Make 4:17-35

¹⁷Ee wai kana-kisa pingi napiamosa, kumiamo dopaleaka joo, endakali dupame wai pii epe doko auu pyoo nyepelyaminopa, nyakama-kisa pundu kendapi longo epelyamopa, wai pii epe doko pupae yakinengema.

¹⁸Ee wai yangi yuu ikililyambu tenge palenge dupanya peamo dopaleaka joo, endakali dupame wai pii epe doko singima.

¹⁹Singimaka doko, yuunya munipi, pinjupi, longo lao nyoo setao katapu laka lao putiti kaenge mana dokome, wai pii epe doko kui pilyamosa, dii namandengema.

²⁰Ee wai yangi lyandeamo dupa yuu epenya pupala, andao dii mandea. Dopaleaka joo, wai pii epe doko sepala, endakali yangimi dii 30 mandenge. Yangimi 60 mandenge. Yangimi 100 lao dii mandengena” lea.

²¹Dopa latala baame dokaita lamaiyoo, “Endakali mendeme lama kaiyepae nyepala, titopene pengenya koko pyandengepe, pande toko pundi-pundi pyandengepe? Daa, lama kaiyepae doko toko ketae setenge.

²²Yalo petae silyamo dupa gii mendepa panao seta. Yame pyatae silyamo dupa gii mendepa lopapae seta.

²³Nyakama kalekaita singi dupame pii doko auu pyoo salapapena” lea.

²⁴Dopa latala dee baame dokaita lamaiyoo, “Nyakamame endakali mende-kisa mana minatamino dopaka pyoo, Goteme nyakama-kisa mana minata. Dopana, nyakamame pii silyamino dokonya tenge doko masetala pyepape. Dopa pitaminoliaka pyoo, Goteme mana mendatupa apata konda pyakata.

²⁵Endakali mende-kisa Gotenya pii longo setamo doko, baa konda pyoo maita. Dopaka doko, Gotenya pii nasingi mende-kisa kuki setamopa, sekelyamo lao masetamo doko, dutupa tange nyokonyetana” lea.

²⁶Jisasame kongali pii mende lao pituu, “Gotenya isingi mate doko akali mendeme ee wai lyandenge dopale.

²⁷Baame lyandatala, kuka luu palipa, yongama sakatata pilyamopa, ee wai doko tange langa latala, andenge. Dopa pilyamopa, aipa petala langa lao andelyape lao nakandenge.

²⁸Yuu dokome pilyamopa, ee wai doko langa lenge. Dokopa, yoko pingi. Dopa petala, mange dokonya dii lyoo, wambu pingi.

²⁹Dii doko wambu petelyamopa, ee pokenge akali dokome konja-wuame lyao mandengena” lea.

³⁰Jisasame deaka dokaita lamaiyoo, “Naimame Gotenya isingi mate doko aipalena lamape? Dee aki mendepa makande pimape?

³¹Doko ee wai mastet lenge dopale. Ee wai waka dupa ita minao, mastet wai doko etete yakane mende.

³²Yakaneaka doko, endakali mendeme mastet wai doko yuunya lyandelyamopa, andao yale jetala, ee wai waka pokatae dupa ita miningi. Dokopa, wangya dupame lumba nelyamo dupanya yakame ipao anda pingimana” lea.

³³Baame kongali dopale dupame wai pii epe doko endakali dupame sepengeli pyoo lamaiyoo katea.

³⁴Baame pii mende mee lamaiya naeyao, kongali laowaka lamaiya. Baanya disaipolo dupa-pipa iki katao, kongali dupa pitakanya tenge dupa lamaita pia.

³⁵Yuu kuiyamopa, Jisasame baanya disaipolo dupa lamaiyoo, “Naima endaki pete dakenya omotena mua” lea.