Mumutara Ŋic 17

1

2

3

4

5

6

7

8

9

10

11

12

13

14

15

16

17

18

19

20

21

¹Eferaim tiki mâreŋko ŋic moc juwec ʒâŋene Mika.

²Eki neŋgoc‐ticne ʒiŋuc âzâcnewec: “Siliwa moneŋ dâkâne 1100 goraonec rokicne, eme irec sâwecdâŋ mutec manapo i noni rorâ bajukopac.” Iŋuc mume neŋgoc‐ticnezi ʒiŋuc âzâcnewec: “Motec‐nane, Wofuŋte eehâmozi gorao fozejec.”

³Iŋuc âzâcneme motec‐ticnezi siliwa dâkâne 1100 i bârisiecnewec. Ehame neŋgoc‐ticnezi muwec: “No moneŋ i motec‐nanere manasurâ bâtirihuc Wofuŋte biŋe râekopac. I ɋâŋ moc jâc â siliwazi baniŋte iŋuc ekopac. Iŋuc ehuc bârisie‐garekopac.”

⁴Iŋuc mume moteczi moneŋ i neŋgoc‐ticne bârisiecnewec. Ehame neŋgoc‐ticnezi siliwa dâkâne 200 i rorâ ɋâŋ qâqâtâc bapa ŋic moc râcnewec. Eme eki ɋâŋ moc jâc â siliwazi bawec. Bafâreme Mikazi wiac i ficticnao heme ŋewec.

⁵Ehame Mikare nemuɋâŋ ufuŋ moc ŋewec ira qoqonaŋ ŋaqi â metâ moc barâ râewec. Ehuc ŋokâfâcne jaŋeraonec moc taha bapa‐ticne erâ juocte mufiriewec.

⁶Dameŋ ira Israe ŋic jaŋerao ŋicwofuŋ moc mi juwec. Irec ŋic jaŋe maŋjeŋiczi wiac manapie sâckewec sâc erambiŋ.

⁷Eme Juda mâreŋko Betelehem hae ŋewec ira ŋic socɋâri moc Lewire guruoneczi Judaŋic jaha juwec. E hae ira jaba juwec.

⁸Juku ŋic e Betelehem hae beherâ hae mâreŋ moc bâfuarâ juocte rawec. Rahuc juku Eferaim tiki mâreŋko Mikare haeo fisiwec.

⁹Fisime Mikazi wiocnerâ muwec: “Go wenirec warekomec?” Eme eki dâŋ ʒiŋuc bâtikiecnewec: “No Lewire guruoneczi Betelehem haeo juekopac. Erâ no hae mâreŋ moc bâfuarâ ira jaba jupemurâ warekopac.”

¹⁰Iŋuc mume Mikazi ʒiŋuc âzâcnewec: “Go nohec juhuc mamac enarerâ taha bapa‐nane juzemec. Erâ go nohec juhaŋtec jara sâc siliwa dâkâne 10, erâ ŋaqi qoruc â nânâ opâ sâcne bâfua‐garepemu. Iŋuc mume maname tarawec.”

¹¹Eme ŋic e Mikahec juocte maname sâckeme ŋokâfâc‐ticne jaŋere sâc erâ juwec.

¹²Ehame Mikazi ŋic e hâcne taha bapa‐ticne erâ juocte mufirieme ficticnao juwec.

¹³Iŋuc ecnerâ muwec: “Ʒi Lewire guruonec moczi taha bapa junarekacte Wofuŋzi ehâmo‐nareocmu hâcne.”