Text copied!
CopyCompare
Qaraaka Uva Tivatora - Qiata Vaiintinavu

Qiata Vaiintinavu 14

Help us?
Click on verse(s) to share them!
1Vo enta Samsoniva Timna vatukaini otuntero tavovaro Pirisia varaata vovano mini vaura.
2Ho Samsoniva oturantero nai noka qokara tiharo, Te Timnaini vaiha tavauraro Pirisia nahenti vovano vaivo. Netanta vira vite uriqe te vira varaare, tiro.
3Minti tumanta vira noka qoka aqao ti, Kiae are tinavu ankuqihairave, tinavu Isareriqihairave, nahenti vo varerava vaivo? Nantivarae are Pirisia vo vatanaakaqihaira nahenti varareva auti variaro? Vika qorainti vaata kia toqake variakave, ti. Minti tuvarovata, Samsoniva nai qorara tiharo, Vi nahentirara ti hantuqa harivo. Are vira otu vite uriraqe te vira varaare, tura.
4(Vira noka qoka kia iruvaro Noravano Kotiva Pirisia hampata iqoka qovaraiqiarire tiro, vi avu aatora Samsonira amura. Vi entara Pirisia vika Isareriqaa raqiki vaura.)
5Ho Samsoniva nai noka qoka hampata Timnaini vura. Vinavuka Timna tataaqa uaini naaho vaunaini otuntovaro vaakama qaraaka raioni vovano Samsonira arukareva noraiqaakero uva tivaqiro anura.
6Mintuvaro Nora Kotira Maraquravano Samsonira kempukaiqama kovaro viva qaqi nai kauquqohairo memeraa naati tavaara nkahi kaintemakero, raioni vira nkahi kora. Viva raioni arukero kia nai noka qoka tiva nimura.
7Mintima kero Samsoniva otu vi nahentira hampata uva ti vauvaro vira antuqavano virara vaura.
8Ho vo entanavu aitarovaro Samsoniva vi nahentira varareva vura. Viva mini viharo raioni arukora tavareva aara kero oru tavovaro airi bivata hanivata raioni vaataqi vauvaro
9viva nai kauquqohairo hani vaqitakero varero aaraini viharo hani vira namaqiro viro oru nai noka qoka qaiqaa ntitakero hani vitantavata nimura. Viva hani raioni vaataqihairo varatora kia vitanta tiva nimura.
10Ho vira qova nahenti vira tavareva vuvaro Samsoniva qaraaka vaiinti nahenti varare u okarara avataqiro viharo nora kara vi vatanaaka mini unta nimura.
11Pirisia vika Samsonira tave, vika qaraaka vaiinti 30navu vira airuqiate ti, viva unaini varakora.
12Samsoniva vikara tiharo, Kaiqe te uva vo tuqantaake ni tiva nimiare. Tenavu 7 entara maa karara namaqi vi variari ne vi uvara okara ho tiva timivera, te tavuna 30navuvata, utavaaqa 30navuvata ni nimirerave.
13Ne kia ho vi uvara okara ti tiva timivera, ne tavuna 30navuvata, utavaaqa 30navuvata ti timiate, tumanta vika tiha, Ho vi uvara tuqantaakera tinavu tiva timiane. Are tiraqe iriare, ti.
14Minti tuvaro viva tiharo, Kara ne vai haikaraqihairo kara naa haikava qovaraiqivo. Kempuka haikaqihairo hiakaa i haikava qovaraiqivo, tiro. Minti tumanta vika taaramo enta aato utuqi viha kia vi uvara okara rantakora.
15Ho 4 entaqaa vika Samsonira naatara tiha, Nena vaatiara uqerara uva tiraro viva vi uvara okara ai tiva amiarire. Are kia mintirera, tenavu ai qora naavu iha umpiarama kaariraro ihavano aivata tatoqa kaarire. Netanta tinavu airaira muara vararekae tinavu haaraavo? ti.
16Minti tuvaro Samsonira naatavano oru vira avuqaa iqi rateharo tiharo, Mpo, ai kia tiriara hantuqa harivo. Ai muntukavano kia tiriara vaivo. Are ti navunaaka uva tuqantaakera tiva nimira, kia tivata vi uvara okara tiva timira iaro, tuvaro viva aqao tiro, Kia te vi uvara okara tenta noka qokavata tiva nimunarave. Nana kaarae te ai tiva amiainarave? tura.
17Ho 7 entara nora kara ne vauvaro vi nahentiva ekaa vi entara iqi rataqiro vuvaro ekaara 7 entaqaa Samsonira popohovaro nahenti viva virara qaiqaa qaiqaa nuntu nauntu tivaqiro vura kaara viva uva tuqantaakero tura okara vira tiva amura. Tiva amuvaro nahenti viva nai navunaaka Pirisia tiva nimura.
18Mintuvaro 7 entaqaa kia kuarivano ruhunku vumanta vi vatukaraqi vau vaiintika oru Samsonirara tiha, Nana hiakaa i haikava hani uri aatarakaivo? Nana haikavano raioni kempuka uri aatarakaivo? tura. Vika minti tuvaro Samsoniva tiharo, Ne kia ti purumakauqohai vata koraatirio, ne kiama ho vi uvara okara ti tiva timiatirio, tiro.

19Minti tuvaro Nora Kotira Maraquravano vira kempukaiqama kovaro viva Askeloni vatukaini oruntero, ˻Pirisia˼ vaiinti 30navu arukero vika vaataqaahairo utavaaqa qaqini varakero vi utavaaqara uva okara tiva amuka vuru nimura. Samsonira voqamakero arara ite vauvaro viva nai qora maaqaini oturantero urura.
20Samsoniva kia vi nahentira vararaitiro qaqirakero vumanta, vika vi nahentira ˻Pirisia˼ vaiinti vo amura. Vi vaiintiva Samsoniva nahenti varo entara vira tataaqa himpite vau vaiintiva vaura.