Mareko 4:17-35

¹⁷Erâ maŋjeŋicko gâtâ mi bakicnere dameŋ bembeŋne mac bajuniŋmu. Izi mitire fific guguriŋ â ʒika kâpâcwâru fuame miti beherâ dockeniŋmu.

¹⁸Â hândâŋne hofâ qinʒiŋko hewec sâc iŋucne jaŋe miti mamana i mananiŋmu;

¹⁹ehame ine mâreŋte wiac irec mamaŋ gugutuŋ ee â moneŋ mafa sâkore aŋac â wiac fuŋne fuŋnere sasec izi maŋjeŋicko hurâ miti hehâmome fârimâc eocmu.

²⁰Â mâreŋ guecko hewec sâc iŋucne jaŋe miti manarâ bajuhuc fârine bâfuaeŋgopieŋ, gâcnezi 30, gâcnezi 60, gâcnezi 100, fârine iŋuc bâfuaeŋgopieŋ.”

²¹Dâŋ moc ʒuhuckerâ ʒiŋuc jazawec: “Mozi lambe ficmaŋko baferâ kuʒizi hetutuckeocmu, me mozi ŋeŋe rurumaŋko heocmu? Aricne, ŋeŋe‐ticnao hepene ŋehuc tamaeocmu.

²²Wiac soŋsoŋ fokac i foku mi foocmu, i bataniŋkezo, â wiac hemackekicne fokac i foku mi foocmu, i qaratie‐fârezo.

²³Hazecneheczi dâŋ kecʒi manazejec.”

²⁴Iŋuc murâ muwec, “Ŋoŋe dâŋte ruc banʒepieŋ. Ŋaŋac wiac ehuc sâc bâfuaniŋmu, sâc ijaha risie‐ŋareocmu, erâ i sawa mâcne, fehuc risie‐ŋareocmu.

²⁵Moc e wiac râcnekicne bajume kiqecnecnezo, â moc e wiac râcnekicne mi bajume jâoc rozo.”

²⁶Jesuzi dâŋ moc kecʒiŋuc muwec: “Anuture miti hata irec fuŋne ʒiŋuc: Ŋic moczi gieo wiac hândâŋne tieocmu.

²⁷Erâ ŋafeo â ʒoaŋko ju fofo ehame hândâŋ i âkeʒurâ wefuocmu, ŋic e fuŋne hone manac mi eha.

²⁸Mâreŋ e jahac hândâŋ gume hesiwiŋ ecneme âkeʒume qanaŋ bâpâŋ wefuekac, izi rehacne heekac, izi fârine râeekac.

²⁹Fârine wozeme qa roro eocmu, fâri roro dameŋ maickekac hâcne.”

³⁰Dâŋ moc ʒuhuckerâ kecʒiŋuc muwec: “Anuture miti hata i wemo wiachec sâc hepe me wemo wiacko iticnerâ mupe?

³¹I nemuja hândâŋ iŋucne. Hândâŋ i piticne, jâchândâŋ gâcne irec wahamicne.

³²Erâ sifu, mâreŋko râepene fua sokac erâ wiac nâkicne gâcne jâururâ jâcsâko eekac. Ehuc tieŋne heme sawa wipe jaŋe fisi mumucnao sâcne herâ ŋeeŋgopieŋ.”

³³Jesu e kesaic dâŋ fuŋne fuŋne muhuc miti jaza jujec. Ehuc mamana‐jeŋicte sâc jazawec.

³⁴Â mutaniŋkerâ jajaza ine mi jaza jujec. Mâc motecfâc‐ticne jaŋehec bucko juhuc fuŋne mufuarâ jaza jujec.

³⁵Eme ʒoaŋ gie bapa ijaha hae owâeme motecfâcne ʒiŋuc jazawec: “Nâŋâc riqic ocniŋucnao raʒinaŋ.”