Proveps-Knare Nomaniza 8:2-34

²Agra kamofo tavaonte me'nea agonare, ka hatana hu'nefi otine'no,

³rankumapi ufre'nea kante ene kampi otineno ranke huno kezana netie.

⁴Ana miko vahe'motmagu kezankea nehue. Vahe'motagu kezankea nehue.

⁵Antahizantmi omane vahe'motma eta refakomahu antahizana emeriho, neginagi antahi'zane vahe'motma, eta antahi amahu antahi'zana emeriho.

⁶Kma antahiho kema nehuana, na'ankure mareri agatere'nea zanku nehue, maka nanekema hanua kemo'a, fatgo huno tamage ke tamasamigahue.

⁷Nagra tamage kege nehu'na, havi kegagama nagi'pintima huzankura nagonete.

⁸Maka nanekenimo'a tamage huno fatgo higeno, krunagene kazaki kema huzana omane'neanki,

⁹ana maka kemo'a antahizane vahetera fatgo hu'ne. Ana antahizama erinaku'ma hakaza vahetera, fatgo hu'ne.

¹⁰Nagrama hiho hu'nama rempima huneramua kemo'a, silva agateregeno, antahizama erizamo'a, koli'a agatereneanki erio.

¹¹Na'ankure knare antahi'zamo'a mareri agaterenea havea agatereno, kavesi kavesima nehunka razane hunka nehanazana agatere'ne.

¹²Nagra, knare antahi'zamona knare huno refakohu'zane nemanue, Nagripi antahizana me'neankina miko zana nagrake refko hu'na negoe.

¹³Ra Anumzamofonku koroma huntezana kefo avu'avama huzankura kagotegahie. Agra'a agima erisga nehuno, avufga ra nehuno, havi avu'ava nehuno, akrahe akrehe ageru'ma aru'zana navesra hunentoe.

¹⁴Knare antahizama ami'zane, refakoma huzana nagripi me'ne. Nagra antahi ama'ma huzane hanavenena nagri zane.

¹⁵Nagra maninoge'za kini vahe'moza kegva nehazageno, ugota kva vahemoza fatgo hu'nea kasegea retro nehaze.

¹⁶Kva vahe'mo'za nagra zamaza nehuge'za vahera zamavre fatgo huza ne'vzageno, trakere kva vahe'moza fatgo huza refkoa nehaze.

¹⁷Iza'o nagrima avesi nentemofona, nagra avesi nentoe. Hagi nagri'kuma hakre'nimo'a, nagrira nagefore hugahie.

¹⁸Nagripi fenozane, ra agima erizana me'ne. Hanavetino zazatema meno vu fenozane, fatgo avu'avazana nagripi me'ne.

¹⁹Nagrama nezamua zamo'a, golia agatenereno knare silvama mizama nesazazana agaterene.

²⁰Nagra fatgo avu'avazamofo kante nevuna, fatgo huno refakoma huzamofo kantamimpi nevue.

²¹Iza'zo nagrima zmavesi nantesaza nagamo'za, fenona erisanti neharesagena, nagra feno nozamifina zago'amo mareri zantamina antevi tezamantegahue.

²²Ra Anumzamomo'a pusazana nagri nazeri fore huteno, mika'zana henka tro hu'ne.

²³Korapara ama mopama tro osuneno ese zana nagri huhamprinantene.

²⁴Nagra fore hutogeno henka hagerina tro higeno, kampui tintamimo'a hanatino vu'ne.

²⁵Ranra agonane, onensa agona forera huno menima antenerera omanenegena, nagra pusante fore hu'noe.

²⁶Miko mopane, hofa kokama ama mopafi kugusopa nazana henka tro hu'ne.

²⁷Nagra korapa maninogeno monarera mikazana tro hunenteno, hagerina tro huntegeno tavumoma ometre emetretera evune.

²⁸Nagra ko maninogeno anagamua hampona tro hunenteno, tinkampuima hanatino tiruma umarenia keria tro hune.

²⁹Nagra korapa maninogeno hagerinkura, e'i avamente tirura marenka emetro huno kase hunenteno, tiruma maresia mopa trohune.

³⁰Nagra makazama tro'ma hu'noa Ne'mofo tavaonte mani'nena, aza nehugeno muse nehigena maka kna nagranena rama'a muse nehue.

³¹Maka kokama troma hu'nea zanku'ene vahe'ma anampima mani'nea zankura, nagra tusi'a muse nehue.

³²E'ina hu'negu mofavre'nimoka ke'ni'a antahinamio, na'ankure nagri navu'nava zama avaririsaza vahe'mo'za muse hugahaze.

³³Kavumroma antesua kea nentahinka, ama antahizana e'nerinka kavesra huontenka amage anto.

³⁴Ke'ni'ama nentahiza, kumanimofo kama atiramitema knane knanema naveganenteza, kahani'arema navegama nentaza vahe'mo'za, tusi muse hugahaze.