Text copied!
CopyCompare
Habo nalolene bi gahenge lo winigo ogo - Haguane Heneru

Haguane Heneru 14

Help us?
Click on verse(s) to share them!
1Horo mbirungi Samasono ibu Timuna dindi yupe halu hearia Pilidia wandari mbira de hondo wini.
2De hondo wialu ibu ai̱ya abala lamule andaga dai bini. Dai buwa ibu ai̱ya abalahondo lalu, Pilidia wandari mbira Timuna dindini berearia hondo wialu ebero, lene. Ogoni dabu bulene hamelo kogo damu pu hadaba, lene.
3Ani layagola ibu aba ai̱yalame ibuhondo mbira hale halu lalu, Í̠na Pilidialiru Ngode Datagaliwabe mitangi nabiaga hearunaga wali damialu í̠ one hole hame laridago irane agibe. Í̠na wandari inane wali agali hameigini kamagoria bedaru aria handalu nadamibehedabe, lene. Ani layagola Samasonohanda ibu abahondo ladai bialu lalu, Í̠na i̱naga wali damia habelo hame ledogo ogoniorego ogoni damia habe, lene.
4Ogonidagua layadagoni Anduane Homogo ibugua Samasonohanda Pilidiali heba wai bilo haru pole henge tai binigonaga Samasono aba ai̱yalame manda nabi hene. Ogoningi Isaraele wali agali Pilidialirume haru hene.
5Ani binigo Samasono ibu ai̱ya abala heba Timuna dindi dalipe halu pene. Ogoniha pole pialu hemiria pu mbira mini gerebinaga lini dendebi daga mabu wiagoria budi gabua ale timbuni mini laiono daula mbira ngororo layuago ibu hale hene.
6Abale hale hayaore Anduane Homogonaga hongo holeneme Samasono mo hongo hene. Ani biagola ibugua laiono biagoni ibunaga gi hangume nogo meme daula mbirago minu dogokihe laradagua bilene. Ani binigo ogoni ogodagua biru lalu ibugua biyagoni ibu ai̱ya abala nalamini.
7Ani bialu ibu puwa wandari biago hame lowa mo bila hene.
8Horo kira agima howa mani Samasono ibu lone dai buwa wandari biago dabu bule pene. Ani bule harigani pialu howa Samasono ibu hariga tene yu wahalu pu bagi howa laiono abale bo wialu piyago hondo pene. Puwa handalu hearia laiono biagoniha mone tara gibi tidiyu halu mone ibane dewaore laiono homene biago kabaneha dearia mogolo hendene.
9Hondowa ibunaga gime mone ibane biago kedo mialu nama nama pene. Ani bialu ibu aba ai̱yala hearia pialu libubi maru kedo yalu puwa nelo mini. Ani biyagola libugua nenego Samasonohanda mone tara ibane ogoni laiono homene mbira kabaneha deneyago kedo yinigo lalu libuhondo nalamini.
10Ani bialu Samasono aba ibu wandari biago andaga piyagola Samasonohanda tomo ogoniha daweneyago dewalime nene. Ogoni agali daliaheru tinaga mana mbira biaga winidagua bini.
11Ibugua aguani bialu heago Pilidia agalirume de hondowa tigua agali daliahe pira tebira (30) ibu heba helo ibilene.
12Ani biyagola Samasonohanda agali daliahe biaruhondo lalu, I̱na bi yobage mbira tígua dabalu galone ladai bilimulo lolene ngago larogo, lene. Ani lowa tígua galone ogoni langeramigola tí hangu hanguhondo ngule lowa labolabo bayaleore mbira mbirabi aga biagimbu bulene marubi bayaleru dabo wia ko, lene. Tígua nalangibehe harimiyagua wali dabu bialu horo karu tomo dawaganego kane bolangua nakaore aga labolaboru bulene bayale ogoni aribia halu tígua i̱ ngulene wulebira, lene. Ani layagola tigua lalu, Í̠naga bi yobage ogoni iname hale hole kamago langia berene, lene.
14Ani layagola ibugua lalu, Naganeha howa mbirale nolene ale tagira ibini. Hongoheha howa mbirale dende bulene tagira ibini. Ai ogoninaga galone langilimu, lene. Ogoninaga galone ogo aleda lalu mbira dabalu ladai nabi dege hemine horo tebira bibahende piai hene.
15Horo manegoria tigua Samasono onehondo lalu, Í̠na í̠ agalini mo hondo halu galone ogoni inahondo langule ogo ale lalu langi labe. Í̠na ogonidagua nalangiriyagua iname í̠ abanaga anda heda halu í̠ heba daanda heloleberema. Libu kirabalime ina ibalimu laribigoni inanaga mbirale mo page bule oharibibe, lene.
16Ani layagola Samasono one dugu bima ibu hearia puwa lalu, Í̠na i̱ gubalini nahe i̱hondo handabe mangaho kegonida. Í̠na i̱ dameneruhondo bi yobage lowa lamirigoni galone ogo ale lalu i̱hondo nalangirigo, lene. Ani layagola ibugua lalu, I̱ni aba ai̱yala mbira nalami ngogodago i̱na í̠hondo langulenego irane aginagabe, lene.
17Ogonidagua layagola horo karu dabu bialu tomo dawalu hayadagoniha dugu dege bialu berene. Ani dege bialu bereagola howa nde bi dugula haru biaho wiaabo ogoni mangabidago lowa ai horo kanengiore galone biago lamini. Lamiyagola ibugua Pilidiali biaruhondo lamini.
18Lamiyagola Pilidia agali biaru horo kane ogoningi Samasono ibuni tamuha palue pole biyaria tigua ibuhondo lalu, Monenaga dendego dindiha lowa dendebiore agibe. Laiononaga hongogo dindiha lowa hongo daligaheore agibe, lene. Ani layagola Samasonohanda ladai bialu lalu, Tí i̱naga nogo bulumaga daluame dindi nagodongidale nde galone áyu ogoni manda nabi kamile, lalu lene.
19Abale ani layaore Anduane Homogonaga hongome Samasono ibu mo hongo hene. Ani biya handala ibu Asagelono dindi daliape howa ogoriani agali pira tebiranaga aga bu hearu minu golalu homelo bo wahai hene. Ani bialu tinaga aga bayaore biaruni golalu agali maru tigua bi yobage biago ogo ale lalu lamiyaruhondo golo migi bini. Aguani buwa o biyarunaga keba gibiore ho yalu ibuni andaga dai bini.

20Ani buwa ibu one biago agali ibu nenege mbira ibu wali dabu biyangi libu haru mandagi ho palu biribigo ibu hado mini.