Pend-nesihetler 23:1-32

¹Katta erbab bilen hemdastixan bolsang, Aldingdiki kim ikenlikini obdan oylan.

²Ishtiying yaman bolsa, Gélinggha pichaq tenglep turghandek özüngni tart.

³Uning nazunémetlirini tama qilma, Ular adem aldaydighan tamaqlardur.

⁴Bay bolimen dep özüngni upratma; Özüngning zéhningni bu ishqa qaratma.

⁵Bayliqlargha köz tikishing bilenla, ular yoq bolidu; Pul-mal derweqe özige qanat yasap, Xuddi bürküttek asman'gha uchup kéter.

⁶Ach közning nénini yéme, Uning ésil nazunémetlirini tama qilma;

⁷Chünki uning köngli qandaq bolghandek, özimu shundaq. U aghzida: — Qéni, alsila, ichsile! — désimu, Biraq könglide séni oylighini yoq.

⁸Yégen bir yutum taamnimu qusuwétisen, Uninggha qilghan chirayliq sözliringmu bikargha ketken bolidu.

⁹Exmeqqe yol körsitip salma, Chünki u eqil sözliringni közge ilmas.

¹⁰Qedimde békitken yerning pasil tashlirini yötkime, Yétimlarning étizlirighimu ayagh basma;

¹¹Chünki ularning Hemjemet-Qutquzghuchisi intayin küchlüktur; U Özi ular üchün üstüngdin dewa qilar.

¹²Nesihetke köngül qoy, Ilim-bilimlerge qulaq sal.

¹³Balanggha terbiye bérishtin érinme; Eger tayaq bilen ursang, u ölüp ketmeydu;

¹⁴Sen uni tayaq bilen ursang, Belkim uni tehtisaradin qutquziwalisen.

¹⁵I oghlum, dana bolsang, Méning qelbim qanche xush bolar idi!

¹⁶Aghzingda orunluq sözler bolsa, ich-ichimdin shadlinimen.

¹⁷Gunah sadir qilghuchilargha reshk qilma, Herdaim Perwerdigardin eyminishte turghin;

¹⁸Shundaq qilghiningda jezmen köridighan yaxshi kününg bolidu, Arzu-ümiding bikargha ketmes.

¹⁹I oghlum, sözümge qulaq sélip dana bol, Qelbingni Xudaning yoligha bashlighin.

²⁰Meyxorlargha arilashma, Nepsi yaman göshxorlar bilen bardi-keldi qilma;

²¹Chünki haraqkesh bilen nepsi yaman axirida yoqsulluqta qalar, Gheplet uyqusigha patqanlargha jende kiyimni kiygüzer.

²²Séni tapqan atangning sözini angla, Anang qérighanda uninggha hörmetsizlik qilma.

²³Heqiqetni sétiwal, Uni hergiz sétiwetme. Danaliq, terbiye we yorutulushnimu al.

²⁴Heqqaniy balining atisi chong xushalliq tapar; Dana oghulni tapqan atisi uningdin xursen bolar.

²⁵Ata-anangni söyündürüp, Séni tughqan anangni xush qil.

²⁶I oghlum, qelbingni manga tapshur; Közliringmu hayatliq yollirimgha tikilsun!

²⁷Chünki pahishe ayal chongqur oridur, Buzuq yat ayal tar zindandur;

²⁸Ular qaraqchidek möküwélip, Insaniyet arisidiki wapasizlarni köpeyter.

²⁹Kimde azab bar? Kimde derd-elem? Kim jédel ichide qalar? Kim nale-peryad kötürer? Kim sewebsiz yarilinar? Kimning közi qizirip kéter?

³⁰Del sharab üstide uzun olturghan, Ebjesh sharabtin tétishqa aldirighan meyxorlar!

³¹Sharabning ajayib qizilliqigha, uning jamdiki julaliqigha, Kishining gélidin shundaq siliq ötkenlikige meptun bolup qalma!

³²Axirida u zeherlik yilandek chéqiwalidu, Oq yilandek neshtirini sanjiydu.