1Ebribodi, yumob irrim dijan! Yumob irrim, ola pipul brom ebriweya,
2nomeda yu haibala o lobalawan, en nomeda yu ritjwan o powan.
3Ai garra jinggabat gudwei, en ai garra tok brabli gudbala wed.
4Ai garra jinggabat ola sabibala wed weya main grengrenfathamob bin tok, en ai garra dalimbat det mining langa ola pipul wen mi sing garram main gita.
5Ai nomo bradin wen mi langa deinja, en wen ola enami jidan raidaran langa mi.
6Olabat oldei trastimbat ebrijing dei garram, en tok praudwei blanga olabat ebrijing.
7Wi kaan meigim miselp fri, en wi kaan peiyim God blanga wi laif,
8dumaji im brabli diyawan blanga peiyim blanga pipul laif. If wi bina peiyim, stil tharran nomo bina naf
9blanga kipumwei wi brom det greibyad, en blanga larram wi jidan laibala olagijawan.
10Ebribodi sabi klebawan pipul dai, en medwan en siliwan pipul ol dai du, en olabat libum olabat ebrijing langa olabat femili.
11Olabat ronwan greib jidan olabat kemp. Deya na dei garra jidan olagijawan, nomeda deibin abum dei ronwan kantri basdam.
12Nomeda pipul jidan ritjwan, olabat garra stil dai jis laik ola enimul.
13Yu luk wanim garra hepin langa detlot hu oldei trastimbat olabat ronselp, en hu oldei laigim blanga jidan brabli ritjwan.
14Olabat garra dai jis laik ship, en deth garra jidan stakmen blanga olabat, en im garra deigim olabat streit langa greib. Olabat bodi garra go nogudwan langa det wel weya ola ded pipul jidan.
15Bat God garra baiyimbek mi brom det greib, en im garra deigim mi blanga jidan garram im.
16Yu nomo wori wen sambodi jidan ritjwan, en wen im kipgon pailimapbat mowa ebrijing.
17Im kaan deigim enijing garram im wen im dai. Im ebrijing kaan godan langa greib garram im.
18Nomeda if det sambodi im sedisfaid garram dijan laif, en dei preisim im dumaji im brabli ritjwan,
19bat im garra go langa det greib en joinap garram im femilimob hubin dai bifo, en jidan langa det dakbala pleis olagijawan.
20Nomeda im jidan haibala, im garra stil dai. Im garra dai jis laik ola enimul.
