Maga 4:17-35

¹⁷Amai gaso, ili difi made awäla sedade made aligilomelë. Ilia ado mala neala gaui amoïe yöi beasege, amase, odoaea ili neala sëlasisege, ilia fodolofalï dïgïla aulomelë.

¹⁸Udia dolö odoada giisi äyo gägäi damula sadia gai fedaha dibea daala negei amo gadoi neebe amoliada ado mala nabalahilä gaso,

¹⁹nagadaia galu dibe amogi gumusula helësëlahilä, muni edefade negemolöila, gesami edefade awäla helësëse amea ado mala nabi amo dedelela yau hahalea gägä negelo made neamelë.

²⁰Amaimo, udia dolö odoa molö gägä naga hedabia daala negei amo gadoi neebe ameada ado mala nabala asigi afädë negelahilä ilia gägä nabülasi ohodoa negeladigi, nabülasi gafeia negeladigi, nabülasi emu nabülasi negeladigilo neamelëla säi.

²¹Amalahilä Yesuea ilima nabahalea, Afädëa gamali yola sagai amo faloea dabelole ma, imidi hawa negelole. Gamali waseda, aulidaia negelo madele.

²²Nelebo sulubadela musügä negei dibe amo hobeala ulufadigisa maadela, nelebo sulubadela dabela negei dibe amo yo digai dibea ami neala ulufadigisa maademolöïe amaimelë.

²³Afädëa gëhea nabulöi galëda, nabulö dialeala säi.

²⁴Ea säi amo säla uda negela made ilima sähalea, Mala nabasebegoda hedabolafalï helësëmalo. Dilia odoagali mogela ïaseda, Godea amo gadola diligali mogela ïahalea odoage baala ïmolömelë.

²⁵Afädëa nelebo afädë gaula neebe amomada Godea odoa baala ïmolömelë. Amase, afädëa nelebo afädë made gaula neebe amomada, holöfalïmelë gaula neebe amoda haila nimolömelëla säi.

²⁶Yesuea ado säi amo uda negela made sähalea, Godea Beaha Maadela Sigi Neebea ami gowe gadoi dialea. Dolö afädëa hawa sagaia diigisilahilä

²⁷gasigi diala yose nowela afu mafusa neë gaalu, gägä sagai amo duulu beselagalala gomalä bäusebela fädäla melëlo made.

²⁸Nagaeamu neala bäulasilahilä gägä negelomelë. Dafidida bäudale bobagilomelë. Hobeala mumusu negelomelë. Hobeafalï gägä hodo negelomelë.

²⁹Molö hodo amo nimolö segeyo beselagalai galëda, dolö amo hï helebea damula nelomelëla säla ï.

³⁰Yesuea sähamu neamu sähalea, Godea Beaha Maadela Sigi Neebea amo abodo gadoila sämolödu. Ado besula abodoma dofe sämolödu.

³¹Amoda masada gägä gadoi. Gägä odoa gadoi made. Gägä amoda holöfalïfalï. Amo ilia sagaia sagalomelë.

³²Ilia sagalahilä neëgida fedala edefademaläde aligilahilä dägöala hawa hëhela odoa sagai dibe amo baagila awäla bäulo neamelë. Ïe adomo edefade bafui amogi haea mafula bäu augi hawa ami mosö olelomelëla säi.

³³Yesuea udia dolö amolima ado mala säla ïahaleada ilia helësëla hamosege hamomäia ado besula yafie säla ïaha nelo.

³⁴Ea mala sähalea ado besulamu säla olelesa nelo. Ïe bëgëla aulo nelo amoli hilidomu neada ea ado besula säla ïaha nelo amoïe mi sulubadela säla ïaha maadei.

³⁵Segeyo amo galamu deadi eso digase gaalu, Yesuea ïe bëgëla aulo amolima sähalea, Oeabo edefademalä go dëgëla nali alogodigogi afiadila säi.