1Ana knafi mafka vea mago'ene eritru hzageno, ne'zana omanegeno, Jisasi'a amage'ma nentaza disaipol naga ke hige'za ageno anage huno zamasmi'ne.
2Nagra ama vea krerfagura nasunku huzmantoe. Na'ankure zamagra tagufa kna nagri'enena mani'zageno, ne'zama ne'zana omane'ne.
3Nagrama huzmantesuge'za kuma zimirega zmaga'ma netesige'za vanu'za, mago'amo'za afeteti e'nazankiza kantega utraka hugahaze.
4Agri amage'ma nentza disaipol naga'mo'za anankemofo nona'a anage hu'za asami'naze, vahe omani mopafi mani'nonanki inantegati' ne'zana erizamisunke'za neganare hugahaze?
5Hzageno Jisasi'a huno nama'a breti eri'naze? huno zmantahigege'za, 7ni'a breti eri'none,
6hzageno, Jisasi'a ana maka veara mopafi maniho huno zmasamige'za manizageno, 7ni'a breti erino Anumzamofo susu hunteteno, tamanasino amage'ma nentaza disaipol nagara zmige'za ana veara refko hu'za zami'naze.
7Ana nehzageno onensa nozamene mago'a me'negeno erino Anumzamofo susu hunteteno, amagema nentazana disaipol nagakura eritma zamiho huno zamasmi'ne.
8Maka vahe'mo'za ana ne'za nenageno zamu hige'za ankra'ama atrazama'a, amagema nentaza disaipol nagamo'za 7ni'a ra eka eka kupi zogiri avite'naze.
9Ana vahera 4tauseni'a vahe nazamo'za netageno, huzmantege'za vu'za e'za hu'naze.
10Jisasi'a anama huteno, ame huno amage'ma nentaza disaipol naga'ane ventefi mareri'za Talmanuta kaziga vu'naze.
11Anante Farisi vahemo'za e'za Jisasinku ke hakare hu'za, monafinti ruzahu hankave'za erifore hugeta kamneno huza rehe'za ke'naze.
12Jisasina rimpamo kna nehigeno anage hu'ne, Na'a hige'za meni knafi vahe'mo'za avame'za kenakura nahaze? Nagra tamage hu'na neramasamue, mago avame'zana ama knafi vahe'mo'za onkegahaze.
13Ana huteno zamatreno ete ventefi marerino kantu kaziga vu'ne.
14Hagi amage'ma nentaza disaipol naga'mo'za zmagekani'za bretia eri'za omazanagi, magoke bretige ventefina me'nege'za vu'naze.
15Nevzageno Jisasi'a huno, Farisi vahe'mokizmi zistigu'ene kini Heroti zistigura kva hiho.
16Hige'za zmagra zmagra ke huge antahige hu'za bretima erita ome'nonazanku nehugahie hu'naze.
17Nehazageno Jisasi'a antahino keno nehuno, nahigeta breti omane'nea zankura huge antahige nehaze? Tamagra ketma antahi amara osu'nazafi? Tamagri tmagu'amo'a eriginefi?
18Tamavurga me'neana ke so'e nosazafi? Tamagesama me'neana antahi so'e nosazo? Tmagrira tamage'kaninegahie.
19Ko'ma 5fu'a breti tamanasina, 5 tauseni'a vahe zami'noge'za nene'za atrazama'a, nama'a eka eka kupi erivite'naze? 12fu'a eka eka kupi zogiri'none hu'naze.
20Hagi 7ni'a bretireti tamnasi'na 4tauseni'a vahe zami'noge'za nene'za atrazama'a, nama'a eka eka kupi zogiri avite'naze? Hige'za 7ni'a kupi zogiri'none hu'za hu'naze.
21Anante Jisasi'a anage huno zmasami'ne, e'ina'ma hu'noazankura menina tamagra tamagesa antahi'ama nosazafi?
22Zamagra Bedsaita kumate azageno, mago'a vahe'mo'za avusu hu'nea ne' avare'za Jisasinte e'naze. Avurgare avako hinkeno so'e huntenogu hanaveti'za Jisasi antahige'naze.
23Ana nehzageno, Jisasi'a avusu hu'nea ne'mofo azante avazu huno kumara atreno megi'a vuteno, Jisasi'a avufi avetu ahenenteno, azanu avako nehuno, mago'azana negano? Huno antahigene.
24Kesga huno avua negeno, vahera vano nehazagena zmagoanagi, zafamo vano nehiaza nehige'na nezmagoe huno hu'ne.
25Anante Jisasi'a mago'ene azanu avurgare avako higeno, ana ne'mofo avurgamo'a hari higeno, ke ankereno negeno maka'zana keama huno ke'ne.
26Anante Jisasi'a hunenteno, kumapina ufrege efrege osunka, fatgo hunka nonkarega vuo huno asami'ne.
27Jisasi'a amage nentaza disaipol naga'ane Sisaria Filipai kumatamimpi vu'naze. Kantegama nevu'za Jisasi'a anage huno zmantahige'ne, Nagrikura vahe'mo'za iza'e hu'za neheze?
28Mago'amo'za, hu'za mono ti frezamante'nea Joni'e hu'za nehze. Hagi mago'a mo'za, kasnampa ne' Ilaija'e hu'za nehze. Hagi mago'amo'za korapa kasnampa vahepinti mago'zmimo'e hu'za neheze.
29Anage hzageno Jisasi'a zamagri zmantahigeno, hagi tamagra iza'e hutma Nagrikura neheze? Higeno Pita'a kenona huno, kagra Kraisige, Anumzamo'ma huhamprino vahe'ama zmavregahanema hu'nea nere hu'ne.
30Agra hu hankavetino mago vahera ana naneke huama hutma ozmasmiho huno zamasmi'ne.
31Anante Jisasi'a erigafa huno amage'ma nentaza disaipol naga'a rempi huzamino, Vahe'mofo Mofavremo'a rama'a ata e'nerisigeno, mono kva vahe'mo'zane, ugagota kva vahe'mo'zane, kasegere ugagota hu'naza vahe'mo'za zmefi humiza ahefrisageno, tagufagna maseteno otigahie huno zmasami'ne.
32Huama huno amate zmasamigeno, Pita'a nentahino Jisasina avaregantiteno, agafa huno e'inahu kea osuo huno kesu'ne.
33Hianagi Jisasi'a rukrahe huno, amage nentaza disaipol nagatega nezmageno Pitana kesuno, Sataga manignenka namefiga'a evuo, Anumzamofo antahintahi novaririnanki, vahe'mofo antahintahi nevaririne.
34Anante Jisasi'a maka veamokizmi ke hige'za, amage'ma nentaza disaipol naga ene emetru hazageno, anage huno zmasami'ne, mago vahe'mo nagri namage'ma antenaku'ma hanuno'a, agra'a avesi'zana netreno, keka zafa'a erigofino namage egahie.
35Na'ankure iza'o, agra'a manizama'a eri so'e huku hanimo'a, asimu'a atregahie. Iza'o nagriteku'ene knare musenkere'ma asimu'a atresimo'a, manizama'a erigahie.
36Mago vahe'mo'ma ama mopafi fenoza eri atruma nehanigeno, agu amema'a fnanema haniana, nankna aza hu'za erigahie?
37Na'a vahe'mo'a asimuma erisigura nona'a huno Anumzamofona amigahie?
38Iza'o ama knafi keontahi kumike vahepi, Nagriku'ene Nanekenimofo agaze huntesimofona, henka Vahe'mofo Mofavremo Nfa'amofo hanavefima routge ankero vahe'ane esuno'a, Agranena zamagaze hunte'nesamokizmia, eme agaze huzmantegahie.
