Mɑlǝkɩ 4:17-35

¹⁷Amɑ pɑɑ yeki sɩ tǝ sʋʋnɑ-wɛɣɛ teu. Pɑ tɔkǝɣɩ-tǝɣɩ tǝtɑntɑɑ. Sɑɑ wei wɑhɑlɑ nɔɣɔlʋ ɩ kɑ́ tɑlɑ, yɑɑ Ɩsɔ Tɔm tɔɔ kʋnyɔŋ tʋɣʋ kɑ́ kɔɔ, ɩlɛnɑ pɑ́ lɩɩ Ɩsɔ sɛɛʋ tɑɑ kɛ́ kpɑkpɑɑ.

¹⁸Lɛlɑɑ nɑ́ nǝɣǝsǝnɑ wenɑ ɑ hotɑ sɔwɑ tɑɑ tɔ. Mpi tɔ pɑ tɛŋ Ɩsɔ Tɔm nɩɩʋ,

¹⁹ɩlɛnɑ ɑtɛ cǝnɛ kʋlɑpʋtʋ nǝɣǝsɛɛ nɑ wɛnɑʋ kɔtɔɩ puɣusi-wɛ. Nɑ kʋnyɩɩlǝŋ lɛlǝŋ kʋ tɔm ntǝɣɩ pɑ tɑɑ, nɑ hɑlɩ tǝ cɑŋ nɑ tǝ kpisi lʋlʋɣʋ.

²⁰Pǝ kɑɑsɑ pee lɛnnɑ nɑ́ hotɑ tɛtʋ mʋsʋŋ nyǝntʋ tɑɑ. Aŋhɑɑ, ɑlɛ ɑ wɛnnɑ ntɛ́ ɩsɩɩ yǝlɑɑ mpɑ pɑ nɩɩkɩ Ɩsɔ Tɔm nɑ pɑ́ mʋ-tǝɣɩ teu nɑ pɑ́ lʋlǝɣɩ pee tɔ. Lɛlɑɑ kɛ pǝcɔ, lɛlɑɑ kɛ mɑɣɑnɑ, nɑ lɛlɑɑ kɛ sɔsɔm sɔsɔm.

²¹Ḿpʋ́ɣʋ́ Yesu pɔɔsɑ-wɛ tɔtɔ sɩ: Yʋlʋ kɑ́ kpɑɣɑ fǝtǝlɑ nɑ ɩ́ pɑmɩ-ɩ nyǝnɑɣɑ tɛɛ yɑɑ ɩ́ sʋsɩ-ɩ kɑto tɛɛ? Pǝ tɑɣɑ ye ɩ wɛ timpi tɑɑ, pɩɩ nɑ yǝlɑɑ tǝnɑ tɔɣɔ pɑɑ sɩɩ-ɩ?

²²Kʋŋmɛlǝm nɑpǝlɩ pǝ fɛɩ sɩ pǝ kɑɑ kuli pǝ tɔɔ, pǝ́cɔ́ mukɑɣɑ tɛɛ pʋlʋ fɛɩ mpi pɑ kɑɑ lǝsɩ nɑ pɑɑ wei ɩ́ nɑ́ tɔ.

²³Ye wei ɩ kɛ́ tɔm nɩɩlʋ pʋntʋ ɩ́ nɩɩ.

²⁴Ḿpʋ́ɣʋ́ Yesu tɑsɑ-wɛɣɛ heeluɣu sɩ: Ɩ́ lɑ lɑɑkɑlɩ nɑ nti nti ɩ́ nɩɩkɩ tɔ. Mɑɣɑsǝlɑɣɑ ŋkɑ mǝ mɑɣɑmɑɣɑ ɩ́ mɑɣɑsǝɣǝnɑ tɔ, ŋkɛɣɛ Ɩsɔ kɑ́ mɑɣɑsǝnɑ ɩ kʋcɔɔŋ nɑ ɩ́ hɑ-mɛ.

²⁵Wei ɩ wɛnɑ tɔɣɔ pɑɑ hɑ. Pɑɑ lɛɛkɩ wei ɩ fɛɩnɑ tɔɣɔ pǝciimɑɣɑ wei ɩ wɛnɑ tɔ.

²⁶Ḿpʋ́ɣʋ́ Yesu tɑsɑɑ tɔtɔ sɩ: Ɩsɔ Kɑwulɑɣɑ wɛɛ kɛ́ ɩsɩɩ yʋlʋ tuukuɣu pee kɛ ɩ tɑɑlɛ tɑɑ tɔ.

²⁷Pɑɑ ɩ tooki yɑɑ ɩ wɛnɑ ɩ ɩsɛ, pɑɑ ilim pɑɑ ɑhoo, ɩ kɑɑ nyɩ ɩsǝnɑ pee ɑnɩ ɑ nyɔɔkɩ nɑ ɑ́ lɑkɩ mǝhoo tɔ.

²⁸Tɛtʋ mɑɣɑmɑɣɑ lɑkǝnɑ nɑ pǝ́ pɩɩkɩ. Pǝ cɑɑlǝɣǝnɑ mǝhoo kɛ́, wɑɑlɩ kɛ́ pǝ tʋɣɩ nyɔɔŋ. Pǝlɛ pǝ wɑɑlɩ kɛ́ pee nɑ́ pɩɩkɩ tǝcɑsǝlɑɑ.

²⁹Pǝ pɩɩkɩ mpʋ, ɩlɛnɑ pɑ́ cɛ nɑ pɑ́ hɩɩsɩ nɑ pɑ́ niki kʋm.

³⁰Yesu tɑsɑ yɔɣɔtʋɣʋ tɔtɔ sɩ: Pepeɣe tɩɩ kɛɛsǝnɑ Ɩsɔ Kɑwulɑɣɑ ɩlɛ yee? Nɑ ɩsɔ wei kɛ́ tɩɩ sɛɛ nɑ pǝ́ kɛɛsɩ kɑ tɔm ɩlɛ yee?

³¹Kɑ nǝɣǝsǝnɑ kɛ́ ɩsɩɩ sɔɔɣɑ pile. Pee nnɑ pɑ tuuki tɔ ɑ tǝnɑ ɑ tɑɑ ntɛ́ tǝ kǝlǝnɑ wɛɛʋ tǝminimini.

³²Amɑ ye pɑ tuu-tɛ, tǝ pɩɩkɩ kɛ́ nɑ tǝ́ kpɑ sɔsɔm nɑ tǝ́ kǝlɩ tuusi lɛŋsɩ. Nɑ tǝ́ hɛlɩ piliŋɑsɩ kɛ sɔsɔm, hɑlǝnɑ sumɑsɩ kɔŋ nɑ sɩ tʋɣɩ tɑnɑ kɛ sɩ hɔtʋ tɑɑ.

³³Yɑɑsinɑɑ pɑɣɑlɛ ɩsɩɩ mpʋ pǝ tɑkɑ kɛ́ Yesu kpɑɣɑɑ nɑ ɩ́ sɛɣɛsǝnɑ-wɛ. Ɩ mɑɣɑsɑ ɩsǝnɑ yǝlɑɑ mpɑ pɑ kotinɑ-ɩ mpʋ tɔ pɑɑ pǝsɩ nɑ pɑ́ cɛkǝnɑ tɔ.

³⁴Ɩ tɑ sɛɣɛsɩ-wɛɣɛ nɑtǝlǝɣɩ yem nɑ ɩ́ tɑ kɛɛsǝnɑ pʋlʋ. Ɩ́ nɑ ɩ ɩfɑlɑɑ pɑ kɔmɑ nɑ pɑ́ cɑɣɑ pɑ tike, ɩlɛnɑ ɩ́ kilisi-wɛɣɛ pǝ tǝnɑ.

³⁵Kʋyɑkʋ kʋnɛ ɩnɩ kʋ tɑɑnɑɣɑ tɔɔ Yesu tɔmɑ ɩ ɩfɑlɑɑ sɩ: Tǝ́ tɛsɩ nɑ tǝ́ polo kʋteŋ lɛŋkʋ tɔɔ.