Marqoosa 4:17-35

¹⁷Gido attin isti xapho yeddonta gish guutha wode gam7ishin qaala geedon metoy woykko goodetay asata bolla yiza wode heerakka dhuphetetes.

¹⁸Harati qasse aguntha giddon wodhdhida zeretha misatettes; isti qaala sisi siyeetes.

¹⁹Gido attin ha biitta metoy, miisha siiqoynne hara amoy isti siyida qaala cuullidi ayfe ayfonta mala diggees.

²⁰Hankoyti lo7o biittan zeretida zeretha misatettes; heytikka qaala siydi ekkizadenne heedzdzu tammu ayfe, usuppun tammu ayfenne xeetu ayfe ayfizayta” gides.

²¹Qasseka Yesusi “Xompe oythidi geemason woykko arsa giddon woththi eretii? Poo7ana mala qonceson wotheeta gidenee?

²²Hessa gish qotettidi qonce kezontay, poo7on kezonta geeman attanay baawa.

²³Hessa gish siyiza haythi dizaddey siyo!” gides.

²⁴Gujidikka “Inte siyizayssa woznan woththite; inte makkiza miishara intes makettana; hessafekka daroy gujettana.

²⁵Dizaddes gujettana shin bayndadefe izas dizaarakka ekketichana” gides.

²⁶Qasseka Yesusi “Xoossa kawotethi zereth zeriza issi as misatawus.

²⁷Zeridadey omars dhisikees. Wontishin dendees; gido attin izi eronta dishin zerettida kaththay mokkidi diccees.

²⁸Gadeyaka koyro caarech, kaalethada pudhe, qsseka pudheza bolla lo7o ayfe immawus.

²⁹Kathay kaxxidappe guye boney gakkin keeththa aaway heerakka maxa oykkes” gides.

³⁰Yesusi “Xoossa Kawoteth nu aazara ginisanee? Aazara leemisanee?

³¹Biitta bolla ubbafe laafa gidida sanafice ayfe misatawus.

³²Zeretada diccidappe guye qas atakilteta ubbafe aadhdhiza gish kafoti yiidi he atakiltey haggata kuwa giddon shempeetes” gides.

³³Yesusikka asay ekkanas dandayizayssa keena hayta misatiza hara daro leemisora istas yootides.

³⁴Ay miish gidikkokka asas leemisoy baynda yooti erenna. Izinne iza kaallizayti xalla diza wode gidikko wursi birsh yootees.

³⁵He gallas gadey qammishin bana kaallizayta “Ane gede he pinth pinnoos” gides.