Romanos 3:9-19

⁹Pues entonces ¿tucꞌa tuaꞌ caware era? ¿Más ca ayan cacꞌampibꞌir xeꞌ tuon e Israel que e inmojr winicobꞌ tara tor e rum? Machi. Porque wartocto incansiox era que non xeꞌ tuon e Israel bꞌanon taca turon cocha e inmojr winicobꞌ xeꞌ majax tuobꞌ e Israel tut e Dios, y que tunoron xeꞌ turon tara tor e rum turon yebꞌar ucꞌotorer e mabꞌambꞌanir.

¹⁰Chꞌar tzꞌijbꞌabꞌir tama uyojroner e Dios que: Mamajchi xeꞌ erach tut e Dios, nien incojt.

¹¹Y mamajchi cꞌani uyubꞌi tucꞌa war che e Dios, y machi cꞌani usicbꞌobꞌ ut e Dios.

¹²Y tunor e winicobꞌ war usuti upatobꞌ tut e Dios, y tamar era war axiobꞌ tiaꞌ tuaꞌ asatpobꞌ. Mamajchi war uche lo que erach tut e Dios, nien incojt.

¹³Y uchorchor tunor e winicobꞌ bꞌan cocha umujr e chamenobꞌ conda apascꞌa ut, y bꞌan intuj tunor uyojronerobꞌ. Y tacar or uyacꞌobꞌ war amajresianobꞌ. Y uyojroner e winicobꞌ bꞌan cocha upuc e chan.

¹⁴Ojronobꞌ tuaꞌ taca ubꞌaxe e gente y tuaꞌ ucꞌayobꞌ.

¹⁵Y tacar uyocobꞌ axiobꞌ wacchetaca tuaꞌ achamsanobꞌ.

¹⁶Y war atijresianobꞌ, y war uche unumse ubꞌobꞌ tunor e inmojr.

¹⁷Y machi unatobꞌ tucꞌa e jiriar.

¹⁸Y machi ubꞌijnuobꞌ tuaꞌ ubꞌacriobꞌ e Dios. Bꞌan chꞌar tzꞌijbꞌabꞌir tama uyojroner e Dios.

¹⁹Pues canata que tunor lo que chꞌar tzꞌijbꞌabꞌir tama uley e Moisés quetpa tzꞌijbꞌabꞌir tuaꞌ tin e turobꞌ yebꞌar ucꞌotorer e ley era xeꞌ jax e gente xeꞌ tuobꞌ e Israel. Y umen que chꞌar tzꞌijbꞌabꞌir tunor era tama uley e Dios tunor e winicobꞌ ucꞌani tuaꞌ umaqui uyejobꞌ, y tunor e winicobꞌ tama tunor or e rum ucꞌani tuaꞌ acꞌaxiobꞌ tama ucꞌabꞌ e Dios conda watar e día tuaꞌ uche juzgar.