1Israe ŋic jaŋe Wofuŋte maio wiac mamakâcne embiŋ. Iŋuc epie Wofuŋzi Midiaŋ ŋic jaŋere meo râec‐jopame jara 7 jumbiŋ.
2Ehame Midiaŋ ŋic jaŋe Israe ŋic fific bacjopambiŋ. Iŋuc ejarepie Israe ŋic jaŋe ŋeŋe juju hawec‐jeŋic tikio gufu rambiŋ, erâ qânâ hawec emasaŋkembiŋ â fic sacsanaŋhec barambiŋ wâc.
3Israe ŋic jaŋe he sarac epie sâc Midiaŋ ŋic â Ameleke ŋic, erâ ʒoaŋ wewefunaonec gâcne jaŋe heâckerâ fisi‐jare jumbieŋ.
4Jaŋe râsi fisi‐jarerâ teuŋ âterâ fohuc mâreŋ ira wiac he sarac epie fowec i ima bahapie raku Gaza hae heririŋko mâreŋ gâcne forawec ira fisiwec. Iŋuc ehuc Israe ŋic jaŋere nânâ wiac me lama â doŋgi i moc mi akickembiŋ.
5Midiaŋ ŋic jaŋe kamele â qoruc boze‐jeŋichec afecne mâcne, waŋgambec qoki iŋucne, wowosene tâmiric fisipie mâreŋ i burockerâ fowec.
6Midiaŋ ŋic jaŋe iŋuc ehuc Israe ŋic bâuruŋ‐jopambiŋ. Eme Israe ŋic jaŋe Wofuŋ kio wâwâsic ecnembiŋ.
7Israe ŋic jaŋe Midiaŋ ŋic jaŋere meo juhuc Wofuŋ kio wâwâsic ecnepie
8Wofuŋzi porofete moc soreme ra kecʒiŋuc muhuc jazawec: “Israe ere Wofuŋ Anutu e ʒiŋuc mukac: No Aigita mâreŋte niŋgiŋkonec batarac‐ŋoparâ jowac‐ŋopa wefupo.
9Ehuc Aigita ŋic jaŋere meonec mecne â ŋic gâcnezi fific bacŋopambiŋ jaŋere meonec mecne firuec‐ŋopapo. Ehuc jaŋe ŋoŋere erâ jopa jâpec ejarehuc mâreŋ‐jeŋic ŋarepo.
10Erâ ʒiŋuc ŋazapo: ‘No ŋoŋere Wofuŋ Anutu; ŋoŋe Amori ŋic jaŋere mâreŋko juhuc nemufâc‐jeŋic moc mi dape‐jarenʒepieŋ.’ Iŋuc ŋazahape ŋoŋe ine sifu dâŋnanere hazec moc mi râembiŋ.”
11Eme Wofuŋte kiŋaŋŋiczi Ofira haeo fisirâ Abieʒe ŋic Joasi ere boriŋfuŋko waha ŋewec. Joasi ŋokâ‐ticne Gideoŋ e Midiaŋ ŋic jaŋere erâ padi‐ticne soŋkeocte waiŋ qaqa nombâŋko ra qahuc juhame iŋuc fuawec.
12Ehame Wofuŋte kiŋaŋŋiczi fuacnehuc âzâcnerâ muwec: “Wofuŋ e gohec jukac. Go ʒikaŋic tâpiri sâkohec.”
13Mume Gideoŋzi micnao rohuc muwec: “Bomboŋ, Wofuŋ e nâŋâcnehec juhame wemocte wiac sasawa ʒi fua‐nârehuc fokac? Apa ŋosafâc‐nâŋec jaŋe Wofuŋte eehâmo biaŋ irec hewirickehuc dâŋ binaŋ enârehuc ʒiŋuc nâzâmbiŋ: Wofuŋ e Aigita mâreŋkonec jowac‐nâpowec hâcne. Erâ i fârine weni? Ʒi ine Wofuŋzi behec‐nâpo sanaŋkehuc Midiaŋ ŋic jaŋere meo râec‐nâpowec.”
14Mume Wofuŋzi erao ʒâŋe fihuc ʒiŋuc âzâcnewec: “Tâpirige fokac i, irec rarâ Israe ŋic Midiaŋ jaŋere meonec batarac‐jopazemec. No iŋuc ecmurâ sorecgukopac hâcne.”
15Eme Gideoŋzi muwec: “Bomboŋ, no weniŋucko Israe ŋic batarac‐jopapemu. Manakic, Manasere guruo nore guruzi tâpiri tâmiric jâmbâŋ ekac. Erâ wâc no garikiŋ guru‐naneo ŋic wawahane jâmbâŋ jukopac.”
16Iŋuc mume Wofuŋzi dâŋ ʒiŋuc bâtikiecnewec: “Irec hâcne no gohec jupemu. Eme go Midiaŋ ŋic jaŋe ŋic mocjaha tinac jopacmu.”
17Mume âzâcnewec: “Dâŋ nazakomec irec ehuc mana‐naretec sâckeme ma moc nowatutec fuŋnege manazepac.
18Go biac mi rahuc ʒira ŋehaŋtec rarâ wiac piticne mac moc baware‐garezepac.” Eme eki muwec: “No ʒira ŋehape rarâ risiezemec.”
19Iŋuc mume Gideoŋ e ficticnao rarâ noniŋ motecne moc qarâ rikewec. Ehuc poroŋ uucne foŋ moc rorâ goreŋ tâmiric rikewec. Eme qowi i kâdoc mocko râerâ sicticne kuʒi mocko qame hume bararâ boriŋfuŋko hecnewec.
20Iŋuc eme Anuture kiŋaŋŋiczi ʒiŋuc âzâcnewec: “Qowi â poroŋ goreŋ tâmiric i rorâ qânâ ʒirec faio râec, qowi sicticne ine hoŋketec raoc.” Mume Gideoŋ e iŋuc ewec.
21Eme Wofuŋte kiŋaŋŋic e gunu‐ticnere botâŋnezi qowi â poroŋ goreŋ tâmiric i qâuawec. Qâuame izia qânâonec ʒocbâruŋ fuarâ qowi biucne â poroŋ i ʒâseŋkewec. Iŋuc fuame Wofuŋte kiŋaŋŋic e sipuac ewec.
22Sipuac eme Gideoŋ e ʒiŋuc mana tarawec: E Wofuŋte aŋelo. Ehuc muwec: “O jei, Wofuŋ Anutu! No Wofuŋte aŋelo ʒâŋe fâri‐nanezi honepac i.”
23Eme Wofuŋzi âzâcnewec: “Wama gorao fozejec. Mi hâwicguoc, go mi hâmocmu.”
24Mume Gideoŋzi ira Wofuŋte alata moc bawec. Ehuc irec ʒâŋe ʒiŋuc muwec: Wofuŋ e wama. Eme alata i Abieʒe ŋic jaŋere hae Ofira ira ŋeweczi ŋekac jaha.
25Eme ŋafe ira Wofuŋzi âzâcnerâ muwec: “Mamacgere bulimakao ŋicne motec ɋâri moc rozemec. Erâ ʒuhuckerâ moc jara‐ticne 7 i rozemec wâc. Ehuc mamacgere biŋe Baalire alata ŋekac i hetâtiezemec â Asera nemuɋâŋ ŋifecnao domakac i wâc henʒaŋnezemec.
26Erâ qânâ tiki ʒirec faio qânâ sâckoa râe guruc ehuc Wofuŋ Anutugere alata moc bazemec. Erâ bulimakao ŋicne jara‐ticne 7 i rorâ Asera nemuɋâŋ henʒaŋnecmu ʒoc izi bâzi rikezemec.”
27Mume Gideoŋ e kiŋaŋŋicfâc‐ticne jaŋeraonec ŋic 10 rocjoparâ Wofuŋzi âzâcnewec irec sâcko ewec. Erâ wiac i ʒoaŋko eocte wiacfâc‐ticne â hae irec ŋic jaŋere boc hâwicke sâqorewecte ŋafeo ewec.
28Eme hae fureme ŋic jaŋe faharerâ honembiŋ: Baalire alata â Asera nemuɋâŋ i hetâtiekicne fowec. Erâ bulimakao ŋicne jara‐ticne 7 i alata bakicne irec fainao bâzi ʒawec.
29Iŋuc honerâ nazaŋ gazaŋ ehuc mumbiŋ: “Mozi wiac ʒi ejec?” Eme irec muc manac â mu wioc eku jaha ʒiŋuc manambiŋ: “I Joasi ŋokâ‐ticne Gideoŋ eki wiac i ejec.”
30Eme ŋic jaŋe Joasi âzâcnerâ mumbiŋ: “Ŋokâge e Baalire alata â Asera nemuɋâŋ hetâtiehuc henʒaŋnejecte jowa waretec qapene hâmozejec.”
31Eme Joasizi râsi rocnembiŋ jaŋe jazarâ muwec: “Baalire erâ ʒika qaniŋmu me? Moc e ʒika qaocmuo hae mi fure taniŋkeha e wâc iŋuc jaha hâmozejec. Baali e Anuture sâc jukacko alata‐ticne hetâtiekicnere erâ e jahac ʒika qazejec.”
32Eme dameŋ ira fuŋkerâ Gideoŋte ʒâŋe Jeru‐Baali mumbiŋ, i ʒiŋuc muhuctecne: E alata‐ticne hetâtiejecte Baali e jahac okacne fisicnezejec.
33Eme Midiaŋ ŋic â Amaleke ŋic, erâ ʒoaŋ wewefunaonec ŋic gâcne qâture‐fârerâ Jordaŋ fotâcnerâ Jesere wâneŋko teuŋ âterâ fombiŋ.
34Ehame Wofuŋte Mârozi waha Gideoŋ neŋgoc ŋecnewec. Iŋuc ecneme Gideoŋ e qeŋ qahuc Abieʒe ŋic jaŋe bâjâpeniŋte hefârec‐jopawec.
35Ehuc kiŋaŋ sorec‐jopame jaŋe Manasere mâreŋ i sâckerâ rahuc ŋic hefârec‐jopapie jaŋe wâc faharembiŋ. Erâ kiŋaŋ sorec‐jopame Ase, Sebuloŋ â Naftali mâreŋko rambiŋ. Eme jaŋe wâc bâfuac‐jopaniŋte ra fisimbiŋ.
36Eme Gideoŋzi Anutu kecʒiŋuc âzâcnewec: “Gahac mumeŋ irec sâcko Israe ŋic nore mezi batarac‐jopacmurâ mukicko
37ine no lama kanʒaŋ bâtâcnekicne ʒi padi qaqa tomao râekopac. Eme titikuczi lama kanʒaŋko foocmu â rârec rârec mâreŋ kereŋne fome ine gahac mumeŋ irec sâcko ʒiŋuc manapemu: Go jâmbomac nore mezi Israe ŋic batarac‐jopacmu.”
38Eme iŋuc hâcne fuawec. Hae fureme Gideoŋ e faharerâ lama kanʒaŋ bâpisickerâ qâʒâkiriŋkeme titikuc opâne i râqâc moc fufusenere sâc ewec.
39Iŋuc fuame Gideoŋzi Anutu âzâcnerâ muwec: “Kimbeŋgezi boc mi imacnuzejec. Ʒi sawa mac mupe taraoc. Lama kanʒaŋzi buc kereŋne fozejec â rârec rârec mâreŋ i ine titikuczi hefârezejec.”
40Eme ŋafe ira Anutuzi mume iŋuc hâcne fuawec. Lama kanʒaŋ sawa kereŋne fowec â rârec rârec mâreŋ i ine titikuczi hefârewec.
