9ꞌEnega ꞌaboꞌada me Yudia mwaꞌadega ꞌida miya taudi nigeya me Yudia ꞌidi miya ꞌiboboꞌana sinena? Nigeya! Manuna niꞌatu yaeꞌiteda ꞌaene maiboꞌada totoꞌumalida.
10Nadigega Buki Tabu ꞌina simana ꞌigwae, “Nigeya ꞌebweu yaita ꞌina bubuna palupaluna.
11Ta nigeya wate ꞌebweu yaita Yaubada ꞌida mwalatonina, nai nuwanuwana be ꞌida mwalatoni. Nigeya saꞌi!
12Onaꞌaiꞌaila, tomota maiboꞌadi niꞌatu sitauya gesi ga ꞌeda toꞌumalina ꞌena siapwesa. Nigeya ꞌebweu wate yaita ꞌina bubuna boboꞌana.”
13“Ta ꞌawadi ꞌatuwa ꞌebweu ꞌaliꞌali ꞌegeꞌegegena, be ꞌawadiyega yage toꞌumali wawasae ta kabokabodi siapweapwesama,” “Ta wate ꞌidi onao nadigega mwata bolausao ꞌediyega tomota siloemwawasidi.”
14“Ta onaupaupa toꞌumalidi ꞌawadiyega tuta yauyauna siapweapwesa.”
15“Onaꞌaiꞌaila, tomota ꞌadi loemwawasa nuwadi ꞌiꞌewena.
16Ta ꞌabo to sena ꞌena sitautauya, ꞌiabe yage maiboꞌana sigie toꞌumaliyedi.
17Nigeya ꞌebweu wate guguya nai egosigosiyana ꞌediya ꞌimiyami.”
18“Ta wate nigeya Yaubada ꞌana matauta ꞌediya ꞌimiyami.”
19Ta niꞌatu tamwalatonina ꞌaene Mosese ꞌina loinao nate me Yudia ꞌada loina, be ꞌenega geyaꞌabo yaita ꞌionaona limana tuta nina Yaubada ꞌina bwaꞌomatana ꞌena, manuna maiboꞌada totoꞌumalida.
Loma 3
Loma 3:9-19