San Marcw 4:17-35

¹⁷Per guial na̱j reeman ziꞌc tijb cwaan ni ad yuꞌt zroꞌ liuj, chi rzagdiaj reeman o chi rzunal ree bejn laa reeman din güün reeman laa reeman ni mal por xtiidx Dios, laa rusaꞌn gajc reeman ni rliladx reeman.

¹⁸Yuꞌ tëë ree bén na̱j ziꞌc bin ni biajb loj yaquiëjch. Riguiejn reeman xtiidx Dios,

¹⁹per ru reeman xgab por ree ni rigaꞌ loj guidxliuj guie. Rusquiee guialnazaꞌc laa reeman rën reeman gap reeman graloj. Abiꞌ guial yuꞌ xgab guin guijc reeman, zianz rucwëëz rucaagdiajg reeman xtiidx Dios, abiꞌ achet sirv rüjn ni rucaagdiajg reeman.

²⁰Per yuꞌ ree bén na̱j ziꞌc bin biajb loj yuj zagdxe, ridxgaꞌ reeman laan con guidib luxdoo reeman. Rüjn reeman ziꞌc rën Dios, laa reeman na̱j ziꞌc ni cwa gajlbichii o ni cwa gayojn o ni cwa tibgayuu.

²¹Abiꞌ rëb Jesús loj reeman: ―Achut bén ruzeꞌc tijb guij par gutaꞌcwaman laan con tijb caj, o gudxeꞌman laan xan loon, ruzujman laan ya din gusnin guidib.

²²Din achet ni naguieꞌch yuꞌ ni ad zaguient ad yuꞌ tëët ni ralan ni ad zagbeet bejn.

²³Bén rën gucaagdiajg, gol bacaagdiajg.

²⁴Rëb tëë Jesús: ―Gol been xgab por ree diidx ni caguiejndi. Bal ridxgaꞌdi xtiidx Dios, mazri gustëdguienman lëjt.

²⁵Din bén ma rigniaꞌ xtiidx Dios, chigniaꞌman mazri. Per bén ad rigniaꞌt, xt taꞌn ni rigniaꞌman ad zigniaꞌtraman.

²⁶Rëb tëë Jesús loj reeman: ―Xguialrniabee Dios na̱j ziꞌc rzajc bén rxübin loj xguiniaaman.

²⁷Din majsi nagaꞌyëjsaman o nagaꞌnaaman, majsi radxe o guiaal ya, rliejn bin guin abiꞌ rniꞌsan, niꞌquid ragbeetaman xhienaag rajcan.

²⁸Din yuj guin gajc rusniꞌs laan, yaloj rliejnan najn tijb guiꞌxhdoo, dxel ririin dojn, zianz rtia ladan.

²⁹Chi ma gojc reen dxel raruꞌ reen guial ma bidxin tiamp yadoꞌp reen.

³⁰Rëb tëë Jesús: ―¿Xhienaag ganin na̱j xguialrniabee Dios, o xhienaag gün diidx lojdi din chigniaꞌdi xhienaag na̱j xguialrniabeeman?

³¹Rnin lojdi guial xguialrniabee Dios na̱j ziꞌc na̱j xhaj moxtajs. Chi rxübin reeman laan. Laan na̱j ni mazri ni dobëz loj gra ree bin yuꞌ loj guidxliuj.

³²Per chi ma guxübin reeman laan, rniꞌsan rajcan mazri naroob loj gra ree cwaan, xt rajc rüjn xguixbitiaꞌs ree biguijn xidxan.

³³Balüü Jesús laa reeman xtiidx Dios con ganaxczi cwent ziꞌc na̱j ree ni ma beman, xt lodzi bigniaꞌ reeman.

³⁴Ad rulüütaman laa reeman zezi, bal id zulüüman con cwent. Per chi ma zaꞌman con ree xbejnman dxel rusigniaꞌman laa reeman zagdxe xhie rën guiëb ree ni rëbaman.

³⁵Dxej zii, chi gure guiaal, rëb Jesús loj ree xbejnman: ―Yoꞌ ree zatiblad roꞌ nijs guin.