiero masehualme quiselise tlatzacuiltili huan iniomiyohua quitepehuase ipan campa hueli tlali.
8TOTECO, ta catli titoTeco, na san nimitzchiya para techpalehuis. Ipan ta nimotemachía para techmocuitlahuis. Amo xiquincahuili ma nechmictica.
9Techpalehui para amo nimasis ipan nopa tlaquetztli catli quitlalijtoque nopa fiero masehualme.
10Xijchihua para nopa amo cuajcualme ininseltzitzi ma momasiltica ica nopa tlaquetztli catli quisencajtoque para sequinoc. Pero na ma nipano nimajcajtoc huan amo tleno ma nopanti.
