Markungundru 4:17-35

¹⁷Ja munta tana kapara pani nganai, a-ai, tana maraltja nganai; ngadani ketjaketjana ja tirikaripaterina wokaranani jaurandru, tana wolja kalakalarila nganai

¹⁸Ja palpa, tanana dilkani matja jaupana, tanapini nganai; tanali jaura ngarai,

¹⁹Ja nunkangupini mitani mahujeli ngundrana; ja poto pirnaia jedibana, ja poto nguruja milkirina tanangu wiriai, ja jaura palimai, ja tandra pani punkibai.

²⁰Ja tanapini nganai, tanana mita ngumuni matja jaupana; tanali jaura ngarai ja patai ja tandra punkibai; kulnujeli 30, kulnujeli 60, ja kulnujeli 100.”

²¹Ja Nau tanangu jatana wonti: “Praitji wokarai, nina kokuni ngarinalu kara, turarani pirini ngarinalu kara kurala? Nau wata parai, nina praitjaia potuni kurala?

²²Ngangau panila kurirpi nganai, naupini wata tinkarj pantjinanto; ja panila kurukuruni pantjina wonti, a-ai, praitjani wokarananto.

²³Kulnujeli talpa ngamalkai ngarala, nulu ngaraiatimai!”

²⁴Ja Nau tanangu jatana wonti: “Najianau, mina jura ngarai: Mina kokujeli jura jinkiai, jenia koko jura nakaldra manina tikala nganai; ja jura ngaranani, tanali jurangu morla jinkila nganai.

²⁵Ngangau warle ngamalkai, nunkangu Nulia jinkila nganai; ja warle wata ngamalkai, nunkangundru Nulia bakana jenia manila nganai, mina nulu ngamalkai.”

²⁶Ja Nau jatana wonti: “Jeruja Godaia milila nganai, worderu kana kulnujeli paua mitani japai,

²⁷Ja nau mukaturarai, ja jiritjiai tinkani ja ditjini, ja paua punkai ja wirdiriai; ja nau ko worderu.

²⁸Ngangau mita muntali tandra punkibai, ngopera nindri, ngadani mangatandra, ngadani tandra kantji mangatandrani.

²⁹Ja tandra talku ngananani, nurujeli nulu kirra jinpai, ngangau kampani ditji wokarana warai.”

³⁰Ja Nau jatana wonti: “Worangu jeribaka ngaiani Godaia milila kurananto? Mina jeribaka jaurali ngaiani nina jeribaka kurananto kara?

³¹Tandra wakawaka jeribaka, ninapini mitani matja jaupana, nau morla waka nganai tandra nguja marapuni mitani.

³²Ja nina matja jaupana, nau kuri punkai ja morla pirna pantjiai nindri marapuni, ja nguna pirna dunkalkai, jeruja pungalani nunkanani bakana paia ngaranala ngamai.”

³³Ja jeribaka jaura marapujeli Nulu tanangu jaura kaukaubana wonti, worderu tana ngurunguru nganana wonti ngarala.

³⁴Ja jeribaka jaura panini Nulu tanangu panila kaukaubana wonti; windri pilki Nulu milini nunkanani pratjana mildiri ngankana wonti.

³⁵Ja Nau tanangu, nunkangupini ditjini matja kalkaurarina, jatana wonti: “Ngaiana jerankaria pararananto.”