Mak 4:17-35

¹⁷Ma ramramsi kegha, iyamna sisiyisi nuwatepasiyai ivi vaghinei. Imakai da ke mara gurina ma i vitumaghana kubiine wawaya ivi tupaketowanesi bo nuwapoya ipanani na yaghiyaghinai God varana ibarei.

¹⁸Ma viya nakanani ma pei iyiyo kamosiyai. God varana ivi yanei

¹⁹ma nuwapoya i yawasa kamonai inotanota kirakiiyei, dobu ina mura imatamatighei ma sawara biibiisi ikirokirorowei da God varana irogui ma amesi kegha.

²⁰Ma viya nakanani ma pei tano biibiinai. God varana ivi yanei, ivi vaghinei ma ivi tumaghanei. Ti na nakanani ma pei igogo ighae, sago sago duma amesi iterei da 30, 60 bo 100.”

²¹Ma Yesu ivonesi bo, “Wawaya rampa karakaratina ina kavarapiyei na meni dobunai ina terei? Ke bayawa vivikuratabuna gaburinai ina terei. Ma bade ke kemakema gaburinai ina terei. Kegha, gawara yagharinai ini rorokei da ina ruyasegana.

²²Ma akova gavugavuna kudubina ina rudeba. God varana biibiina ke gavugavuna ina makai, kudubina ina rupamatawei da wawaya inakova bubuni.

²³Wawaya ere tinimi na aku sisiya kovi yana bogai.”

²⁴“Sisiya koni yana bubuna ma nuwanuwami koni tete bubuni na iyamna kona panani. Akova gisi vaghina kunekwai na kuna panani ma God akova ku tepana ina terei.

²⁵Iyavo kava akova gwabisiyai emakamakai na ku tepana ina veresi. Ma iyavo kava akova gwabisiyai irekwei na kudubina ina viitawei.”

²⁶Ma Yesu miiba sago iterei, ivona bo, “God ina vikiivavona na weni nakanani. Tomowa ina whiti peina irubusagha vao kamonai.

²⁷Ma tomowina didibarai ikenakena ma mariyai na ivovomiiri ma ivovobagibagi kupom ma nani kamonai peina igogogo ma igheghae. Ma tomowina na ivivi nuwanotanota da ikikava pei na egogogo.

²⁸Tano muina na biibiina, tuna kubiine pei igogo ighae da iuwa. Kunona kunukununa iterei, muriyai tanana iterei, muriyai na amena iterei.

²⁹Ma vaghina, amena imagura da bori kana mara inekiibau ma tomowina inae da whiti iboriya.”

³⁰Ma bade Yesu ivona bo, “God ina vikiivavona na ikikava ani sisiyei kurimi? Kade miiba sago ana terei da konakovi.

³¹Tuna na kiiroko peina nakanani. Tuna gisina ma kegha da

³²kuna voni ma ina ghae ina rakata kirakai da pei peyarina vao kamonai ina ghekuyowesi. Ini ruragharagha da ragharaghana ghamaghamasi. Ma kiu ina pisi da tepanai ina towa ma rogunai ini yakam.”

³³Ma vaghina, nakanani Yesu miiba bogii ma bogiiyai ivivi beyebeyena kurisi da ti na akova ghamana ma ruvasi kava iviiya.

³⁴Ke meyani iti sisiyota koroto ghamana kurisi, ina vibeyebeyena peyarina na miiba kavakava. Ma maranai kana kivikivina kava gwabinai imakamakai na miibiisi peyarina ivivi debei kurisi.

³⁵Ravi ipika ma Yesu kana kivikivina ivonesi bo, “Tadamana ku toka nevana.”