HEREVA LADA-ISIDIA 8:2-34

²Dala badina ororodia ai bona dala lalodiai e ginimu;

³hanua ikoukoudia badibadidiai bona ruma iduaradia ai e boiboimu, e tomu:

⁴Taunimanima e, na boi henimuimu; taunimanima natudia e, na tai henimuimu.

⁵Asi aonegamui taumui e, nahuamui ba toho; kavakava taumui e, a hakala.

⁶A kamonai, badina be ḡau herea-daedia baina herevalai, udugu bibinadia herevadia bae maoromaoro;

⁷badina be udugu na hereva momokanidia baine gwaurai, udugu bibinadia ese kara dika e inai heniamu.

⁸Udugu herevadia iboudiai na mamaoro-mamaoro; ta se hepui, ta se gageva-gageva.

⁹Iboudiai na hehedinararai, lalona e pararamu tauna enai, bona mamaoro-mamaoro, aonega e davariamu taudia ediai.

¹⁰Egu hahediba herevadia bavabi dae, a dia silver; aonega bavabia dae, a dia gold namo-hereana;

¹¹badina be aonega ena namo ese herahera nadinadidia edia namo e hereaiamu, o ura henimu ḡaudia iboudiai na ia ida basie heḡereḡere.

¹²Lau, aonega, na henahua tohomu, bena lalo-parara bona kara-balaheni na davaridiamu.

¹³Iehova igari-henina na dika i'inai-henina; hekokoroku bona heaḡi bona kara dika dalana bona hereva gageva-agevadia na inai henidiamu.

¹⁴Hahealo bona aonega namodia na egu ai, lalo-parara bona goada danu.

¹⁵Lau daigu ai pavapava e lohiamu, bona hanua lohiadia ese taravatu maoromaorodia e gwauraimu

¹⁶lau daigu ai pavapava e lohiamu, bona lohia taudia ese tanobada e biaguamu.

¹⁷E ura henigumu taudia na na ura henidiamu, bona mai gadodia ida e tahugumu taudia ese e davarigumu.

¹⁸Taḡa bona hemataurai na egu ai, mia-hanaihanai kohudia bona ima-lalo-ani negadia danu.

¹⁹Lau huahuagu ese gold e hereaiamu, gold namo-hereana e hereaiamu; lau anigu ese silver ḡoeva-daena e hereaiamu.

²⁰Kara maoromaoro daladia ai na rakamu, bona hahemaoro ḡoevaḡoevana ai danu;

²¹e ura henigumu taudia na hataḡadiamu, edia habou-habou rumadia na hahonudiamu.

²²Ena ḡaukara matamana ai Iehova ese e karagu, ena kara gunadia matamana.

²³Gunaguna negana ai e haginigu, matamana negana ai, tanobada do se vara negana ai.

²⁴Gadobada na do lasi negana ai, ia ese e havaragu, ranu gabudia ai ranu do se lohilohiva negana ai.

²⁵Ororo badadia na oromadia do asie abi, ororo maraḡidia na do lasi negana ai, lau e havaragu;

²⁶tanobada mai ena rei gabudia ida do se kara bona tano ḡahuna do se karaia matama negana ai.

²⁷Guba e karaia negana ai, lau na unuseni ai, gadobada hetoadia e karadia heḡeḡe negana ai;

²⁸atai ai guba e ha-aukaia bona gadobada e halohilohia daeva negana ai;

²⁹davara hetoana e henia, ranuna ese iena haheḡani basie tataia utu helaoreana, bona tanobada badidia toadia e kara negana ai.

³⁰Una negana ai lau na ia badibadinai, ḡaukara idibaka tauna na heto; dina iboudiai ia ese e moalelaiguva, bona lau na ia vairanai na moaleva nega idoinai;

³¹ena tanobada mai inoholaina taudia ida, taunimanima natudia iboudiai na moalelaidiava.

³²Natugu e, ina harihari a kamonai henigu: Egu dala e badinadiamu taudia be nanamo.

³³Hahediba herevadia ba hakala henidia, bena ba aonega; basio laloa nege.

³⁴E kamonai henigumu tauna na namo; dina iboudiai ia ese egu ikoukou ai e gimamu, egu iduara ai e henarimu.