17तन्न शाक्श थोक्चा मतथु, शुश मलीनीम। लोव़ आ पर्बम श्येत गेचा पुंइसाक्म हना, थु प्रोंइशा गाक्नीम।
18चू आ दातेमी जुक्शो खोदेंशोपुकीमी लोव़ नेंनीम।
19तन्न दोपा ठेयब दुम्नुङा? दोपा क्येट चेमु? दोपा मारेइ मारेइ ताइनुङा? दे मिम्शा, आ थुंमी तेक्ब। मिनु आ नेंशो लोव़मी फल मसिप्ब।
20रिम्शो खपीम शोक्शो खोदेंशोपुकीमी चहिं परमप्रभु यावे आ लोव़ नेंशा, आन थुंमी वोइक्नीम। मिनु गेडा का के ३०, ६० सहे का गेडा सम्म सिश्शा ग्रेल्नीम” दे शेंदीमी बाक्त।
21मिनु येसुमी “मार, बत्ती पाथीमी गुप्शा वोइक्चा कली, खाट आगामी वोइक्चा कली दानीमी ङा? मफारथु वोइक्नीमी, ममाइ ङा? मत्ती ५:१५
22ख्रुइश्शो मख्रुइक्सीब, सुम्शा वोइश्शो यो हाक्सीब। मत्ती १०:२६-२७; लूका १२:२
23सुइ के नेंब नोफा बाक्त हना, नेंनल” देंमाक्त।
24मिनु येसुमी “गे मार नेंनी, मेको नोफा दाइश्शा नेनीने। दोपा नाक्शा गेनीनी, मोपा नाक्चा पुंइसीनीनी। मत्ती ७:२
25मारदे हना थीब तेम्शा गेचा पुंइसीब, मथीबमी चहिं आइक्के बाक्शो यो रोइक्चा पुंइसीब” दे शेंदीमी बाक्त। मत्ती १३:१२-१३
26मिनु “परमप्रभु यावे आ राज्य ओदेंशो बाक्ब, मुर कामी आ रूमी वांचेर शोक्ब।
27मिनु नाक्दो इप्ब, सुनी बोक्ब। शोक्शो वांचेर दोपा वाबा, दे मारेइ मतुइक्ब। याकूब ५:७
28रू आंमा मेको वापाइक्ब। वाशा, बाला ग्रूशा, आख सिप्ब।
29तन्न मीमेनु, रिक्ब। मारदे हना रिक्ची जाक्शो बाक्ब” देंमाक्त।
30मिनु “परमप्रभु यावे आ राज्य मार नु गारबा? दोदेंशो कथा सेल्शा रुप्पाइक्नन्नी?
31वांचेर नेल्ल आन क्येङा आइक्च तोरी गेडा बाक्ब।
32तोरी गेडा वाशा, शुश राशी पाइश्शा गिग घांस आन क्येङा ठेयब रवा दुम्ब। मेको रवामी चिक्बीमी ग्योव़ सेल्शा, फाम्सीशा बाक्ने चाप्नीम। परमप्रभु यावे आ राज्य मेको खोदेंशोन बाक्ब” दे शेंदीमी बाक्त।
33मुरपुकीमी रुप्ने चाप्मेक्ल, दे शुश कथा सेल्शा, परमप्रभु यावे आ लोव़ शेंना शेंन बाक्माक्त।
34कथा मसेल्थु, लोव़ मपाइबाक्माक्त। आ शेंसीब आन कली मेको कथा आन अर्थ यो नेल्ल रुप्पाइक्बाक्माक्त।
35मोपा शेंने थुम्शा ङा मिन, नां रिक्मेनु, येसुमी आ शेंसीब आन कली “समुन्द्र शोक्शा, आइक्ची हांबु जाक्दीय्य” देंमाक्त।