Muqâqiŋ Dâŋ 8:2-34

²E tiki botâŋko mecne, hata sâko heririŋko mecne, â hata ŋeŋehasicko mâmâc domahuc iŋuc ekac.

³Erâ hae mendâŋko â haesac motâcko wâc domahuc ʒiŋuc muhuc wirakac hâcne:

⁴“O ŋicbureŋ, no ŋoŋe hâcne wira‐ŋarekopac, â marac fânâŋ‐nane i mâreŋ sâc ŋic ʒeŋgoma ŋoŋerao fuakac.

⁵Maŋhumuc juŋgopieŋ ŋoŋe mamana bâfuaniŋ, â ŋic mutucne ŋoŋe maŋfânâŋhec eniŋ.

⁶Ŋoŋe dâŋnane biaŋne i mana maŋ eniŋ, micnaneonec dâŋ wahaekac i tiŋne sasawa.

⁷No dâŋ muekopac i fârine sasawa, â burecdâŋ ine qaisockeekopac.

⁸No dâŋ jâmbomac sasawa muekopac, sioc â mumusifuc dâŋ ine mi eekopac.

⁹Ŋic mamana tarahec jaŋe dâŋnane mana tiŋneeŋgopieŋ; â maŋ mamanasuhec jaŋe mana tara‐fâreeŋgopieŋ.

¹⁰Ŋoŋ siliware manapie omane eha dâŋnanere manapie fârine ezejec, erâ gol ɋaɋacnere wâc manapie wawahane eha mamana tara irec manapie furi sâko ezejec.

¹¹“Maŋɋârâŋ no qânâ furi sâko jaŋere sâc sirickeekopac, â wiac furi sâko i me i nohec sâc hehene mi eekac.

¹²Maŋɋârâŋ no mamana tara‐nanehec, erâ mamana saric â mumutiŋ i wâc fonareekac.

¹³Ŋic moc e Wofuŋ araŋ bacneocmuzi hehesic qikiŋneocmu no irec hâcne sahac fefe â penaroŋ, eebapa sâqocne â burecdâŋ i râpecke‐fâreekopac.

¹⁴No mamana tara â tâpiri‐nanehec, irec dâŋ manasu biric erâ fârine wâc bâfuaekopac.

¹⁵No ŋicwofuŋ jaŋe guriŋ bapa gie baniŋte, â ŋic fekicne jaŋe sâcmutâc dâŋ biaŋne râeniŋte bafic‐jopaekopac.

¹⁶Mâreŋte guriŋ bapa ŋic, gawamaŋ me ŋic ʒâŋe biŋehec jaŋe noni hâcne dopec‐jopahape gie‐jeŋic baeŋgopieŋ.

¹⁷No maŋjauŋ enareeŋgopieŋ jaŋe maŋjauŋ jaha wâc ejareekopac, â wira basac enareeŋgopieŋzi bâfuacnueŋgopieŋ.

¹⁸Norao hâcne mazuc mâriri â ʒâŋe biŋe, erâ mumutiŋ â jujuhâmo bâbâfuane fokac.

¹⁹Noraonec wiac roniŋmu i gol ematauckekicne â siliwa ɋaɋacne irec sâc jâuruocmu.

²⁰No tiŋne jujure hatao raekopac, ehuc ŋic jaŋere dâŋ mutiŋnehuc mutaraekopac.

²¹Ehuc maŋjauŋ enareeŋgopieŋ jaŋe bafic‐jopahape mafa mâriri fua‐jarerâ ficjeŋic fusucmaekac.

²²“Wofuŋ e wiac sasawa moc mi fuarâ foha bâbâni no hâcne fuŋkerâ bâfuacnuwec.

²³E mârâc sasac jaha jâmbâŋ mâreŋ sâko mâreŋ moc mi bâfuahuc no hâcne râecnuwec.

²⁴Hâwec sâko me opâ ʒâŋe moc mi fuarâ foha no hâcne fuapo.

²⁵Tiki kâcɋene â piticne jaŋe ŋeŋe‐jeŋicko moc mi ŋehapie noni hâcne fuapo.

²⁶Anutuzi mâreŋ me jufu sesuc me mâreŋ qâhâcne huŋgaŋne mac moc mi bâfuaha no hâcne fuarâ jupo.

²⁷No fuarâ juhape Anutuzi sawa qânikiŋ râewec, â hâwec qaŋeŋne fâretiŋnewec.

²⁸Ehuc faic karorac qaratiewec â juwic hâwec sâko ʒâŋene bâmârâŋkewec.

²⁹Erâ no fuarâ juhape jaha mâreŋte hobeteŋne râehuc hâwec sâko fofo‐ticnao foocte mutaracnewec.

³⁰Ehame no ʒoaŋne ʒoaŋne Anuture heririŋko ʒeri faio juhuc bubiaŋ bâfuacnepe mana‐nareme biaŋkewec.

³¹Iŋuc enareme mâreŋte manape ʒerine ewec, â ŋic jaŋere wâc manape biaŋkewec.

³²“Irec ŋicmotecfâc‐nane, ŋoŋe dâŋnanere hazec râeniŋ, erâ dâŋ ŋazaekopac i mana rereŋ ehuc juhâc qâhâmoniŋmu.

³³Dâŋ ŋaza qazuc ekicne i mana hâmonʒepieŋ, erâ maŋɋârâŋhec juhuc mi qâsuanʒepieŋ.

³⁴No ŋic moczi kecʒiŋuc eocmu ere manape ʒerine eocmu: Dâŋnanere hazec râeocmu, me ʒoaŋne ʒoaŋne ficmotâc‐naneo fisirâ motâc râpeo maŋɋârâŋ nore woŋec domaocmu.