Proverbios 23:1-32

¹Juc mandaj wasincho micunayquipaj gayachishuptiqui tantiyacuriy pipa ñaupancho jamaraycashayquitapis.

²May-jina micuyta munaparpis ama jucllaga aptarcunquichu.

³Alli mishquej micuynincunata ama munapaychu. Musyapäshunallayquipäpis gayashunquimanchari.

⁴Rïcuyayllataga ama ashiychu. Rïcu canayquipäga ama alläpa yarpachacuychu.

⁵¿Imayllaga riquësata ricashcanquichu? Riquësacunaga illajpita pärir anca aywacojnöllami, lümancuna juntarcuptin äbi aywacoj-yupayllami.

⁶Micha yargaj runacunapa wasinman ama yaycunquichu. Mishqui micuynincunatapis ama munapaychu.

⁷Chay runaga micuy aycalla cuestashantapis cuentata jorguycanmi. Janan shongullami «micushun, upushun» nishunqui.

⁸Nircorga micushayquitapis gumitanquipämi. Cuyachicur alli shimillayquipa parlashayquipis yangami canga.

⁹Mana tantiyacojcunataga ama willapaychu. Yachaj cayniquiwan allita willapaptiquipis asipäshunquipämi.

¹⁰Unaypita-pacha jawiraj lindacunataga ama witichinquichu. Wacchacunapa chacranmanpis guechunayquipaj ama yaycunquichu.

¹¹Paycunata Washäga caycan fiyupa munayniyojmi. Pï ñacachiptinpis Paymi faburnin jatarir castiganga ñacachejtaga.

¹²Yachachishushayquicunata llapan shonguyquipa yachacuy. Yachaj canayquipaj willapäshushayquitaga yarparay.

¹³Wamrataga piñacuypaj captenga simri piñacuy. Ishcay quimsa maqui astishallayquega manami wañuchengachu.

¹⁴Astishayquiwanga mana alliman chayar pirdicänanpitami salbaycanqui.

¹⁵Ïju, gam sumaj yachaj cayman chayaptiqui nogaga fiyupami cushicushaj.

¹⁶Rasunpa alli cajcunallata parlajta wiyaptë shongöpis fiyupami cushiconga.

¹⁷Juchasapacuna imatapis charajta ricar ama rabyapaychu. Chaypa ruquenga imaypis Tayta Diosllata manchapacuy.

¹⁸Chayno goyarga alli cawaymanmi chayanquipaj. Yarpashayquicunapis manami yangallapächu canga.

¹⁹Ïju, llapan yachachishäta sumaj wiyacuy. Llapantapis alli cajcunata rurallar goyay.

²⁰Upyaj runacunawan ama goturanquichu. Alläpa micojcunawanpis ama goturanquichu.

²¹Upyajcunawan alläpa micojcunaga ushapacangami. Guellacunapis sajpi röpallatami jaticonga.

²²Taytayquita wiyacunqui. Mamayqui chacwanyaptin rispitanqui.

²³Alli tantiyaj yachaj caytaga imanöpapis yachacuy. Yachaj cayta, tantiyaj cayta imanöpapis ashiy. Chay tarishayquitaga ama imawanpis rucachiychu.

²⁴Alli yarpayniyoj, yachaj wamrapa taytanga «wamrä alli yachan» nir fiyupami cushiconga.

²⁵Gamga mamayquita taytayquita cushicachiy. «Wamrä alli yachajmi» nir cushisha goyächun.

²⁶Ïju, willapashäcunata sumaj wiyacuy. Noga imanömi goyashcä; chayno gampis goyay.

²⁷Cuerpunwan gänapacoj warmiga yanauyaycaj ruri uchcunömi. Jäpa warmiga yanauyaycaj cañipu uchcunömi.

²⁸Runacunataga suwano sumaj ricapan. Nircur ollgu runacunataga jucta-juctapis pirdisyunman chayachin.

²⁹¿Pitaj ñacan? ¿Pitaj nanächicun? ¿Picunataj rimanacullar, wagallar goyan? ¿Piraj pitapis mana gallaripaycällar malubracun? ¿Picunaparaj ñawinpis yawartasha?

³⁰Chaynöga carcaycan upyallacho goyajcunami, machächicojcunata rurarcur-rurarcur upyallar goyäcojcunami.

³¹Machächicojcunataga ama munapanquichu. Maysi upucuylla munapaypaj achicyaypa achicyar-rämi bäsuchöpis ricacan. Upurcorga mishquillami ultarcärin.

³²Nircurnaga culebrapa benënunnömi nanächishunqui, gueshyachishunqui.