1Jisasi'a erigafa huno fronka ke zmasami'ne, mago mopa agafa ne'mo'a waini hoza kri'ne. Ana hoza kegina huno, waini'ma tatisia keria asenteteno, mni'neno kvahu nona kinte'ne. Zoka mni'neno ikante zgo miza seterehu (rent) vahete, hoza'a netreno afete ka vu'ne.
2Hozama vasage knama egeno'a, kazokzo eri'za ne'a huntegeno, agri'ma refko hu'za amisnazama'a erisnigu, kegva hune'za ikantema mizama (rent) nezamiza naga'mokizmire e'ne.
3Ana hianagi, anama kegvama hu'naza nagamo'za, azeri'za knonkeve nemi'za, atrageno mago'zana e'ori amane vu'ne.
4Ete mago'ane ru kazo kazo eri'za ne'a huntegeno vige'za, anu rutane'za ahete'za, ke huhaviza hazageno atreno e'ne.
5Ana hazageno ete mago'ene ru huntegeno vimofona, ahe frigeno hakare huzmantege'za nevzageno, mago'a knonkeve nezami'za, mago'a zmahe fri'naze.
6Ana hazageno, magoke avesi avesi hunentea mofavrege mani'ne. Ana huzmante vgareteno, henkarfana magoke mani'nea mofavre'a hunenteno, zamagra magoke mofavre ni'agi'za antahimigahaze hu'ne.
7Hianagi ana hoza kva hu'naza vahe'mo'za, zamagra zmagra anage hu'naze, nafa'amofo zama erisanti haresia nera ama eanki, enketa ahe frisunkeno nefa feno zamo'a, tagriza se'nie! Hu'za hu'naze.
8Ana nehu'za azeri'za ana mofavrea ahe frite'za, avufa'a waini hozafinti megi'a mate vu'naze.
9Waini hozamofo nefa'a nankna eme hugahie? Agra eno waini hoza kegva krinaza vahera eme zmaheno, waini hoza ru vahe'mokizmi eri zaminke'za, kegva hugahaze.
10Hanki ama naneke Anumzamofo avontafepi krente'nazana hampritma ontahinazo? Nogi vahe'mo'za haviza hie huza atre'naza havemo'a, no renage antepinka no azeri hanaveti have fore hu'ne.
11Anumzamo ama anazana hu'neanki, tavuma konana knare zantfa hu'ne. (Sam-Zga 118:22-23)
12Hagi ana vahe'mo'za azeri'saza kanku hakre'naze. Na'ankure fronka kema hu'neana zamagriku hu'ne. Hianagi zmagra tusi'a vahe kevugu koro nehu'za atre'za vu'naze.
13Hagi Juda kva vahe'mo'za Jisasina rehe'za kema huhaviza hanige'za, ana ke eri'za keaga hunte'naku, mago'a farisi vahe'ene, Heroti naga'ane huzmantege'za vu'naze.
14Zamagrama Jisasinte'ma ne-eza anage hu'naze, Hurami ne'moka, tagra antahi'none, kagra tamagege nehunka, mago vahekura koro nosunka, havi vahe'ene fatgo vahe'ene mago'zanke hunka Anumzamofo fatgo kankura rempi huneraminketa nentahune. Hagi knare Sisana takesia amigahumpi omigahune?
15Hianagi krunage haza nezamageno, anage huno zmasami'ne, na'a higetma Nagrira renahetma negaze? mago zagoa eritma enkena kaneno,
16hige'za mago zago eri'za eme amizageno, iza amema'ane avone me'ne? Hige'za zmagra hu'za, Sisane hu'za hu'naze.
17Anante Jisasi'a amanage huno hu'ne, knareki Sisa zana Sisa amigahaze. Hagi Anumzamofo zana, Anumzamofo amigahaze huno hige'za tusiza hu'za antri hu'naze.
18Mago'a Satusi mono vahe'mo'za (fripinti o'otigahaze nehaza vahe'mo'za) Jisasinte e'za anage hu'za antahige'naze.
19Hurami ne'moke, anage huno korapa Mosesi'a avona krerami'ne, mago ne'mo'ma ara eriteno mofavre onteno frinkeno'a, nefu ana ara erinuno, mofavre ksentesigeno, nefu agimo'a fanane osugahie huno avona krente'ne. (Diu-Kas 25:5-6)
20Hagi 7ni'a kogna mani'nazafinti, agonesa zimimo ara eriteno mofavre onteno frine.
21Nagna'amo ana ara eri'ne. Eriteno mofavre onte frigeno, anante'mo'a anazanke huno ana ara eriteno, mofavre onteno fri'ne.
22Ana 7ni'a kogna naga'mo'za, magore hu'za mofavre kse onte fri vgaretageno, ana ara henka'a fri'ne.
23Fri'pintima oti knazupa, ana maka kognamo'za fri'pintima oti'nageno'a, iza a' manigahie? Na'ankure maka ana 7ni'a kognamo'za ana ara kazo eritere hute'za fri'naze.
24Jisasi'a anage huno zmasami'ne, hantagama hazana, tamagra Anumzamofo avontafepi kre'nea kea antahitma ketma osuta, Anumzamofo hihamu'a onkenetma nehazafigure.
25Na'ankure fri'nehnafinti'ma oti snazana, arave hu'zana omnesigeno, ara vasi omi ami hu'zana omnesigeno, monafinka ankero vahe'kna hu'za manigahaze.
26Hianagi tamage nanekema me'neana frite'za otigahaze. Anumzamo'a onensa zafa tevenerefinti Mosesenku ke higeno antahiteno, avontafepi krente'neana omne'negeta hamprita onkenetma nehazo? Anumzamo amanage huno asami'ne, nagra Abrahamu Anumza mani'na, Aisaki Anumza mani'na Jekopu Anumza mani'noe. (Eks-Uti 3:2, 6)
27Huno hu'negu, Agra fri vahe'mokizmi Anumzana omani'neanki, ksefa hu'za mani'naza vahe'mokizmi Anumza manine, tamagra tusi'a hantaga nehaze.
28Hagi mago kasegere ugagota hu'nea ne'mo eme antahiama ke hakare nehazageno, Jisasi'a so'eza huno kenona zamirera nezmasamigeno, ananke eme nentahino, Jisasina antahigeno, maka kasegefina ina kasegemo vugota hu'ne?
29Higeno Jisasi'a amanage huno hu'ne, kagota kasegea amanahu me'ne, Israeli vahe'mota antahiho, Ramo'a tagri Anumzane. Rana agrake mani'ne.
30Kagra kagu'areti Anumza ka'amofona avesinto, maka kamema'areti hunka avesinto, maka antahintahi ka'areti hunka avesinto, maka hanave ka'areti hunka avesinto hu'ne. (Diu-Uti 6:4-5)
31Anantera amanahu kasege me'ne, kagragu kavesi nentanaza hunka tva'onkare'ma mani'nenimofona avesinto. (Lev-Pris 19:18) Ama tare kasegemofona mago kasegemo'e huno znagateore'ne
32Kasegere ugota hu'nea ne'mo'a anage hu'ne, Hurami ne'moka, tamage hunka hane, Agra magoke mani'neankino magore huno amefiga'a vahera omani'ne.
33Ana hanigeta Anumzamofona tagu'areti avesinteta, maka antahintahireti avesinteta, maka hanavereti avesinteta, tagragu tavesi nentonaza huta tva'onte maninesaza nagara zmavesinte sunazamo'a, kre sramna vuzane, Anumzamofo hakare zanka'a ami'zana agatereno ugagotaza me'ne.
34Jisasima antahiama ana ne'moma kenona'a hu so'e higeno, anage huno asami'ne, kagra Anumzamofo kuma tava'onte mani'nane. Higeno mago'a vahe'mo'za antahige zankura koro hu'za antahi onke'naze.
35Jisasi'ma ra mono nompi rempi hunezamino, anage hu'ne, na'ante kasegere ugagota hunaza vahe'mo'za Kraisinkura, Deviti nemofo'e nehaze?
36Ruotge Avamumo Daviti azeri otigeno amanage hu'ne, Ramo'a anage huno Ranimofonkura hu'ne, Nazantmaga kaziga trate manige'na, ha' vaheka'a kagafinka azeri fenkamu atraneno hu'ne. (Sam-Zga 110:1)
37Devitima agra'ama huno Ranimo'e hanigeno'a, nankna huno Deviti mofavre manigahie?
38Rempima huzamifina Jisasi'a anage huno mago'ene zmasami'ne, kasegere ugagota hu'naza vahekura kva hiho. Zamagra za'za kukena hu'za maketi kumapi hakare vahe'mo'za nezmage'za muse huzmante zanku zmavesi vahere.
39Hanki osi mono nompi vugota hu'nea trate unemaniza, nezama nepina zmagi eri trate nemanize.
40Kento a'nemokizmi krunage hu'za feno zimi eneri'za zamo, eama hu'zanku zaza nunamu nehaze. Ana hu'negu ama anazamofo mizama'a, agatere'za ranknaza erigahaze.
41Jisasi'a ra mono nompi, zagoma nentaza taferomofo tva'onte mani'neno zagoma eme antazana zmage'ne. Feno zimi me'nea vahe'mo'za rama'a zago eme ante'naze.
42Ana nehageno amunte omane kento a'mo eno, tare osi koranke zago mago toza avamente me'nea erino ana taferopi eme netregeno,
43Jisasi'a amage'ma nentaza disaipol nagara ke hige'za ageno anage huno zmasami'ne, tamage hu'na neramasmue, ama amunte omane kento a'mo rama'a zagoa ruga'a vahera zmagetereno taferopina eme ante'ne.
44Na'ankure maka vahe'mo'za rama'a ante'nafinti, osi'a ofa zago'a eme ante'naze. Hianagi ama kento a'mo'a amunte omnefta hunefinti eri'neama'a ante vga reneankino, miza seno neneno manisiazana omane'ne.
