Text copied!
CopyCompare
Kâte Bible - Mumutara Ŋic

Mumutara Ŋic 14

Help us?
Click on verse(s) to share them!
1Simsoŋ e Timinata haeo hurâ ira Filisa ŋic jaŋere naru moc honewec.
2Erâ risierâ neŋgoc mamac jahec‐ticne ʒiŋuc jasawec: “No Timinata haeo Filisa ŋic jaŋere naru moc honepac i ŋonâŋ‐nane eocte ronarezepirec.”
3Mume neŋgoc mamac jahec‐ticne jahe âzâcnerâ mupic: “Go gahacne guruo me ŋicfâc‐nâŋec jaŋerao ŋokac moc mi juŋgopieŋ me? Irec go Filisa ŋic sahac tofa‐jeŋicko mi hezuc‐jopakicne jaŋeraonec ŋonâŋ moc rocmu?” Mupire Simsoŋzi muwec: “Ere boc enarekacte sifu ronarezepirec.”
4Neŋgoc mamac jahec‐ticne jahe wiac i Wofuŋte mamanao fuawec i mi mana tarapic. E hata moc fuame Filisa ŋic râsi fisi‐jareocte manasuwec hâcne. Dameŋ ira Filisa ŋic jaŋe Israe ŋic rauc‐joparâ jumbiŋ.
5Eme Simsoŋ e neŋgoc mamac jahec‐ticne jahehec Timinata haeo humbiŋ. Eme Simsoŋ e Timinata jaŋere waiŋ gieo ra fisiwec. Ehame laioŋ motec ɋâri moczi owackehuc kizo warewec.
6Iŋuc eme Wofuŋte Mârozi neŋgoc ŋesiŋ ŋecnehame lama motecnere mecqaŋeŋ bâsieeŋgopieŋ irec sâc laioŋte mecqaŋeŋ bâsieme hâmowec. Simsoŋ e meticnao wiac moc mi bajuwec. Eme wiac ewec i neŋgoc mamac jahec‐ticne mi jasawec.
7Iŋuc erâ hume ŋokachec dâŋ dâŋepic. Eme e maŋticnezi ŋokactao boc domawec.
8Juku dameŋ mocko ŋokac jowaocte huwec. Ehuc laioŋ qâŋɋâŋ‐ticne honeocte raʒiwec. Raʒirâ baŋac neŋgocne guru sâko baŋac fârinehec fome honewec.
9Honerâ meticnao rome feme ameckerâ rahuc nânârâ rawec. Raku neŋgoc mamac jahec‐ticne jaherao fisirâ jahe wâc jacteme nâpic. Laioŋte qâŋɋâŋkonec baŋac rowec i ine mi jasawec.
10Eme dameŋ ira Simsoŋ mamac‐ticne e motec ŋokac‐ticnere dâŋ mutarazore huwec. Simsoŋ e jahacne ine tiwâ ʒepec rike bâmoc ewec. Motec socɋâri jaŋe iŋuc hâcne ejumbieŋ.
11Eme ŋic jaŋe e honerâ ŋicmotec 30 ehec ŋec domac eniŋte bacjopa fisimbiŋ.
12Eme Simsoŋzi jazarâ muwec: “No dâŋ herâricne moc ŋazape mananiŋ. Eme ŋoŋe tiwâ ʒepec‐naneoa juhuc ʒoaŋ gie bapa 7 irec maŋnao dâŋ herâricne irec fârine bâfuapie ŋaqi maŋne 30 â hombaŋ ŋaqi 30 jaha wâc ŋarepemu.
13Â ŋoŋe irec fârine mi nazaniŋmuo ine ŋaqi maŋne 30 â hombaŋ ŋaqi 30 jaha no nareniŋmu.” Iŋuc mume âzâcnerâ mumbiŋ: “Dâŋ herâricne muzo mukic i mutec mananaŋ.”
14Mupie Simsoŋzi jazawec: “Soroŋ qaqa eraonec wiac nânâne fuawec. Tâpirihec eraonec wiac aŋacne fuawec.” Eme ŋic jaŋe ʒoaŋ gie bapa jahec â moc irec maŋnao dâŋ herâricnere fârine biac mi bâfuarâ âzâcnembiŋ.
15Eme hae fureme Simsoŋ ŋonâŋ‐ticne âzâcnerâ mumbiŋ: “Go ŋowege mu âkeriŋ ecnetec dâŋ herâricnere fârine nâzâzejec. Go iŋuc mi ecmuo ine go gahacne â garikiŋfâcge ʒoczi rikec‐ŋopanaŋmu. Ŋoŋe hapetac bacnâponiŋte ʒira hefârec‐nâpombieŋ me?”
16Iŋuc mupie Simsoŋ ŋonâŋ‐ticnezi kiocnehuc muwec: “Go mâc bâsuecnuhuc maŋzi moc mi ʒâficnukomec. Go dâŋ herâricne ŋicfâc‐nane jazahuc irec fârine no mi nazameŋ.” Mume Simsoŋzi muwec: “Manakic, no neŋgoc mamac jahec‐nane wâc mi jasapo. Eme ʒi go gazapemurâ mukomec me?”
17Iŋuc mume ŋokac e tiwâ ʒepec irec maŋnao kiocnehuc jaha juhame ʒoaŋ gie bapa 7 tarazo ewec. Eme e ŋokaczi boc ʒoɋac ecnewecte ʒoaŋ gie bapa 7 ira dâŋ herâricnere fârine mutaniŋkehuc âzâcne‐fârewec. Âzâcne‐fâreme ŋokaczi ra gurufâc‐ticne jazawec.
18Ehame ʒoaŋ gie bapa 7 ira ʒoaŋ huzo eme hae irec ŋic jaŋe Simsoŋ âzâcnerâ mumbiŋ: “Wiac aŋacnehec i baŋac â wiac tâpirihec i laioŋ.” Mupie ʒiŋuc jazawec: “Qâto‐nanezi hawec karaŋ mi bame muzac dâŋ herâricnere fârine mi bâfuanʒapiŋ.”

19Eme Wofuŋte Mârozi Simsoŋ esoc qafeŋ ecneme Asikaloŋ haeo hurâ irec ŋic 30 jopahuc ŋaqi‐jeŋic rofârerâ dâŋ herâricnere fârine âzâcnembiŋ jaŋe jarewec. Iŋuc erâ aaricke sâqoreha mamac‐ticnere haeo risiewec.
20Rahame Simsoŋte ŋonâŋ rorâ wiʒec‐ticne râcnembiŋ.