MARKUS 4:17-35

¹⁷Dhali uni tan ga birman yisa e is buni mo, hili uni ’kon jasi ari’ceenne/ mo, dhali yan’ko’d ki monṯo’c bwa walla mo gi ’koshuwa ’kosh cuki mis mo gom gway yan mo tani ki jahanne/ uni ṯa’kkin mo be.

¹⁸Dhali aḵa’banya tiya uni gun yeḵkunu mo e bwam ma ’de/ mo tani uni ita uni gwansan kun ciḵki gwo mo be.

¹⁹Hili uni bala to ga ’cesh is mo dhali ’penkap̱an buni jin el uni e ki el mo dhali bwam buni gun ona uni gom ton tiya mo tani cic̱kina uni nycine/ mo dhali c̱okoṯ gwo mo dhali a’di inyo/i uni mo ki uni moli dho’th mo be.

²⁰Hili uni gwansan kun yeḵu mo eya ’cesha ’borga/ mo tani uni ita uni gun ciḵki gwo mo dhali bu’th a’di mo dhali dho’th maman mo, eya tora ’de/ mo tani a’di dhotho’d ki iss ’de/ i’ce’dka ’kume’d mo, dhali eya tora ’de/ mo tani a’di dhotho’d ki iss ’kwanimpa ikwara mo, dhali eya tora kamu/ mo tani a’di dhotho’d ki iss ’kwanimpa imudhe’d mo be.

²¹Dhali a’di ki o uni gwo mo ki: Alamba/ ki a’di ḵalkunu bway gu’b mo tani a’di kumkunu ’kup̱ ki toŋ’kul bwa mo ’taa? walla karkunu mo e bwaŋ’kwariny ma aŋgar mowa? dhali a’di dinuki kara p̱o/ ṯirkina/ mo ’taa?

²²Haali/ toŋ kamu/ yisa di’da jin minu bag mo isi ciki/ a’di minu mish eya tente/ mo. Walla toŋ kamu/ yisa di’da jin minu mii ka ’di/ mo, hili isi ciki/ uni minu mish ki moŋkush mo be.

²³Waḵki/ wathin ’deŋ kamu/ ta’d gi gu’ban’ce mo tani dhalki a’di ciḵ gwo mo ma.

²⁴Dhali a’di ki o uni gwo mo ki: Hili ki ’bore/ a’di jin ciḵa um mo. A’di jin barkina um mo tani a’di minu barki um mo dhali to ki nyanye/ mo tani a’di minu c̱i ki um mo be.

²⁵Haali/ a’di jin ta’d gi to mo tani minu c̱iku/ ki nyanye/ mo. Dhali ’peni a’di jin dara’d mo tani, me’d jin tana a’di gi a’di mo tani a’di minu bu’th ’peni a’di mo be.

²⁶Dhali a’di ki o gwo mo ki: Bampa/ ma Arumgimis a’di wana e ki wathi/ jin midi ’taki pepera ḵa’bany bwa ap̱o/ mony’cesh mo

²⁷dhali ’taki ish e mo dhali cu mis mon’thiny mo dhali montee mo, dhali aḵa’bany midi ’taki ’ka ale/ mo dhali ca mo ki a’di molo’d mo be.

²⁸A’cesh a’di dho’thki to ki is piti mo, ale/ a’di i’ka’di ṯwa/a/ mo dhali yan’ko’d akulp̱e/ mo dhali yan’ko’d maman gana/ mo.

²⁹Hili ki maman iski’d mo tani a’di ki kar mo ma nyerṯẖa/ eya tente/ ki jahanne/ mo haali/ mo gi minu ’ciṯẖ to mo p̱u’dki’d mo be.

³⁰Dhali a’di ki o gwo mo ki: Mina ana kar Bampa/ ma Arumgimis ka p̱ar ’ban kata moye? walla gwom ’bi’th/e gi wakata imina ana i/o mo gom a’di mo?

³¹A’di wana e ki emena ḵa’bany to jin miinuwa ’tash mo, a’di jin yeḵkunu ap̱owa ’cesh mo. A’di ta ara ḵa’bany to jin c̱a’ba e ki p̱iri’th p̱iri’th ap̱owa ’cesh mo.

³²Hili ki a’di yeḵkunu mo tani a’di caki’d mo dhali a’di warki’d ki dhan wurup̱ mo dhali a’di ki pepera adhana bi mo. Wakan ’dii kun p̱en e mis mo tani uni nyaŋki gu’b buni eya lam piti mo be.

³³Ka ris gwom ’bi’th/e gi wakan mo tani a’di ki ṯor uni gwo mo me’d jin mina uni ’taki mish a’di mo be.

³⁴A’di diki ṯor uni gwo ki dar gi gwom ’bi’th/e mo. Hili e imanciḵ gwom pitiŋ gana/ mo uni ’cena mo tani a’di ki be’d uni gwo ’baar mo be.

³⁵Ka tee c̱aan ki mo ta mom’pimpili/ mo tani a’di ki o uni gwo mo ki: Dhalki ana iina mo mmo’ciṯẖa/ gap̱ gi ’bana kamu/ mo.