1YAWEI det boswan God im tok. Im jingat langa ebribodi langa dijan wel, brom sanraisaid raidap langa sangodansaid.
2Det lait blanga God im shain brom Saiyan, det brabli purdiwan taun, nomo garram enijing rong.
3Det God blanga wi im kaminap, bat nomo kwaitbalawei. Bigiswan wailfaiya weya barnimap ebrijing kaman lida langa im, en garram strongwan win en jigiwan laitining raidaran langa im.
4Im jingat langa hebin en dijan wel blanga jidan witnis wen im jadjim im pipul olabat.
5Im tok, “Majurrumap main pipul olabat, detlot hu jidan trubalawei langa mi, en hubin meigim strongwan pramis garram mi wen deibin bringim sekrifais ofring langa mi.”
6Ebrijing langa hebin tok, “Oni God im jidan jadj, en im oldei dum ebrijing raitwei.”
7God im tok, “Main pipul olabat, mi na God. Yumob Isreil pipul, mi na blanga yumob God. Yumob lisin en ai garra tok blanga yumob nogudbalawei.
8Ai nomo tok yumob dumbat rong ting wen yumob oldei gibit sekrifais ofring langa mi, en wen yumob oldei bringimap ola ofring langa mi en barnim olabat,
9bat ai nomo wandim yumob ofring, ol detlot buligi en nenigout brom yumob fam.
10Ola enimul langa bush, olabat main, en ola buligi langa ola hil kantri main du.
11Ola wailwan bard blanga main, en ola laibwan ting langa dijan kantri main du.
12“If ai bina hanggribala, ai nomo bina askim yumob blanga daga, dumaji dijan wel en ebrijing weya jidan iya, olabat blanga main.
13Wen yumob gibit sekrifais ofring langa mi, yumob reken mi dagat det bifpat blanga buligi, o dringgim det blad blanga nenigout? Nomo.
14Mi na det Boswan God, en ai wandim yumob blanga gibit mi dijan sekrifais ofring na. Ai wandim yumob blanga gibit theingks langa mi, en dum ebrijing yumob bin pramisim langa mi.
15Wen trabul kaman, jingat langa mi. Ai garra seibum yumob, en yumob garra preisim mi.”
16Bat God tok langa ola brabli nogudbala pipul, “Yumob oldei toktok ol main lowa, bat yumob nomo wandim mi blanga streitinimap yumob. Yumob oldei tokabat main strongwan pramis, bat yumob nomo teiknodis langa main lowa.
18Wen yumob midap garram eni stilinbala pipul yumob meigim fren garram olabat, en yumob joinin garram ola pipul hu laigim silipsilipbat garram najamen waif o najagel hasbin.
19“Yumob oldei tok nogudwei blanga enibodi. Yumob oldei dalimbat laiya stori blanga enibodi.
20Yumob jidan redi blanga bleim yumob ronwan femili olabat, en deigimbat yan blanga olabat.
21Yumob bin dumbat ol dislot ting na, en ai nomo bin tok enijing. Maitbi yumob bin reken aibin seim laik yumob, bat najing. Aibin jidan witnis blanga detlot rong ting, en ai garra dalimbat yumob streidat blanga ola nogudbala ting weya yumob bin dumbat.
22“Ol yumob hu nomo irrim mi, yumob irrim dijan na, bambai ai garra binijimap yumob, en nobodi kaan seibum yumob.
23Wen enibodi gibit theingks langa mi, tharran na det sekrifais ofring weya gibit mi rispek brabliwei, en ai garra seibum ol detlot hu irrim en teiknodis langa mi brabliwei.”
