Rom 3:9-19

⁹Eshudok yoweishi douk showeshik ihipmorim. Namudok aria um mumam? Apak Juda adur munek uhwinyum meshagrakuk eshesh madae Juda iri uwe um munek yopihi aih um aka, uwok? Aria adur atin namudok ta uwok.

¹⁰Kabi baraen nyetem Iruhin ananik Buk iri nyakrium. Douk nyakri namudok, “Madae enen arpen nyenek yopuhi adurih aih atuh iri uwe, uwok. Atin arpen meyoh nyenek yopuhi aih iri douk madae enen uwe.

¹¹Nyadukem yopuhi aih iri arpen douk shopunek madae enen uwe, uwok. Aria enen arpen nyupe nyunek mour um nyurim Iruhin uwe, uwok.

¹²Ihishmorim arpesh douk shatanam shakonaguk agabus. Aria ihishmorim shatogur yoweishi arpesh. Madae enen arpen nyunek yopuhi aih uwe, uwok. Amu wouwokuk abom.

¹³Esheshin baraen douk kabi anaruh wonugwegwiruh douk enesh shatarari arpesh shor aria paworuruh aria ba yoweiri unar rakihumori. Eshesh douk shapeum shenek rohw um kupaishi aria esheshin baraen douk wanohwin atin kabi yowenari marasin nor yoweiguhwi yuguhw-mori.

¹⁴Eshesh douk shapeum sheneyagwreh sabainyi yoweinyi baraen douk apa nyanunu kupaishi nyenekesh madae shupe wosik uwe, uwok.

¹⁵Eshesh douk apa shanak arigah atin ba shabo kupaishi shagok.

¹⁶Ihigun agundok douk eshesh shunak um, eshesh douk apa shenekesh enenyenen eshesh kupaishi shenekesh sharao debeiri eriger.

¹⁷Ehudok aih um shuni kupaishi shupe atugun shukesh aparuh hur wosik um kupaishi douk madae shudukemeh uwe, uwok.

¹⁸Eshesh douk madae ta shunogugur um Iruhin uwe, uwok.”

¹⁹Namudok aria apak douk madukemesh. Enyudok baraen nyetem lo Iruhin nakoguk Moses enyi iri, enyen douk nyakrium eshesh Juda douk shape shakamum enyudok lo iri. Amam henyem um apak ihipmorim mutarihen aria mudukemen um mare enen arpen ta nyiyagwreh nyukri enyen douk adur nyape yopunyi arpen, aria ta uwok. Aria apak ihipmorim mape agundok atap iri douk baraen nyapeyap iri kweipon Iruhin ta nunemap kwotog.