1Ehame Jeru‐Baali, Gideoŋ hâcne, e â ŋicfâc‐ticne jaŋe furic uupictea faharerâ Haroda opâ ŋifecnao teuŋ âtembiŋ. Ehame Midiaŋ ŋic jaŋere teuŋzi faicpec More tiki heririŋ wâneŋko fowec.
2Eme Wofuŋzi Gideoŋ ʒiŋuc âzâcnewec: “Ŋicfâcge jaŋe guru sâkore noni Midiaŋ ŋic mejeŋicko rârâec‐jopanere sâc mi ekac. Jaŋe sahac‐jeŋic bafehuc ʒiŋuc munʒipiŋkohec: ‘Nâŋe nâŋâc sanaŋkembeŋ.’
3Irec ʒiŋuc muhuc muromacketec hazec‐jeŋic sâc hufâreoc: ‘Hâhâwic ehuc ɋarac ɋarac qakaczi Gileade tikionec risierâ hae‐ticnao razejec.’” Eme 22 tauseŋ jaŋe risiehapie 10 tauseŋ jaŋe jumbiŋ.
4Eme Wofuŋzi Gideoŋ mocwâc âzâcne muwec: “Ŋic jaŋe guru sâko jaha eŋgopieŋte jowac‐jopatec opâo hupie ira esâic‐jopazepac. Eme ŋic e me e gohec raocte mupe gohec raocmu, â ŋic e me e gohec mi raocte mupe gohec mi raocmu.”
5Irec Gideoŋzi ŋic jowac‐jopame opâo humbiŋ. Eme Wofuŋzi ʒiŋuc âzâcnewec: “Qâtozi eekac irec sâc daperâ opâ nâniŋmu jaŋe guru moc bacjopazemec. Â dieŋzi herâ opâ nâniŋmu jaŋe wâc sâc ijaha ejarezemec.”
6Eme daperâ mezi fiahuc nâmbiŋ jaŋere ʒare 300 ewec. Â gâcne sâko jaŋe ine opâ nâniŋte dieŋzi hembiŋ.
7Iŋuc epie Wofuŋzi Gideoŋ âzâcnerâ muwec: “Opâ mezi fia nâc embieŋ jaŋehec juhuc batarac‐ŋopapemu, ehuc Midiaŋ ŋic gore meo râec‐jopapemu. Â gâcne sâko jaŋe ine hae‐jeŋic sâc ranʒepieŋ.”
8Eme jaŋeraonec kuʒi â qeŋ i rombiŋ. Rohapie Gideoŋzi Israe ŋic gâcne sâko jaŋe hae‐jeŋic sâc sorec‐jopame rahapie ŋic 300 jaŋe ine sakarec‐jopawec. Eme Midiaŋ ŋic jaŋere teuŋzi juwicnao wâneŋko fowec.
9Ŋafe ira Wofuŋzi Gideoŋ âzâcnerâ muwec: “Faharerâ teuŋ‐jeŋicko huc. No teuŋ i gore meo râekopac.
10Eme teuŋko buc huzore hâwicgukacko ine kiŋaŋŋicge Purahec huzepirec.
11Ehuc jaŋe weniŋuc muniŋmu i manazemec. Eme irec faicnao ine tâpirige fuame teuŋ râsi fisicnecmu.” Eme Gideoŋ e kiŋaŋŋic‐ticne Purahec râsi fombiŋ teuŋ irec qaŋeŋnao hupic.
12Ehame Midiaŋ ŋic, Amaleke ŋic â ʒoaŋ wewefunaonec ŋic gâcne jaŋe wâneŋko waŋgambec qokic iŋucne guru dindiŋ jâmbâŋ fombiŋ. Erâ kamelefâc‐jeŋic hâmbâŋ sâko jâmbâŋ wowosene tâmiric hâwec moŋgeŋ iŋucne fombiŋ wâc.
13Eme Gideoŋ e fisirâ manahame ŋic moczi guŋ manawec i momori âgofâcne jazawec. Ehuc muwec: “Manaŋgopieŋ, no guŋ moc manapac ine gai huŋ hândâŋ bakicnezi heherâ waha Midiaŋ teuŋ‐nâŋecko raʒirâ qoruc boze wiac hetâtie rajec.”
14Eme momori âgofâcne jaŋe fuŋne bâtikiecnehuc mumbiŋ: “I wiac moc aricne, i Israe ŋic moc ʒâŋene Gideoŋ, Joasi ŋokâ‐ticne ere ʒika. Anutuzi Midiaŋ â momori sasawa ere meo hâcne râec‐nâpojec.”
15Eme Gideoŋ e guŋ â irec fuŋne mukicne i manarâ daŋge mumuteŋ ewec. Ehuc Israe ŋic jaŋere teuŋko risierâ muwec: “Fahareniŋ, Wofuŋ e Midiaŋ momori guru meŋeŋicko râec‐jopakac.”
16Eme ŋic 300 jaŋe bâfâuc‐jopame guru jahec â moc embiŋ. Ehuc kuʒi tacne irec maŋnao waha râerâ qeŋhec mâmâc mejeŋic sâc râewec.
17Ehuc ʒiŋuc jazawec: “Norao fipie wareoc, erâ epe irec sâc jaha enʒepieŋ. Teuŋ qaŋeŋnao fisirâ epemu irec sâc enʒepieŋ hâcne.
18No â gurufâc‐nane nâŋe qeŋ qapene teuŋ ŋifec â ŋifec iŋuc jaha qeŋ qafârerâ ʒiŋuc muhuc owackenʒepieŋ: ‘Wofuŋ â Gideoŋ jahere biŋe.’”
19Eme râsi jaŋe ŋafe ʒâʒâŋiŋte soŋaŋ guru moc âkendâŋ‐jopahapie Gideoŋ â ŋic 300 jaŋe teuŋ qaŋeŋnao fisimbiŋ. Erâ qeŋ qahuc kuʒi bajumbiŋ i qanʒaŋnembiŋ.
20Erâ me qanazi waha bahuc kuʒi qanʒaŋnembiŋ â fâre‐jeŋiczi ine qeŋ qaniŋte bambiŋ. Ehuc owackerâ mumbiŋ: “Wofuŋ â Gideoŋ jahere ʒika!”
21Jaŋe dodoma‐jeŋic sâc teuŋ orâŋke‐fârerâ domahapie râsi jaŋe owackehuc gasackerâ wisembiŋ.
22Eme ŋic 300 jaŋe qeŋ qahapie Wofuŋzi râsi jaŋacne ʒika i bâtikieme momorifâc‐jeŋic jaŋere faio fewec. Ehame wiserâ raku Tabata mâreŋkopec Abe‐Mehola mâreŋ qaŋeŋnao Bete‐Sita â Zereda haeo fisimbiŋ.
23Eme Israe ŋic Naftali mâreŋkonec, Ase mâreŋkonec â Manase mâreŋkonec sasawa jaŋe hefârec‐jopapie Midiaŋ ŋic jopa jâpec ejarembiŋ.
24Eme Gideoŋ e ʒiŋuc muhuc kiŋaŋ sorec‐jopame Eferaim tiki mâreŋ sâckerâ rambiŋ: “Midiaŋ ŋic râsi ejarehuc waha opâ forakac i âte bâzickepie raku Bete‐Bara haeo â Jordaŋ opâo mâmâc fisizejec.” Irec Eferaim ŋic hefârec‐jopapie jaŋe opâ sasawa i âte bâzickepie raku Bete‐Bara haeo â Jordaŋ opâo wâc fisiwec.
25Eme jaŋe iŋuc ehuc Midiaŋ ŋic fekicne jahec‐jeŋic Orebe â Ʒebe rocjofambiŋ. Ehuc Orebe e Orebere qânâ ira qâhâmombiŋ â Ʒebe e ine Ʒebere waiŋ qaqa tomao ira qâhâmombiŋ. I Midiaŋ ŋic jopa jâpec ejarehuc iŋuc hâcne embiŋ. Ehuc Orebe â Ʒebe jahere qizec i Jordaŋ ŋifecnao Gideoŋtao bafisimbiŋ.
