1NoTeco Dios, techmaca motlamachtil huan techpalehui na catli nitlanahuatijquetl, para ma nitetlajtolsencahua xitlahuac quen ta titetlajtolsencahua. Huan xijpalehui nocone para ma monejnemilti xitlahuac teipa.
2Xijpalehui para ma quintlajtolsencahuas xitlahuac nochi momasehualhua, huan catli teicneltzitzi nojquiya.
3Xijchihua para nochime ipan ni tlali ma paquica pampa nopa tlanahuatijquetl quichihua catli xitlahuac, hasta eltoc quen nochi cuame catli onca ipan tepeme huan ipan tlachiquilme nojquiya paquij huan temacaj cuali inintlajca.
4Yaya quinmanahuis catli itztoque ipan tequipacholi huan catli amo tleno quipiyaj. Nojquiya ma quintlatzacuilti nopa masehualme catli tetlaijiyohuiltíaj.
5Huan catli teicneltzitzi huan amo tleno quipiyaj mitzimacasise mitzixpanose nochi tonali quema noja eltos tonati huan metztli. ¡Quena, ma mitzhueyimatica para nochipa!
6Huan nochi altepeme ipan itlanahuatilis nocone ma eli yejyectzi huan temachtli, quen nopa atl catli huetzi para ma chamanica cuame, o quen nopa ajhuachtli catli quixolonía nopa tlali.
7Huan nochi masehualme catli itztoque xitlahuaque huan cuajcualme, ma itztoca ica yejyectzi quema yaya tlanahuatis. Quema yaya tlanahuatis, oncas miyac tlasehuilistli hasta itlamiya tonali.
8Itlanahuatilis nocone ma ajsi hasta campa pehua huan hasta campa ontlami nopa hueyi atl. Ma ajsi tlen campa nopa hueyi atl Eufrates hasta campa ontlantoc tlaltipactli.
9Nochi masehualme catli itztose ipan huactoc tlali mohuijtzomase iixpa, huan icualancaitacahua motlancuaquetzase iixpa hasta quipipitzose tlaltejpoctli.
10Nochi nopa tlanahuatiani catli itztoque itejteno nopa hueyi atl catli itoca Mediterráneo, huan nopa tlanahuatiani tlen tlali Tarsis huan nopa tlanahuatiani tlen tlali Sabá huan Seba quihualiquilise miyac nemactli.
11¡Quena, nochi tlanahuatiani tlen campa hueli tlalme quitlanemactise! ¡Huan nochi inijuanti motlancuaquetzase iixpa huan quitequipanose!
12Yaya quinmanahuis nopa teicneltzitzi huan catli amo tleno quipiyaj quema quitlajtlanise tlapalehuili. Pampa inijuanti amo quipiyaj ajqueya quinpalehuis.
13Yaya quintlasojtlas catli amo quipiyaj chicahualistli huan catli teicneltzitzi, huan quinmanahuis.
14Quinmanahuis para amo quintlaijiyohuiltise huan para amo quinhuilanase. Pampa quiitas para ininnemilis tlahuel miyac ipati iixpa.
15Huan quema noja itztos nopa tlanahuatijquetl, quimacase miyac oro catli onca ipan tlali Sabá. Huan imasehualhua quisenhuiquilijtose motlatlajtijtose ica Toteco huan mojmostla quitlascamatise.
16Ma oncas miyac trigo ipan nochi nopa tlali, huan hasta nopa cuame catli onca ipan tepeme ma temacase inintlajca quen temacaj nopa cuame catli onca ipan tlali Líbano. Huan ma onca miyac masehualme ipan altepeme, quen imiyaca nopa xihuime catli onca ipan cuatitlamitl.
17Nochime ma quihueyimatica nopa tlanahuatijquetl para nochipa, huan itequiticayo ma huejcahua quen huejcahuas tonati. Nochi ma quiselica tlatiochihualistli por ya. Huan masehualme ipan nochi tlalme ma quipaquilismacaca, huan ma quiijtoca para Toteco quintiochijtoc.
18Ma tijhueyichihuaca TOTECO Dios catli toDios tiisraelitame, pampa san yaya hueli quichihua huejhueyi tlamantli.
19Nochipa ma tijpaquilismacaca Toteco. ¡Nochi tlaltipactli ma temi ica ihueyitilis! ¡Ma quej nopa eli!
20Nica tlami motlatlajtía David, icone Isaí.
