Maki 11

1

2

3

4

5

6

7

8

9

10

11

12

13

14

15

16

¹Hagi Jerusale kuma tva'onte e'naze. Betfakene Betani Olive agonare me'nea kumate ne-eza, Jisasi'a tare amage'ma nenta'a disaipol netrena huznanteno,

²anage huno znasami'ne, tanagra ugoteta antu kumapi vi'o. Kasefa donki vahe'mo'a agumpi omninenia kina arente nenigeta ome kenutna, nofira eri katufetna avazu huta e'o.

³Hanki ana nehnakeno mago'a vahe'mo, na'a hu'naku nevra'e huno hinketna'a? anage hi'o, Ramofona eriza me'ne hutna hikeno, ame huno atrenketna avretna egaha'e.

⁴Huno huznantegeke karanka nevu'ne ome ka'ana, fegia nomofo kafante rente'nagene ome negene katufe'na'e.

⁵Anante oti'naza vahe'mo'za, na'a hunaku donkina katunefa'e hu'za znantahige'naze?

⁶Jisasi'ma hu'nea kea nezmasmige'za, anante'ma oti'naza vahe'mo'za knarere hu'za huznante'naze.

⁷Anante ana kasefa donkina avre'ne Jisasinte ne-ene anakreku'zani zafi'ne ana donkimofo agumpi tafevasi nentakeno, Jisasi'a ana agofetu manino vu'ne.

⁸Mika veamo'za zaza anakre ku'zimi zafiza kampi vasiza nevu'za, mago'amoza zafa asina hozafinti akafri'za kampi tafe vasiza nevzageno, Jisasi'a ana tafete vu'ne.

⁹Kote'za vaza vahe'mo'zane henkama aza vahemo'zanena amrara hu'za ranke hu'za muse hunente'za, tazahu nera, (hosanna) ramofo agifi ne-emofona asomu huntesnie! (Sam-Zga 118:25-26)

¹⁰Nerafa Deviti nagapintima ne-emofonkura mrerisa Anumzamofona muse hunenteta, Tazahu ne'mofona agi'a hentesga hanune.

¹¹Anante Jisasi'a Jerusale kumapi vuno, ra mono nompi ufreno maka'za ome kagino ke vgareteno, atiramino 12fu'a amage'ma nentaza disaipol naga'a zgemo kinaga segeno nezamavreno atreno Betani kumate vu'ne.

¹²Masete'za nanterana Betani kumara atre'za neageno, Jisasina aga ate'ne.

¹³Fiki zafa'mofo asina ogamanu me'negeno negeno, nezama rente'nenigu kenaku eme ke'ne. Hianagi eme keana asinage me'negeno ke'ne. Na'ankure fiki zafa raga rentekna omane'ne.

¹⁴Ana zafa mofonku anage huno hu'ne, mago'ene rga oresnanke'za veamo'za tagi'za onegahaze. Anage hige'za amage'ma nentaza disaipol nagamo'za ana naneke antahi'naze.

¹⁵Jisasi'ene amagema nentaza disaipol naga'ane Jerusale kumate uhnati'za, ra mono nompi marerino, agafa huno maketima nehaza vahera zmahenati netreno, zagore netre'za miza nesaza vahe'mokizmi trara erikaha hunetreno, mani'ne'za maho nma zgore netraza tra enena erikaha hutrene.

¹⁶Ana huteno feno zantamia mago vahe'mote hutma eritma ra mono nompina aru kitagita vuta eta osutfa hiho huno hu'ne.

¹⁷Ana huteno agafa huno rempi hunezamino anage huno zamasmi'ne, amanage huno Anumzamofo avontafepina krente'ne, Nagri nona mika kaziga vea'moza nunamu hanaza no me'ne, hianagi tamagra kumzafa vahe'moza fraki nonkuma eri tro nehaze. (Aisa 56:7, Jer 7:11)

¹⁸Ra mono kva vahe'mozane, kasegerema ugagota hu'naza vahe'mo'za nentahiza, inankna huta ahegahune hu'za ahesaza kankamunku hakrenaze. Na'ankure zmagra koro Agrikura hu'naze. Hagi maka vahe'mo'za rempima huzamia zankura antri hu'naze.

¹⁹Ana kinaga Jisasi'ene amage'ma nentaza disaipol nagamo'za, rankuma atre'za fegi'a vu'naze.

²⁰Nantera enevu'za kazana, sifnama Jisasi'ma ahente'nea fiki zafamo'ene arfu'na'amo'a, osapa re'nege'za ke'naze.

²¹Pita'a Jisasi'ma hu'nea kegu age'sa nentahino anage hu'ne, Hurami ne'moka ko! Okima sifna kema hunka raga renontenka osaparo hu'nana Fiki zafamo'a osapa re'ne.

²²Jisasi'a kenona anage huno zamagrira zmasami'ne, Anumzamofonte tamentinti hiho.

²³Tmage hu'na neramasamue, mago vahe'mo'ma ami agonagu'ma huno, otinka hagerimpi takauro huno tare agesa ontahi amentinti nehuno hanigeno'a, amane ke haniaza huno fore hugahie.

²⁴E'ina hu'negu anage hu'na neramasamue. Nazankuma nunamu hunka Anumzamofo antahima kesunka, hago eri'noe hunka kamentinti hanunka erigahne.

²⁵Hagi otinka nunamu hunakuma hanunka, mago'mo haviza hugante'nesnia zana atrento, anama hanunkeno'a, monafi nemania Nafakamo'a kagri'enena kumika'a atregantegahie.

²⁶Hu'neanagi kagra vahe'mofo kefoza atre ozmantesanana, monare mani'nea Nfakamo kagri kefozana anazanke huno atre ogantegahie.

²⁷Jerusale kumate ete uhnatizageno, Jisasi'a ra mono no kumapi nevige'za, ra mono kva vahe'mo'zane, kasegere ugagota hu'naza vahe'mo'zane, mago'a ugagota kva vahe'mo'zane, nege'za Jisasinte e'za,

²⁸anage hu'za antahige'naze, Kagra ina hihamure hakare zana eri fore nehane? Iza hihamua kamigenka hakare zana nehane?

²⁹Jisasi'a zamagri kura anage huno hu'ne, Nagra ete tamagrira mago'zanku tmantahigegahue, ana kenona'a hutenkena, aza hihamu namigena erizana e'nerufi tmasmigahue.

³⁰Nasamiho, Joni mono ti frezmante'nea, zana monafinti e'nefi, vahe'mo erifore hu'ne?

³¹Jisasi nehige'za zamagra ohumi ahumi nehu'za anage hu'naze. Tagrama monafintire huta hanunkeno'a, Agra anage hugahie. Hagi nahigetma tamentinti ana zankura nosaze huno hugahie?

³²Hianagi vahe'mo eri fore hu'ne, huta osugosune, nehu'za maka veaku koro hu'za atre'naze. Na'ankure maka veamo'za Joninkura, tamage kasnampa nere hu'za antahinaze.

³³Anage nehu'za Jisasina kenona hunte'ze, ontahinone hazageno Jisasi'a anage huno zmasami'ne, Nagranena iza hihamufi eri'zana enerue ontamasmigahue huno hu'ne.