Mak 4:17-35

¹⁷Ika a warwara bel i kes rakrakai ting na balanla, bel lar tur rakrakai arlar ana witla ning belal wakirinla. Ning a mamahatla ir hanot, pa dir alaulau la ana warwara ning la tortorot ano, lar punga kapit.

¹⁸Dingla na tarai la arlar ona pat a witla ning la punga tar ting na tinine rosrosla. La longor a warwara,

¹⁹ika a nuknukinla sur a wakak a keskes te lapiu, pa nuknuk otleng sur anunla na gongon ning i asongo a nuknukinla, pa a nuknuk sur a ututnala masik, la rau alar a warwara ane God, pa bel i wai.

²⁰Dingla na tarai la arlar ana pat a witla ning la punga ting na wakak a piu. La longor a warwara pa la muri, pa la wai, dingla na tarai natol a bonot, dingla na tarai diono na bonot, pa dingla na tarai otleng takai a mar.”

²¹Pa e Iesu i atai la mange, “Bel tik ir los pas ta lam pa ir aroh alari ana paket, pa bel ir suah i otleng ting nahai a logo. Ir suah i ot saot na turtur ngasna.

²²A ututnala rop ning i kes kumna, lamur ir kes puasa. Pa a ututnala rop ning di bunuri, lamur ir hanot talapor.

²³Esining a talngana kaning, i wakak ning ir longor ono.”

²⁴E Iesu i atai la mange, “Mulor nuknuk wakak ana sa ning mulo longori. Ning mulor longor wakak, dir saran a wakak a tastasman ta mulo. Pa mulor kibasi ir itna kol.

²⁵Esining i tong akes anuka asasaerla, dir tabar ulaki ana wakak a nuknuk, pa tik ning bel i tong akes anuka asasaerla, dir kepsen otleng anuna siklik wakak a nuknuk kusuni.”

²⁶E Iesu i atongi otleng mange, “A matanitu ane God i arlar ana barsan ning i sapran tar a pat a witla ting na kabalapiu.

²⁷Ning i borbor ana moromla pa i sira mata ana kabakiarla, a pat a wit la pusa ot pa la gomo, pa a barsan bel i tasmani mang la pusa ot pa la gomo mangmangasa.

²⁸A piu ot i agomo a rakai a wit larne: a pakana i pusa nigo, pa lamur a sarna i gomo ot, pa a patna i mur ot.

²⁹Ning a patnala ka makos pa a kalang a sol ka hanot, a barsan ir pirat pas la.”

³⁰E Iesu i atai la mange, “Ar larlar a matanitu ane God ana sa? Pa esi na warwara larlar ar papak ono?

³¹I arlar ana pat a mastad. I natarna kol tana pat a rakai rop, ning di omani ting na kabalapiu.

³²Ning di ka oman tari, pa i gomo, i itna kol tana rakai a hanganla rop pa i suah sarara a tatatnan rakrakana, pa a manila la sira tol pios saot na rakrakana ning i molmol.”

³³E Iesu i warwara tetek la ana galis a warwara larlar ning i arlar ana nunla na mananos,

³⁴pa bel i warwara tetek la ana ta maskan a warwara, a warwara larlar rop ka. Pa ning la kama taum ana nuna kakak a asaer lar kes, ir papak bot ana kamkama warwara larlarla.

³⁵Ning a rah ma ana pukakiar ning, e Iesu i atai anuna kakak a asaerla mang, “Dalar han lakai utumo na ris a puka tasi.”